CopticWiki

…ⲛ]ⲧⲁⲓⲧⲁⲙⲓⲟϥ ϩⲓⲧⲛⲧⲕⲉⲗⲉⲩⲥⲓⲥ ⲙⲡⲉⲓⲱⲧ . ⲁⲩⲱ ϫⲉ ϩⲛⲁⲁⲩ ⲛⲓⲙ ⲉⲧϣⲟⲟⲡ ϩⲛ ⲧⲡⲉ ⲁⲩⲱ ϩⲓϫⲙ ⲡⲕⲁϩ ⲁⲛⲟⲕ ⲡⲉⲛⲧⲁⲓⲧⲁⲙⲓⲟⲟⲩ ⲧⲏⲣⲟⲩ ϩⲓⲧⲛ ⲧⲕⲉⲗⲉⲩⲥⲓⲥ ⲙⲡⲉⲓⲱⲧ . ⲁⲩⲱ ϫⲉ ⲡⲣⲱⲙⲉ ⲇⲉ ϩⲱⲱϥ ⲁⲛⲟⲛ ⲙⲡⲉⲥⲛⲁⲩ ⲁⲛⲣ ϩⲱⲃ ⲉⲣⲟϥ . ⲁⲩⲱ ϫⲉ ⲡⲱⲓ ⲡⲉ ⲡⲁⲥⲱⲙⲁ ⲙⲛ ⲧⲉⲯⲩⲭⲏ ⲡⲁ ⲡⲁⲉⲓⲱⲧ ⲡⲉ ⲡⲛⲓϥ(ⲉ) ⲙⲡⲉⲡⲛⲉⲩⲙⲁ . ⲁⲩⲱ ϫⲉ ⲁⲛϥⲓ ⲛⲟⲩ[ⲙ]ⲉⲣⲟⲥ ⲛⲧⲉ [ⲧ]ⲡⲉ ⲁⲛⲧⲁϩϥ ⲏ [ⲁⲛ]ⲙⲟϫϭϥ ⲙⲛ [ⲟⲩⲙ]ⲉⲣⲟⲥ ⲛ[ⲧ]ⲉ ⲡⲕⲁϩ ⲁⲛⲧⲁⲙⲓⲉ ⲡⲣⲱⲙⲉ.

…che ho creato per ordine del Padre"; e: "ogni cosa che è nel cielo e sulla terra, le ho create tutte per ordine del Padre"; e: "anche l'uomo, ambedue abbiamo lavorato ad esso"; e: "mio è il corpo e l'anima; del Padre lo spirare dello spirito"; e: "abbiamo preso una parte del cielo e l'abbiamo mescolata e impastata con un pezzo della terra ed abbiamo fatto l'uomo".

…which I created by the Father's command"; and: "everything in heaven and on earth, I have created all by the Father's command"; and: "even man, we both worked on him"; and: "mine is the body and the soul; the breathing of the spirit is the Father's"; and: "we took a part of the sky and mixed and kneaded it with a piece of the earth and made man".

ⲥⲱⲧⲙ ϫⲉⲕⲁⲥ ⲉⲧⲉⲧⲛⲁⲉⲓⲙⲉ ϫⲉ ϩⲉⲛⲃⲗⲗⲉ ⲛⲉ ⲛⲉⲧⲥϩⲁⲓ ⲛϩⲉⲛⲁⲡⲟⲕⲣⲁⲫⲟⲛ . ⲁⲩⲱ ϩⲉⲛ#ⲃⲗⲗⲉ ⲛⲉ ⲛⲉⲧϫⲱ ⲙⲙⲟⲟⲩ ⲁⲩⲱ ⲉⲧⲡⲓⲥⲧⲉⲩⲉ ⲉⲣⲟⲟⲩ ⲉⲩⲣⲁϩⲧ ϩⲓ ⲟⲩⲥⲟⲡ ⲉϩⲣⲁⲓ ⲉϩⲉⲛϩⲓⲉⲓⲧ .

Udite, affinché sappiate che sono dei ciechi coloro che scrivono gli apocrifi, e dei ciechi quelli che li ripetono e credono in essi, insieme caduti nella fossa.

ⲡⲉϫⲁϥ ⲟⲛ ϫⲉ ⲁⲡϣⲏⲣⲉ ϫⲟⲟⲥ ϫⲉ ⲁⲥϣⲱⲡⲉ ⲛⲧⲉⲣⲉ ⲡⲉⲓⲱⲧ ⲟⲩⲱ ⲉϥⲧⲁⲙⲓⲟ ⲙⲡⲙⲛⲧⲥⲛⲟⲟⲩⲥ ⲛⲕⲟⲥⲙⲟⲥ ⲛⲁⲓ ⲉⲧⲉ ⲛⲥⲉⲥⲟⲟⲩⲛ ⲙⲙⲟⲟⲩ ⲁⲛ ⲛϭⲓ ⲟⲩⲟⲛ ϩⲛ ⲛⲁⲅⲅⲉⲗⲟⲥ . ⲙⲛⲛⲥⲱⲥ ⲁϥⲧⲁⲙⲓⲉ ⲕⲉ ⲥⲁϣϥ ⲛⲕⲟⲥⲙⲟⲥ . ⲁⲩⲱ ϫⲉ ⲡϩⲟⲩⲛ ⲙⲡⲙⲛⲧⲥⲛⲟⲟⲩⲥ ⲉⲣⲉ ⲛⲁⲅⲁⲑⲟⲛ ⲛⲁⲧϣⲁϫⲉ ⲉⲣⲟⲟⲩ ⲛϩⲏⲧⲟⲩ . ⲁⲩⲱ ϫⲉ ⲡⲃⲟⲗ ⲇⲉ ⲙⲡⲓⲥⲁϣϥ ⲁϥⲧⲁⲙⲓⲉ ⲕⲉ ϯⲟⲩ ⲛⲕⲟⲥⲙⲟⲥ . ⲁⲩⲱ ϫⲉ ⲉⲣⲉ ⲛⲉⲡⲛⲉⲩⲙⲁ ⲛⲧϭⲟⲙ ⲛϩⲏⲧⲟⲩ . # ⲡⲃⲟⲗ ⲇⲉ ⲟⲛ ⲙⲡⲓϯⲟⲩ ⲁϥⲧⲁⲙⲓⲟ ⲛⲕⲉ ϣⲟⲙⲧ ⲛⲕⲟⲥⲙⲟⲥ . ⲉⲛⲧⲟⲟⲩ — ⲡⲉϫⲁⲩ — ⲛⲉ ⲙⲙⲁ ⲛⲛⲁⲅⲅⲉⲗⲟⲥ . ⲁⲩⲱ ϫⲉ ⲡⲓϫⲟⲩⲧⲥⲁϣϥⲉ ⲇⲉ ⲛⲕⲟⲥⲙⲟⲥ ⲉⲩⲙⲡⲃⲟⲗ ⲛⲧⲉⲓⲡⲉ ⲧⲏⲣⲟⲩ ⲙⲛ ⲡⲉⲓⲕⲁϩ .

Dice anche: "il Figlio disse: accadde, dopo che il Padre ebbe finito di creare i dodici mondi, quelli che nessuno degli angeli conosce, che quindi creò altri sette mondi"; e "all'interno dei dodici stanno le bontà ineffabili"; e "oltre ai sette creò altri cinque mondi"; e "in essi stanno gli spiriti della potenza; ed oltre a questi cinque creò altri tre mondi. Questi — dicono — sono le residenze degli angeli"; e "questi ventisette mondi sono tutti di fuori di questo cielo e di questa terra".

ϩⲁϩ ϭⲉ ⲛⲉ ⲛϣⲁϫⲉ ⲙⲡⲗⲁⲛⲏ ⲉⲧⲉ ⲛⲁϣⲱⲟⲩ ⲛϭⲓ ⲛⲉⲛⲧⲁⲩⲡⲗⲁⲛⲁ ⲛϩⲏⲧⲟⲩ ⲁⲩⲱ ⲁⲩⲡⲗⲁⲛⲁ ⲛϩⲉⲛⲕⲟⲟⲩⲉ . ⲏ ⲛⲧⲉⲧⲛⲛⲁⲩ ⲁⲛ ϫⲉ ⲛⲥⲉⲥⲟⲟⲩⲛ ⲁⲛ ϫⲉ ⲉⲩϫⲉ ⲟⲩ . ⲉⲃⲟⲗ ϫⲉ ⲉϣϫⲉ ⲟⲩⲛ ϩⲉⲛⲕⲉ ⲕⲟⲥⲙⲟⲥ ϣⲟⲟⲡ ⲉⲙⲛ ⲁⲅⲅⲉⲗⲟⲥ ⲥⲟⲟⲩⲛ ⲙⲙⲟⲟⲩ ⲉⲧⲃⲉ ϫⲉ ⲙⲡϥⲧⲥⲁⲃⲟⲟⲩ ⲉⲣⲟⲟⲩ . ⲛⲁϣ ⲛϩⲉ ⲛⲧⲟⲟⲩ ⲉⲩⲥⲟⲟⲩⲛ ⲙ#ⲙⲟⲟⲩ ⲏ ⲛⲁϣ ⲛϩⲉ ⲉϥⲛⲁⲧⲥⲁⲃⲟⲟⲩ ⲉⲣⲟⲟⲩ ⲛⲧⲟⲟⲩ .

Molte dunque sono le parole ingannevoli con le quali molti sono coloro che hanno ingannato se stessi e hanno ingannato gli altri. Non vedete che non sanno ciò che dicono? Perché, se vi sono degli altri mondi che nessun angelo conosce, perché egli non glieli ha mostrati, come è possibile che costoro li conoscano? E come li avrà mostrati proprio a loro?

ϥⲥⲏϩ ⲅⲁⲣ ϫⲉ ⲡϫⲟⲉⲓⲥ ⲛⲁⲉⲓⲣⲉ ⲁⲛ ⲛⲟⲩϩⲃ (ⲉ)ⲙⲡϥϭⲟⲗⲡϥ ⲉⲃⲟⲗ ⲉⲛⲉϥϩⲙϩⲁⲗ ⲛⲉⲡⲣⲟⲫⲏⲧⲏⲥ . ⲡⲟⲥⲱ ⲙⲁⲗⲗⲟⲛ ⲛⲉϥⲁⲅⲅⲉⲗⲟⲥ . ⲛⲧⲁⲩⲛⲟⲉⲓ ⲛⲛⲁⲓ ⲉⲃⲟⲗ ⲧⲱⲛ . ⲕⲁⲓⲧⲟⲓ ⲉϥⲥⲏϩ ⲛⲧⲉⲓϩⲉ ϫⲉ ϩⲛ ⲧⲁⲣⲭⲏ ⲁⲡⲛⲟⲩⲧⲉ ⲧⲁⲙⲓⲟ ⲛⲧⲡⲉ ⲙⲛ ⲡⲕⲁϩ . ⲙⲡϥϫⲟⲟⲥ ϫⲉ ⲛⲕⲁϩ . ⲛⲑⲉ ⲉⲧ[ⲉ] ⲟⲩⲛ ϩⲁϩ ⲙⲙⲛ[ⲧ]ⲙⲛⲧⲣⲉ ⲥⲏⲙ[ⲁ]ⲛⲉ ⲙⲡⲁⲓ .

Sta scritto infatti: "Il Signore non farà nulla senza rivelarlo ai suoi servitori i profeti"; tanto più dunque ai suoi angeli. Da dove sanno queste cose? Dal momento che è scritto così: "al principio Dio creò il cielo e la terra" e non dice: le terre; così come molte testimonianze confermano.

ⲛⲧⲁ ⲡϫⲟⲉⲓ[ⲥ ⲅⲁⲣ] ϫⲟⲟⲥ ⲛⲧⲉⲓ[ϩⲉ] ⲉϥϣⲁϫⲉ ⲉϩⲣⲁⲓ ⲉⲡⲉϥⲉⲓⲱⲧ {ϫⲉ} ϯ ⲉⲟⲟⲩ ⲛⲁⲓ ϩⲙ ⲡⲉⲟⲟⲩ ⲉⲛⲉⲟⲩⲛⲧⲁⲉⲓϥ ϩⲁⲧⲏⲕ ⲙⲡⲁⲧⲉ ⲡⲕⲟⲥⲙⲟⲥ[

Il Signore (infatti) disse così, parlando a suo Padre: "Padre mio, glorificami nella gloria che avevo presso di te prime che il mondo fosse fatto.

]ⲧⲛϯ ⲉⲟⲟⲩ ⲛⲁϥ ϩⲛ ϩⲉⲛϩⲃⲏⲩ[ⲉ] ⲁⲛⲁⲛⲟⲩⲟⲩ[ .] ⲉϣϫⲉ ⲟⲩϣⲡⲏⲣⲉ ⲡⲉ ⲡⲥⲟⲟⲩⲛ ⲛⲛⲉⲧⲟⲩⲁⲁⲃ ⲛⲑⲉ ⲉⲧⲥⲏϩ ϫⲉ ⲁⲩⲣ ϣⲡⲏⲣⲉ ⲙⲡⲉⲕⲥⲟⲟⲩⲛ ⲛϩⲏⲧ . ϩⲉⲛⲙⲟⲓϩⲉ ⲟⲛ ⲛⲉ ⲛⲉϩⲃⲏⲩⲉ ⲧⲏⲣⲟⲩ ⲉⲧⲛⲁⲛⲟⲩⲟⲩ ⲉ[ⲛⲧ]ⲁⲩⲁⲁⲩ ..[...]ⲛⲛⲁⲏⲧ [......]ⲛⲁϣ ⲛ[.....]ⲛⲁⲥϩⲁⲓ [....]ⲡⲁⲣⲁⲅⲅⲉⲓⲗⲉ ⲛⲁⲛ ⲉⲛⲁ(ⲓ) .

…e lo glorifichiamo con azioni buone. Se è meravigliosa la conoscenza dei santi, come è scritto: "ammirarono la tua conoscenza", sono anche meravigliose tutte le azioni buone fatte . . . ci avrebbe ordinato ciò.

ⲉⲛⲉⲩϩⲁⲣⲉϩ ⲁⲛ ⲉⲡⲇⲓⲕⲁⲓⲟⲛ . ⲏ ⲉⲛⲉⲩⲛⲟⲩϩⲙ ⲁⲛ ⲙⲡⲉⲧϩⲏϣ ⲏ ⲡⲉⲧϫⲏⲩ ⲛϭⲟⲛⲥ . ⲛⲁϣ ⲛϩⲉ ⲉⲩⲛⲁⲥⲩⲙⲃⲟⲩⲗⲉⲩⲉ ϫⲉ ⲁⲣⲓ ⲡⲇⲓⲕⲁⲓⲟⲛ ⲁⲩⲱ [....]..ⲙ[...........]#ⲃⲓⲏⲛ . ⲉⲛⲉⲩⲛⲏⲥⲧⲉⲩⲉ ⲁⲛ ⲡⲉ . ⲏ ⲛⲉⲩϣⲗⲏⲗ ⲁⲛ ⲡⲉ . ⲏ ⲛⲉⲩⲣ ϩⲱⲃ ⲛⲓⲙ ⲁⲛ ⲉⲛⲁⲛⲟⲩϥ . ⲛⲁϣ ⲛϩⲉ ⲉⲩⲛⲁⲡⲁⲣⲁⲅⲅⲉⲓⲗⲉ ⲛⲁⲛ ⲉⲣ ⲡⲡⲉⲧⲛⲁⲛⲟⲩϥ .

Se non osservassero la giustizia o non salvassero colui che è in difficoltà o al quale è fatto torto, perché mai consiglierebbero: fai la giustizia e … miseri. Se non digiunassero o non pregassero o non facessero alcuna buona azione, perché mai ci raccomanderebbero di fare il bene?

ⲉⲛⲉⲩⲙⲟⲥⲧⲉ ⲁⲛ ⲙⲡⲡⲉⲑⲟⲟⲩ ⲉⲩⲙⲉ ⲙⲡⲡⲉⲧⲛⲁⲛⲟⲩϥ ⲛⲁϣ ⲛϩⲉ ⲉⲩⲛⲁⲥϩⲁⲓ ⲛⲁⲛ ϫⲉ ⲙⲉⲥⲧⲉ ⲡⲡⲉⲑⲟⲟⲩ ⲛⲧⲉⲧⲛⲙⲉⲣⲉ ⲡⲡⲉⲧⲛⲁⲛⲟⲩϥ . ϩⲉⲛⲡⲉⲧⲟⲩⲁⲁⲃ ⲅⲁⲣ ⲛⲉ .

ⲉⲧⲃⲉ ⲡⲁⲓ ⲥⲉϫⲱ ⲙⲙⲟⲥ ϫⲉ ⲛⲉⲧⲣ ϩⲱⲃ ⲁⲛ ⲉⲧⲁⲛⲟⲙⲓⲁ ⲛⲉⲛⲧⲁⲩⲃⲱⲕ ϩⲛ ⲛⲉϩⲓⲟⲟⲩⲉ ⲙⲡⲛⲟⲩⲧⲉ . ⲛⲉⲩϣⲁϫⲉ [ⲥ]ⲉⲟ ⲙⲙⲛⲧ[ⲣⲉ ⲛ]ⲛⲉⲩϩ[ⲃⲏⲩⲉ .] # ⲛⲑ[ⲉ] ⲉⲧⲟⲩϫⲱ ⲙⲙⲟⲥ ϫⲉ ⲁⲉⲓⲙⲉⲥⲧⲉ ⲡϫⲓⲛϭⲟⲛⲥ ⲁⲩⲱ ⲁⲓⲃⲟⲧϥ . ⲡⲉⲕⲛⲟⲙⲟⲥ ⲇⲉ ⲁⲓⲙⲉⲣⲓⲧϥ . ⲁⲩⲱ ⲟⲛ ϫⲉ ⲁⲓⲙⲉⲥⲧⲉ ϩⲓⲏ ⲛⲓⲙ ⲛϫⲓⲛϭⲟⲛⲥ . ⲛⲑⲉ ⲟⲛ ⲉⲧⲟⲩϣⲗⲏⲗ ϫⲉ ⲙⲡⲣⲧⲣⲉ ⲗⲁⲁⲩ ⲛⲁⲛⲟⲙⲓⲁ ⲣ ϫⲟⲉⲓⲥ ⲉϫⲱⲓ .

ⲛⲑⲉ ⲅⲁⲣ ⲉⲛⲧⲁ ⲡϫⲟⲉⲓⲥ ϫⲟⲟⲥ ϫⲉ ⲟⲩⲟⲛ ⲛⲓⲙ ⲁⲛ ⲉⲧϫⲱ ⲙⲙⲟⲥ ⲛⲁⲓ ϫⲉ ⲡϫⲟⲉⲓⲥ ⲡϫⲟⲉⲓⲥ ⲡⲉⲧⲛⲁⲃⲱⲕ ⲉϩⲟⲩⲛ ⲉⲧⲙⲛⲧⲉⲣⲟ ⲛⲙⲡⲏⲩⲉ ⲁⲗⲗⲁ ⲡⲉⲧⲛⲁⲉⲓⲣⲉ ⲡⲉ ⲙⲡⲟⲩⲱϣ ⲙⲡⲁⲉⲓⲱⲧ ⲉⲧϩⲛ ⲙⲡⲏⲩⲉ . ⲛⲧ[ⲉ]ⲓϩⲉ ⲟⲛ ⲡⲉⲧ[ϫⲱ ⲁ]ⲛ ⲙⲡϣⲁ[ϫⲉ ⲁⲩⲱ ⲡ]ⲉⲧⲥⲱ#ⲧⲙ ⲉⲣⲟϥ ⲡⲉⲧⲛⲁⲃⲱⲕ ⲉϩⲟⲩⲛ ⲉⲡⲱⲛϩ . ⲁⲗⲗⲁ ⲛⲉⲧⲛⲁⲣ ⲡϩⲱⲃ ⲛⲉ ⲙⲡϣⲁϫⲉ ⲉⲧⲟⲩϫⲱ ⲙⲙⲟϥ ⲏ ⲉⲧⲟⲩⲥⲱⲧⲙ ⲉⲣⲟϥ .

ⲧⲡⲓⲥⲧⲓⲥ ϣⲟⲩⲉⲓⲧ ⲁϫⲛ ⲛⲉϩⲃⲏⲩⲉ ⲛⲑⲉ ⲉⲧⲥⲏϩ . ⲡⲥⲟⲟⲩⲛ ϩⲱⲱϥ ⲏ ⲡⲥⲱ[ⲧⲙ] ϣⲟⲩⲉⲓⲧ ⲉⲙ[ⲛⲧⲁϥ] ⲙⲙⲁⲩ [ⲛⲛⲉϩⲃⲏ]ⲟⲩⲉ ⲉⲧ[ⲛⲁⲛⲟⲩ]ⲟⲩ . ⲁⲩⲱ [ⲕⲁ]ⲧⲁ ⲑⲉ ⲉⲧⲉⲣⲉ ⲡⲥⲱⲙⲁ ⲙⲟⲟⲩⲧ ⲁϫⲛ (ⲡ)ⲡⲛⲉⲩⲙⲁ ⲛⲑⲉ ⲉⲧⲥⲏϩ ⲡⲥⲟⲟⲩⲛ ϩⲱⲱϥ ⲏ ⲡⲥⲱⲧⲙ ⲙⲟⲟⲩⲧ ⲉⲙⲛⲧⲁϥ ⲙⲙⲁⲩ ⲛⲛⲉϩⲃⲏⲩⲉ ⲉⲧⲛⲁⲛⲟⲩⲟⲩ .

ⲏ ⲛⲟⲩϣ.[..]ⲛ ⲁⲛ[....]ⲛ#ⲧⲛⲣ ϩⲱⲃ ⲉⲡⲡⲉⲧⲛⲁⲛⲟⲩϥ ⲉⲛⲥⲱⲧⲙ ⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲡⲁⲉⲓⲱⲧ ⲣ ϩⲱⲃ ϣⲁϩⲣⲁⲓ ⲉⲧⲉⲛⲟⲩ ⲁⲩⲱ ⲁⲛⲟⲕ ϯⲣ ϩⲱⲃ . ⲟⲩ ⲡⲉ ⲡϩⲱⲃ ⲉⲧϥⲉⲓⲣⲉ ⲙⲙⲟϥ . ⲙⲏ ⲉϥⲧⲁⲙⲓⲟ ⲛϩⲉⲛⲕⲉ ⲙⲡⲏⲩⲉ ⲛⲃⲣⲣⲉ . ⲏ ⲕⲉ ⲕⲟⲥⲙⲟⲥ ⲛⲃⲣⲣⲉ . ⲙⲏ ⲉϥⲣ ϩⲱⲃ ⲁⲛ ⲉⲡⲉⲛⲟⲩϫⲁⲓ . ⲁϣ ⲇⲉ ⲛⲉ ⲛⲉϩⲃⲏⲩⲉ ⲙⲡⲉⲛⲟⲩϫⲁⲓ . ϥⲥⲟⲟⲩⲛ ⲛⲧⲟϥ ⲉⲣⲟⲟⲩ . ⲁⲩⲱ ⲁⲛⲟⲛ ϩⲱⲱⲛ ⲉⲛϣⲁⲛⲟⲩⲱϣ ⲧⲛⲛⲁⲥⲟⲩⲱⲛⲟⲩ .

ⲟⲩ ⲡⲉϣⲁⲣⲉ ⲡⲥⲁⲉⲓⲛ ⲁⲁϥ ⲙⲡⲣⲱⲙⲉ ⲉⲧⲉⲣⲉ ⲧⲉⲡⲗⲏⲅⲏ ϩⲓⲱⲱϥ . ⲙ(ⲏ) ⲉϣⲁϥϩⲱⲱⲧ # ⲁⲛ ⲙⲙⲟϥ ⲛϣⲟⲣⲡ ϩⲙ ⲡⲧⲟⲕ ⲙⲛⲛⲥⲱⲥ ⲛϥⲑⲉⲣⲁⲡⲉⲩⲉ ⲙⲙⲟϥ . ⲡϫⲟⲉⲓⲥ ⲇⲉ ϩⲱⲱϥ ⲉϥⲣ ϩⲱⲃ ⲉⲡⲉⲛⲟⲩϫⲁⲓ ⲙⲛ ⲡⲧⲁⲗϭⲟ ⲛⲛⲉⲛⲁⲛⲟⲙⲓⲁ ϩⲛ ϩⲉⲛϣⲱⲛⲉ ⲙⲛ ϩⲉⲛⲧⲕⲁⲥ ϩⲛ ϩⲉⲛⲙⲛⲧϩⲏⲕⲉ ⲙⲛ ϩⲓⲥⲉ ⲛⲓⲙ ⲉⲧϥⲉⲓⲛⲉ ⲙⲙⲟⲟⲩ ⲉϫⲱⲛ ⲕⲁⲧⲁ ⲕⲁⲓⲣⲟⲥ . ⲉϥⲡⲁⲓⲇⲉⲩⲉ ⲙⲙⲟⲛ ⲁⲛ ϩⲙ ⲡⲉϥϭⲱⲛⲧ ⲁⲗⲗⲁ ϩⲙ ⲡⲉϥⲟⲩⲱϣ ϫⲉ ⲉⲛⲛⲁⲙⲉⲧⲁⲛⲟⲉⲓ .

ⲁⲩⲱ ⲙⲛⲛⲥⲁ ⲛϩⲓⲥⲉ ⲉϣⲁϥⲛⲧⲟⲩ . ϣⲁϥⲧⲛⲛⲟⲟⲩ ⲟⲛ ⲙⲡⲉϥⲥⲙⲟⲩ ⲙⲛ ⲡⲉϥⲛⲁ # ⲙⲛ ⲙⲧⲟⲛ ⲛⲓⲙ ϩⲛ ⲛⲉϥⲙⲛⲧϣⲁⲛϩⲧⲏϥ . ⲛⲑⲉ ⲟⲛ ⲉⲧϥⲕⲱ ⲛⲁⲛ ⲉϩⲣⲁⲓ ⲛϩⲉⲛϭⲓⲛⲣϩⲱⲃ ϩⲱⲥⲧⲉ ⲉⲧⲣⲉⲛϣⲙϣⲉ ⲛⲁϥ ⲛϩⲏⲧⲟⲩ ϩⲓϫⲛ ⲡⲕⲁϩ ⲧⲉⲛⲟⲩ . ⲉⲛϣⲗⲏⲗ . ⲉⲛⲣ ⲛⲏⲥⲧⲉⲓⲁ . ⲉⲛⲛⲁ ⲛⲛϩⲏⲕⲉ . ⲉⲛⲉⲓⲣⲉ ⲙⲡϩⲁⲡ ⲙⲡⲉⲧϩⲏϣ . ⲉⲛⲟ ⲙⲙⲁⲓϣⲙⲙⲟ . ⲉⲛϭⲓⲛⲉ ⲙⲡϣⲓⲛⲉ ⲛⲛⲉⲧϣⲱⲛⲉ . ⲛϩⲟⲩⲟ ⲇⲉ ⲉⲛϥⲓ ⲙⲡⲣⲟⲟⲩϣ ⲛⲛⲉⲧⲉ ⲙⲙⲛⲧⲟⲩ ⲣⲱⲙⲉ ⲙⲙⲁⲩ . ⲉⲛⲧⲃⲃⲟ ⲙⲙⲟⲛ ⲉⲃⲟⲗ ϩⲙ ⲡⲉⲑⲟⲟⲩ ⲛⲓⲙ . ⲉⲛⲁⲅⲱⲛⲓⲍⲉ ϩⲛ ⲡⲉⲧⲛⲁⲛⲟⲩϥ ⲛⲓⲙ . ϫⲉⲕⲁⲥ ⲉⲛⲉϫⲓ ⲙⲡⲉⲛ#ⲙⲧⲟⲛ ϣⲁ ⲉⲛⲉϩ ϩⲛ ⲧⲙⲛⲧⲉⲣⲟ ⲛⲙⲡⲏⲩⲉ .

ⲡⲁⲑⲏⲧ ⲡⲉϣⲁϥϫⲓ ⲟⲩⲁ ⲉⲡⲥⲁⲉⲓⲛ ⲙⲡⲥⲟⲛ ⲉϣⲁϥⲟⲩⲱⲛ ⲉⲧⲉϥⲡⲗⲏⲅⲏ ϩⲙ ⲡⲧⲟⲕ . ⲡⲣⲙⲛϩⲏⲧ ⲇⲉ ϩⲱⲱϥ ⲟⲩⲙⲟⲛⲟⲛ ϫⲉ ϣⲁϥϣⲡ ϩⲙⲟⲧ ⲛⲧⲟⲟⲧϥ . ⲁⲗⲗⲁ ϣⲁϥⲥⲙⲛⲧⲥ ⲟⲛ ⲛⲙⲙⲁϥ ⲉϯ ⲛⲁϥ ⲛϩⲉⲛϩⲟⲙⲛⲧ ⲏ ⲟⲩⲛⲟⲩⲃ ⲙⲛ ϩⲉⲛⲕⲉ ⲧⲁⲉⲓⲟ .

ⲛⲧⲉⲓϩⲉ ⲟⲛ ⲡⲁⲑⲏⲧ ⲡⲉϣⲁϥϫⲓ ⲟⲩⲁ ⲉⲡⲛⲟⲩⲧⲉ ϩⲙ ⲡϩⲓⲥⲉ ⲛⲧⲉⲑⲗⲓⲯⲓⲥ ⲉⲛⲧⲁⲥⲧⲁϩⲟϥ . ⲡⲣⲙⲛϩⲏⲧ ⲇⲉ ϩⲱⲱϥ ⲟⲩⲙⲟⲛⲟⲛ ϫⲉ ϣⲁϥⲉⲩⲭⲁⲣⲓⲥⲧⲉⲓ ⲙⲡⲛⲟⲩⲧⲉ[ #

]ⲉⲡϫⲟⲉⲓⲥ ⲙⲡⲥⲏⲩ ⲉⲧϥⲛⲁⲙ ⲡϩⲓⲥⲉ ⲉϫⲙ ⲡⲕⲁϩ . ⲏ ⲡⲥⲟⲡ ⲉⲧⲛϩⲛ ϩⲉⲛϣⲱⲛⲉ . ⲏ ϩⲉⲛⲡⲉⲓⲣⲁⲥⲙⲟⲥ . ϩ[..]ϣⲏⲣⲉ ϣⲏⲙ [....]ⲡⲱⲧ ⲉ[.....]ⲉⲡⲉⲩⲉⲓ[ⲱⲧ ...]ϩⲟⲧⲁⲛ [......].ⲱϣ ⲉ[.......]ⲉⲃⲓⲱ #

]ⲡⲥⲏⲩ ⲇⲉ ϩⲱⲱϥ ⲙⲡϩⲓⲥⲉ ⲉⲩϣⲁⲛⲉⲓ ⲉϩⲣⲁⲓ ⲉⲩⲙⲛⲧϩⲏⲕⲉ . ⲏ ⲉⲩϣⲱⲛⲉ . ⲏ ⲛⲧⲟϥ ϩⲉⲛⲕⲉ ⲡⲉⲓⲣⲁⲥⲙⲟⲥ . ϣ[ⲁⲩ]ⲕⲁ ⲡⲛⲟⲩⲧⲉ ⲛⲥⲱⲟⲩ ⲛⲥⲉⲡⲱⲧ ⲉⲣⲁⲧⲟⲩ ⲛϩⲉⲛⲣⲉϥⲙⲟⲩⲧⲉ ⲏ ⲛϩⲉⲛⲙⲁⲛϣⲓⲛⲉ ⲏ ⲛⲧⲟϥ ⲉⲁⲩⲕⲟⲧⲟⲩ ⲉϩⲉⲛⲕⲉ ϩⲃⲏⲩⲉ ⲙⲙⲛⲧⲣⲉϥⲣϩⲁⲗ .

ⲛⲑⲉ ⲉⲛⲧⲁⲓⲛⲁⲩ ⲁⲛⲟⲕ ⲉⲧⲁⲡⲉ ⲙⲡϩⲟϥ ⲉⲥⲙⲏⲣ ⲉϩⲟⲩⲛ ⲉⲧϭⲓϫ ⲛϩⲟⲉⲓⲛⲉ . ⲕⲉ ⲟⲩⲁ ⲇⲉ ⲉⲣⲉ ⲧⲛⲁϫⲉ ⲙⲡⲉⲙⲥⲁϩ ⲙⲏⲣ ⲉϩⲟⲩⲛ ⲉⲛⲉϥ#ϭⲃⲟⲉⲓ . ⲕⲉ ⲟⲩⲁ ⲉⲣⲉ ϩⲉⲛⲓⲉⲓⲃ ⲛⲃⲁϣⲟⲣ ⲙⲏⲣ ⲉϩⲟⲩⲛ ⲉⲛⲉϥⲟⲩⲉⲣⲏⲧⲉ .

ⲙⲁⲗⲓⲥⲧⲁ ⲟⲩⲁⲣⲭⲱⲛ ⲡⲉ ⲉϥϫⲱ ⲙⲙⲟⲥ ⲉⲣⲟϥ ϫⲉ ⲟⲩⲥⲟⲫⲟⲥ ⲡⲉ . ⲕⲁⲓⲅⲁⲣ ⲛⲧⲉⲣⲓϫⲡⲓⲟϥ ϫⲉ (ⲉ)ⲛⲉ ⲛⲓⲉⲓⲃ ⲛⲃⲁϣⲟⲣ ⲛⲉⲧⲛⲁⲧⲁⲗϭⲟⲕ . ⲡⲉϫⲁϥ ϫⲉ ⲟⲩⲛⲟϭ ⲛⲣⲱⲙⲉ ⲙⲙⲟⲛⲁⲭⲟⲥ ⲡⲉⲛⲧⲁϥⲧⲁⲁⲩ ⲛⲁⲓ ϫⲉ ⲙⲟⲣⲟⲩ ⲙⲙⲟⲕ ⲕⲛⲁⲙⲧⲟⲛ .

ⲥⲱⲧⲙ ⲉⲛⲉⲓⲙⲛⲧⲁⲥⲉⲃⲏⲥ . ϩⲉⲛⲓⲉⲓⲃ ⲛⲃⲁϣⲟⲣ ϩⲉⲛⲁⲡⲉ ⲛϩⲟϥ ϩⲉⲛⲛⲁⲁϫⲉ ⲛⲙⲥⲁϩ ⲙⲛ ϩⲉⲛⲕⲉ ⲡⲉⲧϣⲟⲩⲉⲓⲧ # ⲉⲛⲁϣⲱⲟⲩ ⲛⲧ{ⲁ} ⲛⲣⲱⲙⲉ ⲕⲁ ϩⲧⲏⲩ ⲉⲣⲟⲟⲩ ϫⲉ ⲉⲩⲛⲁⲙⲧⲟⲛ ⲉⲧⲃⲏⲏⲧⲟⲩ ϩⲙ ⲡⲧⲣⲉ ϩⲉⲛⲕⲟⲟⲩⲉ ⲁⲡⲁⲧⲁ ⲙⲙⲟⲟⲩ .

ⲧⲁⲓ ⲟⲛ ⲧⲉ ⲑⲉ ⲉϣⲁⲩⲧⲁϩⲥⲟⲩ ⲛⲟⲩⲛⲉϩ . ⲏ ⲉϣⲁⲩⲡⲱϩⲧ ⲉϫⲱⲟⲩ ⲛⲟⲩⲙⲟⲟⲩ ϩⲙ ⲡⲧⲣⲉⲩϫⲓⲧⲟⲩ ⲛⲧⲟⲟⲧⲟⲩ ⲛϩⲉⲛⲣⲉϥⲙⲟⲩⲧⲉ ⲏ ϩⲉⲛⲣⲉϥⲣⲡⲁϩⲣⲉ . ⲙⲛ ⲙⲧⲟⲛ ⲛⲓⲙ ⲉⲧⲡⲗⲁⲛⲁ ⲙⲙⲟⲟⲩ . ⲙⲛⲛⲥⲁ ⲧⲣⲉⲩϫⲱ ⲛⲧϩ.... . ⲡⲁⲗⲓⲛ ⲟⲛ ⲛⲉϣⲁⲩⲡⲱϩⲧ ⲉϫⲱⲟⲩ ⲛⲟⲩⲙⲟⲟⲩ . ⲏ ⲛⲉϣⲁⲩⲧⲁϩⲥⲟⲩ ⲛⲟⲩⲛⲉϩ ⲉⲃⲟⲗ ϩⲓⲧⲛ ⲛⲉⲡⲣⲉⲥⲃⲩ#ⲧⲉⲣⲟⲥ ⲛⲧⲉⲕⲕⲗⲏⲥⲓⲁ . ⲏ ⲛⲧⲟϥ ϩⲉⲛⲙⲟⲛⲁⲭⲟⲥ .

ⲉⲧⲃⲉ ⲟⲩ ⲁⲡⲉⲡⲣⲟⲫⲏⲧⲏⲥ ϩⲏⲗⲓⲁⲥ ϫⲡⲓⲉ ⲡⲓⲥⲣⲁⲏⲗ ⲙⲡⲓⲟⲩⲟⲉⲓϣ ϫⲉ ϣⲁ ⲧⲛⲁⲩ ⲧⲉⲧⲛϫⲟⲩϩⲉ ϩⲓ ⲧⲉⲧⲛⲟⲩⲉⲣⲏⲧⲉ ⲥⲛⲧⲉ . ⲉϣϫⲉ ϥϣⲟⲟⲡ ⲛϭⲓ ⲡϫⲟⲉⲓⲥ ⲡⲛⲟⲩⲧⲉ . ⲉⲓⲥ ⲃⲱⲕ ⲛⲧⲉⲧⲛⲟⲩⲉϩ ⲧⲏⲩⲧⲛ ⲛⲥⲱϥ . ⲉϣϫⲉ ⲡⲃⲁϩⲁⲗ ⲇⲉ ⲡⲉⲧϣⲟⲟⲡ ⲉⲓⲉ ⲃⲱⲕ ⲟⲩⲉϩ ⲧⲏⲩⲧⲛ ⲛⲥⲱϥ .

ⲛⲧⲉⲓϩⲉ ⲟⲛ ⲛⲉⲧⲉⲓⲣⲉ ⲛⲛⲁⲓ ⲏ ⲛⲉⲧⲕⲱ ⲛϩⲧⲏⲩ ⲉⲛⲁⲓ . ϣⲁⲛⲧⲉ ⲟⲩ ϣⲱⲡⲉ ⲧⲉⲧⲛϫⲟⲩϩⲉ ϩⲓ ⲧⲉⲧⲛⲟⲩⲉⲣⲏ#ⲧⲉ ⲥⲛⲧⲉ . ⲉϣϫⲉ ⲙⲙⲁⲛϣⲓⲛⲉ ⲛⲛⲇⲁⲓⲙⲱⲛ ⲛⲉⲧⲣ ϣⲁⲩ ⲛⲏⲧⲛ ⲙⲛ ⲛⲣⲉϥⲙⲟⲩⲧⲉ ⲙⲛ ⲛⲣⲉϥⲣⲡⲁϩⲣⲉ . ⲙⲛ ⲛⲕⲟⲟⲩⲉ ⲧⲏⲣⲟⲩ ⲛⲧⲉⲓϩⲉ ⲉⲧⲣ ϩⲱⲃ ⲉⲧⲁⲛⲟⲙⲓⲁ . ⲉⲓⲉ ⲃⲱⲕ ⲛⲏⲧⲛ ⲉⲣⲁⲧⲟⲩ ϫⲉⲕⲁⲥ ⲉⲧⲉⲧⲛⲁϫⲓ ⲛⲟⲩⲥⲁϩⲟⲩ ϩⲓϫⲙ ⲡⲕⲁϩ . ⲁⲩⲱ ⲟⲩⲕⲟⲗⲁⲥⲓⲥ ϣⲁ ⲉⲛⲉϩ ϩⲙ ⲡⲉϩⲟⲟⲩ ⲛⲧⲉⲕⲣⲓⲥⲓⲥ .

ⲉϣϫⲉ ⲡⲏⲓ ⲇⲉ ⲙⲡⲛⲟⲩⲧⲉ ⲡⲉⲧⲣ ϣⲁⲩ ⲛⲏⲧⲛ ⲧⲉⲕⲕⲗⲏⲥⲓⲁ . ⲉⲓⲉ ⲃⲱⲕ ⲛⲏⲧⲛ ⲉⲙⲁⲩ . ⲛⲉⲧⲡⲓⲥⲧⲉⲩⲉ ⲅⲁⲣ ⲉⲧⲣⲉ ⲛⲉ[ #

]ⲡⲉϫⲁϥ [ⲅⲁⲣ ϫⲉ ⲙ]ⲡⲏⲩⲉ ϫ[ⲱ ⲙⲡⲉⲟⲟⲩ] ⲙⲡⲛⲟⲩⲧⲉ ⲁⲩⲱ ⲡⲉⲥⲧⲉⲣⲉⲱⲙⲁ ϫⲱ ⲙⲡⲧⲁⲙⲓⲟ ⲛⲛⲉϥϭⲓϫ . ⲙⲡⲟⲩϫⲟⲟⲥ ϫⲉ ⲛⲕⲟⲥⲙⲟⲥ .

ⲥⲱⲧⲙ ⲟⲛ ϫⲉ ⲧⲙⲛⲧⲉⲣⲟ ⲛⲙⲡⲏⲩⲉ ⲁⲩⲱ ⲟⲛ ϫⲉ ϯⲛⲁϯ ⲛⲁⲕ ⲛⲛϣⲟϣⲧ ⲛⲧⲙⲛⲧⲉⲣⲟ ⲛⲙⲡⲏⲩⲉ . ⲙⲡⲟⲩϫⲟⲟⲥ ϫⲉ ⲧⲙⲛⲧⲉⲣⲟ ⲛⲛⲕⲟⲥⲙⲟⲥ . ⲁⲩⲱ ⲙⲛ ⲕⲉ ⲧⲟⲡⲟⲥ ⲉⲩϯ ⲣⲁⲛ ⲉⲣⲟϥ ϩⲛ ⲧⲉⲅⲣⲁⲫⲏ ⲛⲥⲁ ⲡⲁⲓ ⲙⲁⲩⲁⲁϥ . ⲁⲩⲱ ⲉⲣⲉ ⲛⲓⲁⲧⲥⲃⲱ ⲛⲟⲉⲓ ⲧⲱⲛ ϫⲉ ⲟⲩⲛ ⲕⲉ ⲕⲟⲥⲙⲟⲥ ϣⲟⲟⲡ . ⲉϫⲟⲟⲥ ⲇⲉ ϫⲉ ⲛⲁϣⲱⲟⲩ ⲛϭⲓ ⲙⲙⲁⲛⲙⲧⲟⲛ ⲉⲧϩⲛ ⲧⲙⲛⲧⲉⲣⲟ ⲛⲙⲡⲏⲩⲉ . ⲡϩⲱⲃ ⲟⲩⲟⲛϩ ⲉⲃⲟⲗ . ⲉⲣⲉ ⲡⲏⲓ ⲙⲡⲓⲱⲧ # [ϣⲟⲟⲡ] ⲧⲱⲛ [..] ϩⲛ ⲧⲡⲉ ⲛⲧⲡⲉ ⲁⲩⲱ ⲙⲡⲏⲩⲉ ⲛⲙⲡⲏⲩⲉ . ⲁⲩⲱ ⲉϥϩⲛ ϩⲉⲛⲕⲟⲥⲙⲟⲥ ⲁⲛ .

ⲧⲉⲧⲛⲛⲁⲩ ϫⲉ ⲛϣϣⲉ ⲁⲛ ⲉⲡⲧⲏⲣϥ ⲉⲡⲣⲟⲥⲉⲭⲉ ⲉϣⲁϫⲉ ⲛϫⲱⲱⲙⲉ ⲛⲁⲡⲟⲕⲣⲩⲫⲟⲛ . ⲛⲑⲉ ⲇⲉ ⲛⲧⲁⲛⲥⲁϩϥ ϩⲛ ⲕⲉ ⲙⲁ ⲉⲛϯ ⲟⲩⲃⲉ ⲧⲉⲡⲗⲁⲛⲏ ⲛⲛⲉⲧϫⲱ ⲙⲙⲟⲥ ϫⲉ ⲟⲩⲛ ⲕⲉ ⲕⲟⲥⲙⲟⲥ ϩⲁⲣⲟϥ ⲙⲡⲁⲓ .

ⲉⲡⲉⲓⲇⲏ ⲁⲩⲥⲱⲧⲙ ϫⲉ ⲛⲉⲧϩⲁ ⲡⲉⲥⲏⲧ ⲙⲡⲕⲁϩ . ⲙⲡⲟⲩⲉⲓⲙⲉ ϫⲉ ⲉϥϣⲁϫⲉ ⲉⲛⲉⲧⲙⲟⲟⲩⲧ ⲉⲧⲛⲁⲉⲓ ⲉⲃⲟⲗ ϩⲛ ⲛⲉⲩⲧⲁⲫⲟⲥ . ⲁⲩⲱ ⲛⲉⲧⲧⲟⲙⲥ ϩⲙ ⲙⲁ ⲛⲓⲙ ϩⲙ ⲡⲕⲁϩ ⲧⲏⲣϥ ϫⲉ ⲥⲉⲛⲁⲧⲱⲟⲩⲛ ⲛⲥⲉⲉⲝⲟⲙⲟⲗⲟⲅⲉⲓ # ⲙⲡⲛⲟⲩⲧⲉ .

ⲉϣϫⲉ ⲟⲩⲛ ⲕⲉ ⲕⲟⲥⲙⲟⲥ ⲙⲡϩⲣⲉ ⲙⲡⲁⲓ . ⲉⲓⲉ ϥⲟ ⲛⲕⲁⲕⲉ . ⲉⲃⲟⲗ ϫⲉ ϥⲥⲏϩ ⲁⲛ ϫⲉ ⲡⲉⲛⲧⲁϥⲧⲁⲙⲓⲉ ϩⲉⲛⲣⲏ ⲁⲩⲱ ϩⲉⲛⲟⲟϩ ϫⲉ ⲥⲉⲣ ⲟⲩⲟⲉⲓⲛ ⲉⲣⲟϥ . ⲁⲗⲗⲁ ⲟⲩⲣⲏ ⲙⲛ ⲟⲩⲟⲟϩ ⲛⲉⲛⲧⲁϥⲧⲁⲙⲓⲟⲟⲩ ⲛⲑⲉ ⲉⲧⲥⲏϩ ϫⲉ ⲁⲡⲛⲟⲩⲧⲉ ⲧⲁⲙⲓⲟ ⲙⲡⲛⲟϭ ⲥⲛⲁⲩ ⲛⲣⲉϥⲣⲟⲩⲟⲉⲓⲛ . ⲉⲧⲉ ⲛⲉⲧⲛⲛⲁⲩ ⲉⲣⲟⲟⲩ ⲙⲁⲩⲁⲁⲩ ⲛⲉ . ⲡⲣⲏ ⲉⲧⲉⲝⲟⲩⲥⲓⲁ ⲙⲡⲉϩⲟⲟⲩ ⲁⲩⲱ ⲡⲟⲟϩ ⲙⲛ ⲛⲥⲓⲟⲩ ⲉⲧⲉⲝⲟⲩⲥⲓⲁ ⲛⲧⲉⲩϣⲏ .

ⲧⲉⲧⲛⲛⲁⲩ ϫⲉ ⲥⲉⲡⲗⲁⲛⲁ ⲛϭⲓ ⲛⲉⲧⲥϩⲁⲓ ⲛⲛⲓϣⲁϫⲉ ⲛⲧⲉⲓⲙⲓⲛⲉ . ⲉⲩⲣ ⲡⲕⲉ ⲧⲱϭⲉ ⲙⲙⲟⲟⲩ ⲛⲥⲁ ⲛⲉⲧⲟⲩⲁⲁⲃ ϫⲉ ⲛⲧⲟⲟⲩ # ⲁⲩϫⲟⲟⲥ ⲛⲁⲛ .

ⲏ ⲛⲓⲙ ⲡⲉⲧⲛⲁϫⲟⲟⲥ ϫⲉ ⲟⲩⲛ ⲕⲉ ⲉⲩⲁⲅⲅⲉⲗⲓⲟⲛ ϣⲟⲟⲡ ⲙⲡⲃⲟⲗ ⲙⲡⲉϥⲧⲟⲟⲩ ⲛⲉⲩⲁⲅⲅⲉⲗⲓⲟⲛ ⲛⲧⲉⲧⲙ ⲧⲉⲕⲕⲗⲏⲥⲓⲁ ⲥⲧⲟϥ ⲉⲃⲟⲗ ϩⲱⲥ ϩⲁⲓⲣⲉⲧⲓⲕⲟⲥ . ⲛϥϫⲱ ⲙⲙⲟⲥ ⲁⲛ ϫⲉ ⲙⲛ ⲕⲉ ⲟⲩⲁ ϣⲟⲟⲡ . ⲉⲓⲙⲏⲧⲉⲓ ϫⲉ ⲟⲩⲛ ϩⲟⲉⲓⲛⲉ ϣⲧⲟⲣⲧⲣ ⲙⲙⲱⲧⲛ ⲉⲩⲟⲩⲱϣ ⲉⲡⲉⲛⲉ ⲡⲉⲩⲁⲅⲅⲉⲗⲓⲟⲛ ⲙⲡⲉⲭⲣⲓⲥⲧⲟⲥ .

ⲉϣϫⲉ ϥϫⲱ ⲙⲙⲟⲥ ϫⲉ ⲁⲗⲗⲁ ⲕⲁⲛ ⲁⲛⲟⲛ ⲏ ⲟⲩⲁⲅⲅⲉⲗⲟⲥ ⲉⲃⲟⲗ ϩⲛ ⲧⲡⲉ ⲛϥⲧⲁϣⲉⲟⲉⲓϣ ⲛⲏⲧⲛ ⲡⲃⲟⲗ ⲙⲡⲉⲛⲧⲁⲛⲧⲁϣⲉⲟⲉⲓϣ ⲙⲙⲟϥ ⲛⲏⲧⲛ ⲙⲁⲣⲉϥϣⲱⲡⲉ ⲉϥⲃⲏⲧ . ⲛⲧⲛϫⲓ ⲇⲉ ϩⲱⲱⲛ # ⲛϩⲉⲛϫⲱⲱⲙⲉ ⲛⲁⲡⲟⲕⲣⲩⲫⲟⲛ (ⲉ)ⲛⲧⲛⲥⲟⲟⲩ(ⲛ) ⲁⲛ ϫⲉ ⲛⲁ ⲛⲓⲙ ⲛⲉ . ⲉⲧⲃⲉ ⲟⲩ ⲙⲡⲉ ⲛⲓⲟⲧⲉ ⲧⲏⲣⲟⲩ ⲉⲧⲟⲩⲁⲁⲃ . ⲛϩⲟⲩⲟ ⲇⲉ ⲡⲉⲛⲓⲱⲧ ⲁⲡⲁ ⲁⲑⲁⲛⲁⲥⲓⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲡⲁ ⲡⲥⲟⲟⲩⲛ ⲙⲙⲉ ϫⲓⲧⲟⲩ . ⲁⲗⲗⲁ ⲛⲧⲁϥⲥⲧⲟⲟⲩ ⲉⲃⲟⲗ ⲛϩⲟⲩⲟ .

ⲁⲩⲱ ⲟⲩ ⲡⲉ ϫⲉ ⲡⲉⲩⲁⲅⲅⲉⲗⲓⲟⲛ ⲛⲓⲏⲥⲟⲩⲥ ⲡϣⲏⲣⲉ ⲙⲡⲛⲟⲩⲧⲉ ⲡⲉϫⲡⲟ ⲉⲃⲟⲗ ϩⲛ ⲛⲁⲅⲅⲉⲗⲟⲥ . ⲟⲩⲕⲟⲩⲛ ⲟⲩⲁ ⲡⲉ ⲛⲑⲉ ⲛⲛⲁⲅⲅⲉⲗⲟⲥ ⲉⲩϫⲓ ⲟⲩⲁ ⲉⲩϣⲱϣ ⲙⲡⲣⲉϥⲧⲁⲙⲓⲟ ⲙⲛ ⲛⲉⲛⲧⲁϥⲧⲁⲙⲓⲟⲟⲩ . ⲛⲓⲙ ⲡⲉⲛⲧⲁϥⲧⲁⲙⲓⲟⲟⲩ ⲛⲁⲅⲅⲉⲗⲟⲥ ⲙⲡⲛⲉⲩⲙⲁ ⲁⲩⲱ ⲛⲉϥⲗⲓⲧⲟⲩⲣⲅⲟⲥ ⲛϣⲁϩ ⲛⲥⲁⲧⲉ . ⲙⲏ ⲛⲧⲟϥ ⲁⲛ ⲡⲉ ⲁⲩⲱ ⲡⲉϥⲓⲱⲧ .

ⲙⲉϣⲁⲕ ⲣⲱ ⲛⲧⲁ # ⲛⲉⲛⲧⲁⲩⲣ ⲁⲥⲉⲃⲏⲥ ⲧⲏⲣⲟⲩ ϩⲉ ⲉⲃⲟⲗ ϩⲓⲧⲛ ⲛⲉⲓϣⲁϫⲉ ⲉⲩϫⲱ ⲙⲙⲟⲥ ϫⲉ ⲟⲩⲁ ϩⲱⲱϥ ⲡⲉ ⲛⲑⲉ ⲛⲛⲥⲱⲛⲧ . ⲏ ⲟⲩⲧⲁⲙⲓⲟ ⲡⲉ ⲡϣⲏⲣⲉ ⲙⲡⲛⲟⲩⲧⲉ . ⲏ ⲕⲉ ⲕⲟⲩⲓ ⲁⲛ ⲡⲉ ⲛⲥⲉⲕⲣⲓⲛⲉ ⲙⲙⲟⲛ ϩⲓⲧⲛ ⲛⲉⲓϣⲁϫⲉ ϫⲉ ⲉϣϫⲉ ⲡⲉⲧⲛⲏⲩ ⲅⲁⲣ ⲛⲁⲧⲁϣⲉⲟⲉⲓϣ ⲛⲏⲧⲛ ⲛⲕⲉ ⲓⲏⲥⲟⲩⲥ ⲙⲡⲉⲛⲧⲁⲛⲧⲁϣⲉⲟⲉⲓϣ ⲙⲙⲟϥ ⲏ ⲧⲉⲧⲛⲁϫⲓ ⲛⲕⲉ ⲡⲛⲉⲩⲙⲁ (ⲉ)ⲙⲡⲉⲧⲛϫⲓⲧϥ ⲏ ⲕⲉ ⲉⲩⲁⲅⲅⲉⲗⲓⲟⲛ (ⲉ)ⲙⲡⲉⲧⲛϣⲟⲡϥ ⲉⲣⲱⲧⲛ .

ⲛⲧⲁ ⲛⲁⲡⲟⲥⲧⲟⲗⲟⲥ ϣⲱⲱⲧ ⲛⲟⲩ ⲁⲩⲱ ⲛⲉⲡⲣⲟⲫⲏⲧⲏⲥ ⲙⲛ ⲛⲉⲧⲟⲩⲁⲁⲃ ⲧⲏⲣⲟⲩ . ⲟⲩ ⲡⲉⲧϩⲛ # ⲛⲉⲅⲣⲁⲫⲏ ⲁⲛ ϩⲓⲧⲙ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲉⲧϣⲁϫⲉ ⲛϩⲏⲧⲟⲩ . ϫⲉ ⲉⲛⲛⲁⲡⲱϩⲧ ⲉⲃⲟⲗ ϩⲏⲧⲟⲩ ⲛϩⲉⲛⲁⲡⲟⲕⲣⲩⲫⲟⲛ .

ⲏ ⲛⲧⲉⲧⲛⲛⲁⲩ ⲁⲛ ϫⲉ ϩⲉⲛϩⲱⲃ ⲛⲇⲁⲓⲙⲱⲛⲓⲟⲛ ⲛⲉ . ϩⲉⲛϣⲁϫⲉ ⲛⲉ ⲛⲁⲓ ⲛⲧⲁ ϩⲉⲛⲣⲱⲙⲉ ϫⲟⲟⲩ ϫⲉ ⲁⲡⲓⲱⲧ ⲕⲩⲣⲓⲥⲥⲉ ⲙⲡⲡⲁⲥⲭⲁ ϩⲛ ⲙⲡⲏⲩⲉ . ⲁⲩⲱ ϩⲛ ⲛⲕⲟⲥⲙⲟⲥ ⲧⲏⲣⲟⲩ ⲉⲧⲣⲉⲩⲉⲓⲣⲉ ⲙⲡⲡⲁⲥⲭⲁ ⲛⲥⲟⲟⲩ ⲛϩⲟⲟⲩ . ⲉⲩϣⲁϫⲉ ⲉⲡⲡⲁⲥⲭⲁ ⲉⲧⲛⲉⲓⲣⲉ ⲙⲙⲟϥ ϩⲓϫⲙ ⲡⲕⲁϩ . ⲁⲩⲱ ⲉⲩⲉⲓⲛⲉ ⲟⲛ ⲙⲙⲟϥ ⲉϫⲙ ⲡϫⲱⲕ ⲉⲃⲟⲗ ⲛⲛⲉⲛⲧⲁ ⲡⲛⲟⲩⲧⲉ # ⲧⲁⲙⲓⲟ ⲙⲡⲥⲱⲛⲧ ⲧⲏⲣϥ ⲛϩⲏⲧⲟⲩ ϫⲉ ⲉⲩϣⲁⲛⲡⲱϩ ⲉⲡⲉⲓϩⲟⲟⲩ ⲧⲉⲣⲟⲙⲡⲉ ⲥⲉⲉⲓⲣⲉ ⲙⲙⲟϥ ⲛϭⲓ ⲡⲓⲱⲧ ⲁⲩⲱ ⲛⲁⲅⲅⲉⲗⲟⲥ ⲙⲛ ⲛⲉⲡⲛⲉⲩⲙⲁ .

ⲙⲏ ⲟⲩⲛ ϭⲉ ϩⲟⲩⲉ ⲟⲩⲁ ⲛⲥⲁ ϫⲟⲟⲥ ϫⲉ ⲡⲛⲟⲩⲧⲉ ⲉⲓⲣⲉ ⲛⲟⲩⲡⲁⲥⲭⲁ ⲏ ϥϣⲱⲡ ⲛⲟⲩϩⲓⲥⲉ . ⲁⲩⲱ ⲙⲉⲭⲣⲓ ⲡⲕⲉ ⲙⲛⲧⲥⲛⲟⲟⲩⲥ ⲛⲕⲟⲥⲙⲟⲥ ⲥⲉⲉⲓⲣⲉ ϩⲱⲟⲩ ⲙⲙⲟϥ ⲙⲡⲉⲓⲥⲏⲩ ⲧⲉⲣⲟⲙⲡⲉ ⲁⲩⲱ ϫⲉ ⲥⲉⲛⲁϭⲱ ⲉⲩⲉⲓⲣⲉ ⲙⲙⲟϥ ϣⲁⲛⲧⲉϥⲉⲓⲛⲉ ⲛϭⲓ ⲡⲕⲟⲥⲙⲟⲥ . ⲉⲡⲉⲓⲇⲏ ⲛⲧⲁϥϣⲱⲡⲉ ⲣⲱ ⲉⲧⲃⲏⲏⲧϥ ⲙⲛ ⲡⲉⲙⲕⲁϩⲛϩⲏⲧ .

ⲙⲏ ⲟⲩⲛ ϩⲉⲛⲕⲉ ⲕⲟⲥⲙⲟⲥ ⲉⲩⲉⲓⲣⲉ # ⲙⲡⲡⲁⲥⲭⲁ ⲛϩⲏⲧⲟⲩ ⲛⲥⲁ ⲡⲁⲓ ⲙⲁⲩⲁⲁϥ . ⲁⲓϫⲟⲟⲥ ⲛⲕⲉ ⲥⲟⲡ ϫⲉ ⲉⲛⲉ ⲛⲉⲓϣⲁϫⲉ ϩⲙ ⲡⲕⲁϩ ⲧⲏⲣϥ ⲁⲛ ⲛⲉⲓⲛⲁϫⲟⲟⲩ ⲁⲛ ϫⲉ ⲛⲛⲉ ⲣⲱⲙⲉ ⲥⲱⲧⲙ ⲉⲣⲟⲟⲩ .

ⲛⲧⲁ ⲡϫⲟⲉⲓⲥ ⲅⲁⲣ ⲉⲣ ⲡⲡⲁⲥⲭⲁ ⲛⲁϣ ⲛⲟⲩⲟⲉⲓϣ ⲉⲓⲙⲏⲧⲉⲓ ϩⲙ ⲡⲕⲁⲓⲣⲟⲥ ⲙⲙⲁⲧⲉ ⲛⲧⲁϥⲣ ⲣⲱⲙⲉ ⲙⲛ (ⲛ)ⲣⲱⲙⲉ . ⲉⲁϥϣⲡ ϩⲓⲥⲉ ϩⲁⲣⲟⲛ ⲁⲩⲱ ⲁϥⲛⲏⲥⲧⲉⲩⲉ ⲁϥϣⲗⲏⲗ . ⲁϥϣⲱⲡⲉ ⲉϥϫⲟⲛⲧ ϩⲛ ϩⲱⲃ ⲛⲓⲙ ⲛⲧⲉⲛϩⲉ ϣⲁⲧⲛ ⲛⲟⲃⲉ .

ⲡⲉⲧⲛⲁϫⲟⲟⲥ ϫⲉ ⲁⲡⲛⲟⲩⲧⲉ ⲡⲣⲣⲟ ⲡⲡⲁⲛⲧⲟⲕⲣⲁⲧⲱⲣ ϣⲡ ⲟⲩϩⲓⲥⲉ ⲏ ϫⲉ ⲁϥⲣ ⲟⲩⲡⲁⲥ#ⲭⲁ ⲟ ⲛⲁⲧⲥⲟⲟⲩⲛ ⲉⲛϣⲁϫⲉ ⲛϯⲥⲙⲏ ϫⲉ ⲡⲛⲟⲩⲧⲉ ⲛϣⲁ ⲉⲛⲉϩ ⲛϥⲛⲁϩⲕⲟ ⲁⲛ ⲟⲩⲇⲉ ⲛϥⲛⲁϩⲓⲥⲉ ⲁⲛ ⲁⲗⲗⲁ ⲛⲧⲟϥ ⲡⲉⲧϯ ⲛⲧϭⲟⲙ ⲛⲛⲉⲧϩⲕⲁⲉⲓⲧ ⲁⲩⲱ ⲉⲧϯ ⲙⲧⲟⲛ ⲛⲛⲉⲧϣⲡ ϩⲓⲥⲉ ⲉⲧⲃⲏⲏⲧϥ .

ⲉⲧⲃⲉ ⲡⲁⲓ ⲡⲉⲧϫⲱ ⲙⲙⲟⲥ ϫⲉ ⲉⲓⲛⲟⲉⲓ ⲉⲃⲟⲗ ϫⲉ ϥⲱϣ ⲛϩⲉⲛⲁⲡⲟⲕⲣⲩⲫⲟⲛ ⲟⲩϩⲟⲩⲉ ⲁⲧⲥⲃⲱ ⲡⲉ . ⲁⲩⲱ ⲡⲉⲧⲙⲉⲉⲩⲉ ⲉⲣⲟϥ ϫⲉ ⲟⲩⲣⲉϥϯⲥⲃⲱ ⲡⲉ ⲉϥϫⲓ ⲛϩⲉⲛⲁⲡⲟⲕⲣⲩⲫⲟⲛ ⲟⲩⲁⲧⲥⲃⲱ ⲛϩⲟⲩⲟ ⲡⲉ .

ϩⲓⲧⲙ ⲡⲥⲟⲟⲩⲛ ⲅⲁⲣ ⲉⲧϩⲧⲙⲧⲟⲙⲧ # ⲁⲩⲱ ⲡⲉⲓϣⲟϫⲛⲉ ⲙⲛⲡⲉⲓⲙⲉⲉⲩⲉ ⲛⲧⲁ ⲛϩⲉⲣⲉⲧⲓⲕⲟⲥ ⲛⲓⲙ ⲥⲱⲣⲙ . ⲛⲍⲱⲟⲛ ⲅⲁⲣ ⲧⲏⲣⲟⲩ ⲉⲧϩⲙ ⲡⲕⲁⲕⲉ ϣⲁϩⲣⲁⲓ ⲉⲟⲩⲉⲗⲁⲭⲓⲥⲧⲟⲛ ⲁⲛⲁⲅⲕⲏ ϥⲧⲙⲁⲉⲓⲏⲩ ⲛⲛⲁϩⲣⲁⲩ ⲡⲁⲣⲁ ⲡⲟⲩⲟⲉⲓⲛ . ⲧⲁⲓ ⲧⲉ ⲑⲉ ⲛⲛⲉⲧⲕⲱ ⲛϩⲧⲏⲩ ⲉϩⲉⲛⲁⲡⲟⲕⲣⲩⲫⲟⲛ ⲉⲩⲗⲟⲃⲉ ⲛⲥⲁ ⲱϣ ⲛϩⲏⲧⲟⲩ ⲡⲁⲣⲁ ⲛⲉⲅⲣⲁⲫⲏ ⲙⲙⲉ ⲁⲩⲱ ⲙⲡⲏⲅⲏ ⲙⲡⲱⲛϩ .

ⲕⲁⲓⲅⲁⲣ ⲁϥϫⲟⲟⲥ ϩⲛ ⲛⲉϥⲥϩⲁⲓ ⲛϭⲓ ⲡⲉϩⲟⲩⲉ ⲥⲁϩ ⲛⲧⲡⲓⲥⲧⲓⲥ ⲁⲡⲁ ⲁⲑⲁⲛⲁⲥⲓⲟⲥ ϫⲉ ⲛⲧⲁⲓⲥⲉϩ ⲛⲁⲓ ⲉⲧⲃⲉ ⲛϩⲁⲓⲣⲉⲥⲓⲥ ⲛϩⲟⲩⲟ ⲇⲉ ⲛⲧⲁ#ⲗⲁⲓⲡⲱⲣⲟⲥ ⲙⲙⲉⲗⲓⲧⲓⲁⲛⲟⲥ ⲉⲩϣⲟⲩϣⲟⲩ ⲙⲙⲟⲟⲩ ⲉϫⲛ ⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉ ⲁⲡⲟⲕⲣⲩⲫⲟⲛ.

ϫⲓⲛ ⲧⲁⲣⲭⲏ ⲅⲁⲣ ⲛⲧⲁ ⲡϫⲟⲉⲓⲥ ⲡⲛⲟⲩⲧⲉ ⲧⲁⲙⲉⲓⲉ ⲡⲣⲱⲙⲉ ⲟⲩⲛⲧⲉ ⲡⲇⲓⲁⲃⲟⲗⲟⲥ ϯ ϩⲟⲩⲉ ϭⲟⲣϭⲥ ⲙⲙⲁⲩ . ϩⲱⲥⲧⲉ ⲉⲧⲣⲉϥⲣ ⲥⲟⲟⲩⲛ ⲛⲕⲁⲕⲉ ⲛⲟⲩⲟⲉⲓⲛ ⲛⲛⲁϩⲣⲉⲛ ⲛⲉⲧϣⲁϫⲉ ⲛϩⲏⲧⲟⲩ ⲁⲩⲱ ⲛϥⲧⲣⲉⲩⲉⲡ ⲡⲥⲟⲟⲩⲛ ⲛⲟⲩⲟⲉⲓⲛ ⲙⲙⲉ ⲛⲕⲁⲕⲉ ⲛⲛⲁϩⲣⲁⲩ .

ⲉϣⲁϥϭⲱⲣϭ ⲇⲉ ϩⲛ ⲛⲓⲙ . ⲛⲉϣⲁϥⲣ ⲛⲓⲙ ⲛϭⲟⲣϭⲥ ⲉⲟⲩⲙⲏⲏϣⲉ . ⲉϣⲁϥϭⲱⲣϭ ϩⲛ ⲛⲉⲧϫⲱ ⲙⲙⲟⲥ ⲉⲣⲟⲟⲩ ϫⲉ ⲁⲛⲟⲛ ϩⲉⲛⲥⲁϩ . ⲉϣⲁϥⲣ # ⲛⲉⲧⲕⲱ ⲛϩⲧⲏⲩ ⲉⲟⲩⲥϩⲁⲓ ⲛϭⲟⲣϭⲥ ϣⲁⲛⲧⲉ ϩⲁϩ ϫⲱⲗϫ .

ⲧⲁⲓ ⲧⲉ ⲑⲉ ⲛⲧⲁ ϩⲁⲓⲣⲉⲧⲓⲕⲟⲥ ⲛⲓⲙ ⲣ ⲕⲁⲕⲉ ⲉⲧⲃⲉ ⲛⲉⲩⲁⲡⲏⲩⲉ ⲛⲁⲣⲭⲁⲓⲟⲥ ⲁⲩⲱ ⲟⲛ ⲧⲉⲛⲟⲩ . ⲁⲩⲱ ⲉⲣϣⲁⲛ ϩⲉⲛⲁⲧⲛⲟⲉⲓ ⲉⲓ ⲉⲡⲉⲩⲙⲁ ⲕⲁⲧⲁ ⲕⲁⲓⲣⲟⲥ ϣⲁⲩϫⲱⲗϫ ⲁⲩⲱ ⲛⲥⲉϭⲗⲟⲙⲗⲙ ϩⲙ ⲡⲉⲩⲥⲟⲟⲩⲛ ⲛϭⲟⲥⲙ ⲙⲛ ⲧⲉⲩⲡⲓⲥⲧⲓⲥ ⲉⲧⲥⲟⲟϥ .

ⲛⲓⲙ ⲇⲉ ⲛⲉⲧⲟⲩⲱϣϥ ⲛⲛⲉϩⲛⲁⲁⲩ ⲛϭⲱⲣϭ ⲛⲛⲉⲧⲙⲙⲁⲩ ⲁⲩⲱ ⲉⲧⲥⲱⲗⲡ ⲛⲛⲉⲩⲥⲛⲁⲩϩ . ⲛⲥⲁϩ ⲛⲛⲉⲅⲣⲁⲫⲏ ⲛⲉ ϫⲓⲛ ⲛⲉⲡⲣⲟⲫⲏⲧⲏⲥ ⲙⲛ ⲛⲁⲡⲟⲥⲧⲟⲗⲟⲥ . ⲁⲩⲱ ⲛⲓⲟⲧⲉ ⲉⲧⲥⲟⲩⲧⲱⲛ ⲕⲁⲧⲁ ⲕⲁⲓⲣⲟⲥ # ⲙⲙⲁⲓ ⲛⲉⲩϣⲏⲣⲉ . ⲁⲩⲱ ϩⲙ ⲡϣⲁϩ ⲙⲡⲟⲩⲟⲉⲓⲛ ⲛⲧⲉⲩⲥⲃⲱ ϣⲁⲩⲉⲓⲙⲉ ⲛϭⲓ ⲛⲗⲁⲟⲥ ⲛⲭⲣⲓⲥⲧⲓⲁⲛⲟⲥ ⲛⲁ ⲙⲉ ⲉⲧⲉⲡⲗⲁⲛⲏ ⲛⲛⲉⲛⲧⲁⲩⲗⲓⲃⲉ ⲙⲛ ⲛⲉⲛⲧⲁⲩⲗⲓⲃⲉ ⲉⲃⲟⲗ ⲙⲙⲟⲟⲩ . ⲉⲓϣⲁϫⲉ ⲉⲛⲁⲡⲏⲩⲉ ⲙⲡϩⲟϥ ⲁⲩⲱ ⲡⲉϥⲕⲉ ⲥⲱⲙⲁ . ⲉⲧⲉ ϩⲁⲓⲣⲉⲥⲓⲥ ⲛⲓⲙ ⲛⲉ ⲁⲩⲱ ⲛⲉⲩⲣⲉϥϯⲥⲃⲱ .

ⲙⲙⲛ ϭⲟⲙ ⲉⲧⲣⲉ ⲛⲉⲧⲏⲡ ⲉⲡⲥⲁⲧⲁⲛⲁⲥ ⲛⲟⲉⲓ ⲛⲛⲉⲧⲉⲣⲉ ⲡⲛⲟⲩⲧⲉ ϫⲱ ⲙⲙⲟⲟⲩ ϩⲛ ⲛⲉⲧⲉ ⲛⲟⲩϥ ⲛⲉ . ⲛⲁ ⲡⲉⲭⲣⲓⲥⲧⲟⲥ ϩⲱⲟⲩ ⲟⲩⲁⲧϭⲟⲙ ⲁⲛ ⲛⲛⲁϩⲣⲁⲩ ⲡⲉ ⲉⲧⲣⲉⲩⲥⲟⲩⲛ # ⲛⲉⲧⲉⲣⲉ ⲡⲇⲓⲁⲃⲟⲗⲟⲥ ϫⲱ ⲙⲙⲟⲟⲩ ⲉϥϣⲁϫⲉ ⲉⲃⲟⲗ ⲛϩⲏⲧⲟⲩ .

ⲛⲑⲉ ⲛⲧⲁ ⲡⲉϩⲟⲩⲉ ⲥⲟⲫⲟⲥ ⲁⲡⲁ ⲁⲑⲁⲛⲁⲥⲓⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ϭⲱⲗⲡ ⲉⲃⲟⲗ ⲛⲧⲕⲁⲕⲓⲁ ⲛⲛⲉⲧϫⲱ ⲛⲛⲉⲓⲙⲛⲧⲁⲥⲉⲃⲏⲥ ⲙⲛ ⲡⲉⲩⲕⲉ ⲥⲉⲉⲡⲉ ⲛϣⲁϫⲉ ⲙⲡⲟⲛⲏⲣⲟⲛ ⲉⲧⲉ ⲛⲁⲓ ⲛⲉ ϫⲉ ⲡⲓⲱⲧ ϣⲟⲟⲡ ⲁⲛ ⲛⲓⲱⲧ ⲛⲟⲩⲟⲉⲓϣ ⲛⲓⲙ . ⲁⲩⲱ ⲡϣⲏⲣⲉ ϣⲟⲟⲡ ⲁⲛ ⲛⲟⲩⲟⲉⲓϣ {ⲛⲓⲙ} ⲁⲗⲗⲁ ϫⲉ ⲛⲧⲟϥ ϩⲱⲱϥ ⲡϣⲏⲣⲉ ⲙⲡⲛⲟⲩⲧⲉ ⲛⲧⲁϥϣⲱⲡⲉ ⲉⲃⲟⲗ ϩⲙ ⲡⲉⲧⲉ ⲛⲉϥϣⲟⲟⲡ ⲁⲛ . ⲁⲩⲱ ⲛⲑⲉ ⲛⲧⲁⲩⲥⲟⲛⲧⲟⲩ ⲧⲏⲣⲟⲩ ⲛⲧⲟϥ ϩⲱⲱϥ ⲟⲩⲥⲱⲛⲧ ⲡⲣ ⲁⲩⲱ ⲟⲩⲧⲁⲙⲓⲟ ⲡⲉ . #

ⲁⲩⲱ ϫⲉ ⲛⲧⲟϥ ϩⲱⲱϥ ⲡⲗⲟⲅⲟⲥ ⲙⲡⲛⲟⲩⲧⲉ ⲁⲟⲩⲟⲩⲟⲉⲓϣ ϣⲱⲡⲉ (ⲉ)ⲛϥϣⲟⲟⲡ ⲁⲛ . ⲁⲩⲱ ϫⲉ ⲛⲉϥϣⲟⲟⲡ ⲁⲛ ⲡⲉ ⲙⲡⲁⲧⲟⲩϫⲡⲟϥ ⲁⲩⲱ ⲟⲛ ϫⲉ ⲛⲧⲟϥ ⲁⲛ ⲫⲩⲥⲉⲓ ⲡⲉ ⲡϣⲏⲣⲉ ⲙⲡⲛⲟⲩⲧⲉ . ⲁⲩⲱ ⲟⲛ ϫⲉ ⲟⲩⲁ ⲡⲉ ϩⲛ ⲛⲉⲧⲟⲩϫⲡⲟ ⲙⲙⲟⲟⲩ ⲙⲛ ⲛⲉⲧⲟⲩⲥⲱⲛⲧ ⲙⲙⲟⲟⲩ .

ⲁⲩⲱ ϫⲉ ⲟⲩⲥⲱⲛⲧ ⲡⲉ ⲁⲩⲱ ⲟⲩⲧⲁⲙⲓⲟ ⲡⲉ ⲁⲩⲱ ⲟⲩϩⲱⲃ ⲡⲉ . ⲁⲩⲱ ϫⲉ ⲛⲉϥϣⲟⲟⲡ ⲙⲁⲩⲁⲁϥ ⲛϭⲓ ⲡⲛⲟⲩⲧⲉ ⲁⲩⲱ ⲛⲉⲙⲛ ⲗⲁⲁⲩ ϣⲟⲟⲡ ⲛⲙⲙⲁϥ . ⲁⲩⲱ ϫⲉ ⲙⲛⲛⲥⲱⲥ ⲛⲧⲉⲣⲉϥⲟⲩⲱϣ ⲉⲧⲁⲙⲓⲟⲛ ⲧⲟⲧⲉ ⲁϥⲧⲁⲙⲓⲉ ⲡⲁⲓ ⲁⲩⲱ ⲁϥϯ ⲣⲁⲛ ⲉⲣⲟϥ ϫⲉ ⲗⲟⲅⲟⲥ ⲁⲩⲱ ϣⲏⲣⲉ .

ⲁⲩⲱ ϫⲉ ⲛⲛⲕⲁ ⲛⲓⲙ ⲉⲧⲉ ⲛⲉⲩ#ϣⲟⲟⲡ ⲁⲛ ⲛϣⲟⲣⲡ ⲁⲩϣⲱⲡⲉ ϩⲙ ⲡⲟⲩⲱϣ ⲙⲡⲛⲟⲩⲧⲉ ⲧⲁⲓ ϩⲱⲱϥ ⲧⲉ ⲑⲉ ⲛⲉϥϣⲟⲟⲡ ⲁⲛ ⲛϣⲟⲣⲡ . ⲁⲗⲗⲁ ⲛⲧⲁϥϣⲱⲡⲉ ϩⲙ ⲡⲟⲩⲱϣ ⲙⲡⲛⲟⲩⲧⲉ . ⲁⲩⲱ ϫⲉ ⲛⲧⲟϥ ϩⲱⲱϥ ⲛⲧⲁϥϣⲱⲡⲉ ϩⲛ ⲟⲩϩⲙⲟⲧ

ⲡⲉϫⲁϥ ⲛϭⲓ ⲡⲣⲉϥϫⲓⲟⲩⲁ ⲉⲧⲙⲙⲁⲩ ⲉϯϫⲱ ⲁⲛ ⲛⲛⲉϥⲕⲉ ⲃⲟⲧⲉ ⲡⲉⲓϩⲟⲩⲉ ϫⲁϫⲉ ⲛⲣⲱⲙⲉ ⲁⲗⲏⲑⲱⲥ ⲉϥⲟ ⲛⲁⲧⲥⲟⲟⲩⲛ ϫⲉ ⲡϣⲏⲣⲉ ϣⲟⲟⲡ ⲛⲟⲩⲟⲉⲓϣ ⲛⲓⲙ ⲙⲛ ⲡⲓⲱⲧ ⲁⲩⲱ ⲡⲁⲏⲙⲓⲟⲩⲣⲅⲟⲥ ⲡⲉ ⲙⲡⲧⲏⲣϥ .

ϫⲉ ⲛⲛⲉⲓⲧⲁⲟⲩⲉ ϩⲁϩ ϭⲉ ⲥⲉⲣⲱϣⲉ ⲛϭⲓ ⲛⲉⲛⲧⲁ ⲡⲣⲱⲙⲉ ⲉⲧⲟⲩⲁⲁⲃ ⲁⲡⲁ ⲁⲑⲁⲛⲁⲥⲓⲟⲥ ⲡⲁⲣⲭⲏⲉⲡⲓⲥⲕⲟ#ⲡⲟⲥ ϫⲟⲟⲩ ⲉϥϣⲟⲣϣⲣ ⲛⲙⲙⲛⲧⲁⲥⲉⲃⲏⲥ ⲙⲡⲉⲧⲙⲙⲁⲩ .

ϩⲟⲉⲓⲛⲉ ⲇⲉ ⲟⲛ ⲉⲩϣⲟⲟⲡ ϩⲙ ⲡⲉⲓⲗⲓⲃⲉ ⲛⲟⲩⲱⲧ ⲉⲩϫⲱ ⲙⲙⲟⲥ ⲉⲛⲥⲉⲣⲁⲫⲓⲛ ⲉⲧⲉⲣⲉ ⲡⲉⲡⲣⲟⲫⲏⲧⲏⲥ ⲉⲧⲟⲩⲁⲁⲃ ϫⲱ ⲙⲙⲟⲥ ⲉⲣⲟⲟⲩ . ϫⲉ ⲥⲉⲁϩⲉⲣⲁⲧⲟⲩ ⲙⲡⲕⲱⲧⲉ ⲙⲡϫⲟⲉⲓⲥ ⲥⲁⲃⲁⲱⲑ ⲉⲣⲉ ⲥⲟⲟⲩ ⲛⲧⲛϩ ⲙⲡⲟⲩⲁ ⲁⲩⲱ ⲥⲟⲟⲩ ⲙⲡⲕⲉ ⲟⲩⲁ . ϩⲣⲁⲓ ⲙⲉⲛ ϩⲛ ⲥⲛⲁⲩ ⲉⲩϩⲱⲃⲥ ⲙⲡⲉⲩϩⲟ ⲁⲩⲱ ϩⲛ ⲥⲛⲁⲩ ⲉⲩϩⲱⲃⲥ ⲛⲛⲉⲩⲟⲩⲉⲣⲏⲧⲉ ⲁⲩⲱ ⲉⲩϩⲏⲗ ⲉⲃⲟⲗ ϩⲛ ⲥⲛⲁⲩ ⲉⲩⲁϣⲕⲁⲕ ⲉⲃⲟⲗ ⲟⲩⲁ ⲛⲛⲁϩⲣⲛ ⲟⲩⲁ ⲉⲩϫⲱ ⲙⲙⲟⲥ ϫⲉ ϥⲟⲩⲁⲁⲃ ϥⲟⲩⲁⲁⲃ ϥⲟⲩⲁⲁⲃ ⲡϫⲟⲉⲓⲥ ⲥⲁⲃⲁⲱⲑ ⲡⲕⲁϩ ⲧⲏⲣϥ ⲙⲉϩ ⲙⲡⲉϥⲉⲟⲟⲩ # ⲉⲩⲁⲗⲗⲏⲅⲟⲣⲉⲓ ⲙⲙⲟⲟⲩ ϫⲉ ⲡϣⲏⲣⲉ ⲡⲉ ⲙⲛ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲛⲉ ⲛⲉⲧⲁϩⲉⲣⲁⲧⲟⲩ . ⲉⲁⲩⲣ ⲕⲁⲕⲉ ϩⲛ ⲛⲉⲩⲙⲉⲉⲩⲉ.

ⲙⲡⲟⲩⲉⲓⲙⲉ ϫⲉ ⲛⲥⲉⲣⲁⲫⲓⲛ ϩⲉⲛⲗⲓⲧⲟⲩⲣⲅⲟⲥ ⲛⲉ ⲉⲩⲁϩⲉⲣⲁⲧⲟⲩ ⲉⲡⲛⲟⲧⲩⲧⲉ . ⲡϣⲏⲣⲉ ⲇⲉ ⲙⲛ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲧⲉⲓⲟⲩⲥⲓⲁ ⲛⲟⲩⲱⲧ ⲧⲉ ⲙⲛ ⲡⲓⲱⲧ ⲛⲑⲉ ⲉⲧⲉⲣⲉ ⲛⲉⲅⲣⲁⲫⲏ ⲣ ⲙⲛⲧⲣⲉ .

ϩⲉⲛⲕⲟⲟⲩⲉ ⲇⲉ ϫⲉ ⲛⲧⲁ ⲛⲉⲯⲩⲭⲟⲟⲩⲉ ⲉⲣ ⲛⲟⲃⲉ ⲁⲩⲧⲁⲁⲩ ⲉⲛⲥⲱⲙⲁ ⲏ ⲁⲩⲧⲛⲛⲟⲟⲩⲥⲟⲩ ⲉⲣⲟⲟⲩ . ⲱ ⲛⲉⲓⲛⲟϭ ⲙⲙⲛⲧⲣϩⲟⲩⲟ . ⲙⲁⲣⲟⲩⲧⲁⲙⲟⲛ ⲛϭⲓ ⲛⲉⲧϫⲱ ⲛⲛⲁⲓ ϫⲉ ⲛⲧⲁⲩⲣ ⲛⲟⲃⲉ ⲧⲱⲛ .

ⲏ ⲛⲧⲁⲩⲉⲓ ⲉⲃⲟⲗ ϩⲛ ⲁϣ ⲙⲙⲁ ⲉϩⲟⲩⲛ ⲉⲛⲥⲱⲙⲁ . ⲙⲏ # ⲛⲧⲁⲩⲣ ⲛⲟⲃⲉ ϩⲛ ⲧⲡⲉ ⲙⲡⲁⲧⲟⲩⲉⲓ ⲉⲛⲥⲱⲙⲁ . ⲙⲏ ⲉⲩⲉⲓⲣⲉ ⲛⲙⲙⲛⲧⲛⲟⲉⲓⲕ ⲙⲛ ⲛϫⲓⲛϭⲟⲛⲥ ⲙⲛ ⲛⲥⲱⲱϥ ϩⲛ ⲙⲡⲏⲩⲉ ⲙⲛ ⲛⲕⲉ ⲙⲛⲧⲁⲥⲉⲃⲏⲥ . ⲓⲏⲥⲟⲩⲥ ⲛⲁϭⲱⲛⲧ ⲉⲣⲟⲓ ⲉⲓϫⲱ ⲛⲛⲁⲓ .

ⲁⲣⲁ ⲛⲧⲁⲩⲣ ⲛⲟⲃⲉ ϩⲛ ⲕⲉ ⲕⲟⲥⲙⲟⲥ ⲁⲩⲧⲁⲁⲩ ⲉϩⲟⲩⲛ ⲉⲛⲥⲱⲙⲁ ⲛⲛⲉⲧϩⲙ ⲡⲁⲓ ⲉⲙⲛ ⲕⲉ ⲟⲩⲁ ϣⲟⲟⲡ ⲛⲥⲁ ⲡⲁⲓ . ⲏ ϣⲁⲣⲉ ⲥⲱⲙⲁ ϣⲱⲡⲉ ⲁϫⲙ ⲯⲩⲭⲏ ⲁⲩⲱ ⲯⲩⲭⲏ ⲁϫⲛ ⲥⲱⲙⲁ . ⲏ ⲟⲩⲛ ϭⲟⲙ ⲉⲧⲣⲉ ⲯⲩⲭⲏ ⲣ ⲛⲟⲃⲉ ⲁϫⲛ ⲥⲱⲙⲁ ⲏⲉ ⲛⲥⲱⲙⲁ ⲁϫⲙ ⲯⲩⲭⲏ . ⲏ ⲉϣⲁⲩⲧⲁⲙⲓⲉ ⲧⲉⲯⲩⲭⲏ ⲛⲟⲩⲟⲩ(ⲟ)ⲉⲓϣ . ⲡⲥⲱⲙⲁ ⲛⲕⲉ ⲟⲩⲟⲉⲓϣ ⲙⲛⲛⲥⲁ ⲟⲩ#ⲭⲣⲟⲛⲟⲥ ⲛⲥⲉⲉⲓ ⲉⲡⲥⲱⲙⲁ .

ⲙⲏ ⲡⲥⲱⲙⲁ ⲁⲩⲱ ⲧⲉⲯⲩⲭⲏ ⲛⲉϥⲡⲗⲁⲥⲥⲉ ⲙⲙⲟⲟⲩ ⲁⲛ ϩⲛ ⲑⲏ ⲛⲑⲉ ⲉⲧⲥⲏϩ ϫⲉ ⲛⲧⲟⲕ ⲡⲉⲛⲧⲁⲕⲛⲧ ⲉⲃⲟⲗ ϩⲛ ⲑⲏ . ⲁⲩⲱ ϫⲉ ⲡⲉⲛⲧⲁϥⲧⲁⲙⲓⲉ ⲡⲥⲁⲛⲃⲟⲗ . ⲙⲏ ⲛⲧⲟϥ ⲁⲛ ⲡⲉⲛⲧⲁϥⲧⲁⲙⲓⲉ ⲡⲥⲁⲛϩⲟⲩⲛ.

ϯⲛⲁϫⲛⲟⲩⲟⲩ ⲟⲛ ⲉⲡⲉⲓⲕⲉ ⲟⲩⲁ . ϫⲉ ⲛⲣⲱⲙⲉ ⲛⲇⲓⲕⲁⲓⲟⲥ ϩⲉⲛⲯⲩⲭⲏ ⲛⲁⲧⲛⲟⲃⲉ ⲛⲉ ϫⲓⲛ ⲙⲙⲟⲛ ϩⲉⲛⲯⲩⲭⲏ ⲛⲣⲉϥⲣⲛⲟⲃⲉ ⲛⲉ . ⲉϣϫⲉ ϩⲉⲛⲁⲧⲛⲟⲃⲉ ⲛⲉ . ⲛⲁϣ ⲛϩⲉ ⲛⲧⲟⲟⲩ ⲉⲣⲉ ⲛⲁⲓ ⲛⲁⲣ ⲛⲟⲃⲉ ⲉⲃⲟⲗ ⲟⲩⲧⲉ ⲛⲁⲓ ⲙⲡⲁⲧⲟⲩⲉⲓ ⲉⲛⲥⲱⲙⲁ ⲏ ⲛⲁϣ ⲛϩⲉ ⲉⲣⲉ # ⲛⲁⲓ ⲛⲧⲟⲟⲩ ⲛⲁⲣ ⲉⲃⲟⲗ ⲉⲣ ⲛⲟⲃⲉ ⲙⲡⲁⲧⲟⲩⲉⲓ ⲉⲡⲥⲱⲙⲁ .

ⲏ ⲉϣϫⲉ ⲅⲉⲛⲟⲥ ⲛⲓⲙ ⲛⲣⲱⲙⲉ ϫⲓⲛⲧⲁ ⲡⲛⲟⲩⲧⲉ ⲧⲁⲙⲉⲓⲉ ⲡⲣⲱⲙⲉ ϩⲓϫⲙ ⲡⲕⲁϩ ⲁⲩⲱ ϣⲁ ⲧⲥⲩⲛⲧⲉⲗⲓⲁ ϩⲉⲛⲯⲩⲭⲏ . (ⲉ)ⲁⲩⲣ ⲛⲟⲃⲉ ⲛⲉ (ⲉ)ϣⲁⲩⲧⲁⲁⲩ ⲉⲛⲥⲱⲙⲁ ⲛⲛⲣⲱⲙⲉ . ⲛⲁϣ ⲛϩⲉ ⲉⲣⲉ ϩⲟⲉⲓⲛⲉ ⲛⲁⲣ ⲉⲩⲥⲉⲃⲏⲥ ⲛⲥⲉⲣ ⲃⲟⲗ ⲉⲣ ⲁⲥⲉⲃⲏⲥ ⲧⲏⲣⲟⲩ .

ⲉⲃⲟⲗ ϫⲉ ⲉϣϫⲉ ⲉⲩⲣ ⲛⲟⲃⲉ ϩⲛ ϩⲉⲛⲧⲟⲡⲟⲥ ⲕⲁⲧⲁ ⲛⲉⲧⲛϣⲁϫⲉ . ⲛⲁϣ ⲛϩⲉ ⲉⲩⲛⲁⲣ ⲡⲓⲥⲧⲟⲥ ϩⲙ ⲡⲕⲟⲥⲙⲟⲥ ⲉⲧⲙⲉϩ ⲙ#ⲡⲟⲛⲏⲣⲓⲁ ⲛⲓⲙ . ⲁⲩⲱ ⲉϣϫⲉ ⲧⲉⲯⲩⲭⲏ ⲛⲁⲣ ⲛⲟⲃⲉ ⲙⲡⲁⲧⲉⲥⲉⲓ ⲉⲡⲥⲱⲙⲁ ⲉⲓⲉ ⲟⲩⲛ ϭⲟⲙ ⲙⲙⲟⲥ ⲉⲣ ⲡⲥⲱⲙⲁ ⲛⲕⲁⲕⲉ ϫⲓⲛ ⲉⲥϩⲛ ⲑⲏ . ⲏ ϫⲓⲛ ⲉϥϩⲛ ⲑⲏ ⲛⲧⲟϥ .

ⲙⲁⲗⲓⲥⲧⲁ ⲥⲛⲁⲁⲁϥ ⲛⲁⲥⲉⲃⲏⲥ ϫⲓⲛ ⲉϥⲟⲩⲉⲙ ⲉⲣⲱⲧⲉ . ⲁⲩⲱ ⲛⲧⲟⲥ ⲣⲱ ⲡⲉ ⲡⲣⲱⲙⲉ ⲉⲃⲟⲗ ϫⲉ ⲙⲛ ⲣⲱⲙⲉ ⲁϫⲙ ⲯⲩⲭⲏ ⲁⲩⲱ ⲙⲙⲛ ⲯⲩⲭⲏ ⲁϫⲛ ⲣⲱⲙⲉ . ⲧⲉⲯⲩⲭⲏ ⲅⲁⲣ ⲁⲩⲱ ⲡⲥⲱⲙⲁ ⲉϣⲁⲩϣⲱⲡⲉ ϩⲛ ⲑⲏ ⲙⲛ ⲛⲉⲩⲉⲣⲏⲩ . ⲙⲡⲥⲱⲙⲁ ⲟⲛ ϣⲟⲣⲡ ⲁⲛ ⲉⲧⲉⲯⲩⲭⲏ . ⲟⲩⲇⲉ ⲉⲛⲧⲉⲯⲩⲭⲏ ϣⲟⲟⲡ ⲁⲛ ϩⲁⲑⲏ ⲙⲡⲥⲱⲙⲁ . ⲁⲗⲗⲁ ⲛⲧⲟϥ ⲁⲩⲱ ⲡⲥⲱⲙⲁ ⲛⲧⲁ ⲡⲛⲟⲩ{ⲧⲉ} ⲡⲗⲁⲥⲥⲉ ⲙⲙⲟⲟⲩ ϩⲓ ⲟⲩⲥⲟⲡ ϩⲛ ⲑⲏ .

ⲁⲩⲱ ⲉⲃⲟⲗ ⲧⲱⲛ . ϫⲉ ⲉⲣϣⲁⲛ ⲧⲉⲯⲩⲭⲏ # ⲣ ⲛⲟⲃⲉ ⲁⲩⲧⲁⲁⲥ ⲉⲡⲥⲱⲙⲁ . ⲁⲓϫⲟⲟⲥ ⲛⲕⲉ ⲥⲟⲡ ϫⲉ ⲙⲁⲣⲉ ⲛⲉⲧϫⲱ ⲛⲛⲉⲓϣⲁϫⲉ ⲛⲇⲓⲁⲃⲟⲗⲟⲥ ⲧⲁⲙⲟⲛ ϫⲉ ⲛⲧⲁⲩⲣ ⲛⲟⲃⲉ ϩⲛ ⲁϣ ⲛⲧⲟⲡⲟⲥ . ⲁⲩⲱ ϫⲉ ⲛⲧⲁⲩⲣ ⲛⲟⲃⲉ ϩⲛ ⲟⲩ . ⲏ ⲛⲧⲁⲩⲣ ⲛⲟⲃⲉ ⲉⲛⲓⲙ . ⲏ ⲛⲧⲁ ⲛⲓⲙ ⲣ ⲛⲟⲃⲉ ⲉⲣⲟⲟⲩ .

ⲁⲣⲁ ⲟⲩⲛ ϩⲉⲛⲕⲉ ⲕⲁϩ ⲏ ϩⲉⲛⲕⲉ ⲧⲟⲡⲟⲥ ⲉⲟⲩⲛ ⲟⲩϩⲟⲟⲩⲧ ⲡⲟⲣⲛⲉⲩⲉ ⲙⲛ ⲥϩⲓⲙⲉ . ⲏ ⲟⲩⲥϩⲓⲙⲉ ⲙⲛ ⲟⲩϩⲟⲟⲩⲧ . ⲁⲣⲁ ⲟⲩⲛ ⲣⲱⲙⲉ ⲉϥϫⲓ ⲙⲡⲉⲧϩⲓⲧⲟⲩⲱϥ ⲛϭⲟⲛⲥ . ⲏ ⲉϥⲡⲟⲛⲏⲣⲉⲩⲉ ⲉⲡⲉϥⲥⲟⲛ ⲉⲓⲙⲏⲧⲉⲓ ϩⲙ ⲡⲕⲟⲥⲙⲟⲥ ⲙⲙⲁⲧⲉ . ⲙⲏ ⲉⲣϣⲁⲛ ⲡⲣⲱⲙⲉ ⲉⲓ ⲁⲛ ⲉⲃⲟⲗ ϩⲛ ⲑⲏ ⲛϥⲁⲩⲝⲁⲛⲉ ϩⲙ ⲡⲉⲓⲙⲁ ⲛϣⲱⲡⲉ . ⲏ ⲛϥⲣ ⲉⲩⲥⲉⲃⲏⲥ ⲏ ⲛϥⲣ ⲁⲥⲉⲃⲏⲥ .

ⲉϣϫⲉ ⲛⲧⲉⲓϩⲉ ⲁⲛ ⲧⲉ ⲉⲓⲉ ϫⲟⲟⲥ ⲛ#ⲧⲟⲟⲩⲛ ϫⲉ ⲉϣϫⲉ ⲁⲛⲉⲯⲩⲭⲏ ⲛⲛⲉⲧⲧⲁⲟⲩⲟ ⲛⲛⲁⲓ ⲣ ⲁⲥ ϩⲙ ⲡⲛⲟⲃⲉ ⲙⲡⲁⲧⲟⲩⲉⲓ ⲉⲡⲥⲱⲙⲁ ⲉⲓⲉ ⲉⲩⲛⲁⲣ ϩⲗⲗⲱ ϩⲙ ⲡⲛⲟⲃⲉ ⲛⲟⲩⲏⲣ ϩⲙ ⲡⲧⲣⲉⲩⲉⲓ ⲉⲃⲟⲗ ϩⲛ ⲑⲏ .

ⲁⲩⲱ ⲉϣϫⲉ ⲟⲩⲡⲟⲛⲏⲣⲟⲥ ⲧⲉ ⲙⲡⲁⲧⲟⲩⲧⲁⲁⲩ ⲉⲡⲥⲱⲙⲁ . ⲉⲓⲉ ⲉⲥϣⲁⲛⲉⲓ ⲉⲃⲟⲗ ϩⲛ ⲑⲏ ⲉⲥⲛⲁⲣ ⲥⲁⲧⲁⲛⲁⲥ ⲛⲟⲩⲏⲣ . ⲏ ⲉⲛⲉ ⲙⲡⲉⲥⲙⲟⲩϩ ⲙⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ⲛⲉⲩⲛⲁⲙⲉⲉⲩⲉ ⲡⲉ ⲉⲛⲁⲓ . ⲏ ⲛⲉⲣⲉ ⲛⲁⲓ ⲛⲁⲃⲱⲕ ⲉⲡⲉⲩϩⲏⲧ .

ϩⲉⲛⲕⲟⲟⲩⲉ ⲇⲉ ⲟⲛ ⲉⲩϫⲓ ⲟⲩⲁ ϫⲉ ⲙⲡⲉ ⲙⲁⲣⲓⲁ ⲱ ⲙⲡⲉⲭⲣⲓⲥⲧⲟⲥ ⲁⲩⲱ ϫⲉ ⲉϣϫⲉ ⲁⲥⲱ ⲉⲓⲉ ⲟⲩⲕⲟⲩⲛ ⲁϩⲏⲧⲥ ⲙⲟⲟϣⲉ ⲉⲑⲏ ⲏ ⲕⲱⲱⲗⲉ ⲉⲃⲟⲗ .

ⲙⲁⲣⲟⲩⲥⲱⲧⲙ ⲇⲉ ⲉⲡⲁⲓ ⲉⲃⲟⲗ ϩⲓⲧⲟⲟⲧⲛ # ϫⲉ ⲉϣϫⲉ ⲙⲡⲉⲥⲱ ⲙⲙⲟϥ ⲉⲓⲉ ⲉⲣⲉ ⲡⲉⲡⲣⲟⲫⲏⲧⲏⲥ ϣⲁϫⲉ ⲉⲡϫⲓⲛϫⲏ ϫⲉ ⲉⲓⲥ ⲧⲡⲁⲣⲑⲉⲛⲟⲥ ⲛⲁⲱ ⲛⲥϫⲡⲟ ⲛⲟⲩϣⲏⲣⲉ ⲛⲥⲉⲙⲟⲩⲧⲉ ⲉⲡⲉϥⲣⲁⲛ ϫⲉ ⲙⲙⲁⲛⲟⲩⲏⲗ . ⲁⲩⲱ ⲟⲛ ϫⲉ ⲡⲉϫⲡⲟ ⲛⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲛⲉⲟⲩⲧⲉⲓϩⲉ ⲡⲉ . ⲁⲩⲱ ϫⲉ ⲉⲓⲥ ϩⲏⲏⲧⲉ ⲧⲉⲛⲁⲱ ⲛⲧⲉϫⲡⲟ ⲛⲟⲩϣⲏⲣⲉ ⲛⲧⲉⲙⲟⲩⲧⲉ ⲉⲡⲉϥⲣⲁⲛ ϫⲉ ⲓⲏⲥⲟⲩⲥ .

ⲉϣϫⲉ ⲙⲡⲉⲥⲱ ⲙⲙⲟϥ ⲉⲓⲉ ⲙⲡⲟⲩϫⲡⲟϥ . ⲉϣϫⲉ ⲙⲡⲟⲩϫⲡⲟϥ ⲉⲓⲉ ⲙⲡⲉϥⲣ ⲣⲱⲙⲉ . ⲉϣϫⲉ ⲙⲡⲉϥⲣ ⲣⲱⲙⲉ ⲉⲓⲉ ⲙⲡⲟⲩⲥⲧⲁⲩⲣⲟⲩ ⲙⲙⲟϥ . ⲁⲩⲱ ⲉϣϫⲉ ⲙⲡⲟⲩⲥⲧⲁⲩⲣⲟⲩ ⲙⲙⲟϥ ⲉⲓⲉ ⲙⲡⲉϥⲧⲱⲟⲩⲛ ϩⲙ ⲡⲙⲉϩϣⲟⲙⲛⲧ ⲛϩⲟⲟⲩ # ⲉⲁϥⲃⲱⲕ ⲉϩⲣⲁⲓ ⲉⲛⲉϥⲙⲁⲛϣⲱⲡⲉ ⲉⲧⲟⲩⲁⲁⲃ ⲉⲧⲉϥⲛϩⲏⲧⲟⲩ ⲛϣⲟⲣⲡ ⲙⲡⲁⲧⲉ ⲡⲉϥⲓⲱⲧ ⲧⲛⲛⲟⲟⲩϥ ⲉⲧⲣⲉϥϣⲱⲡⲉ ⲉⲃⲟⲗ ϩⲛ ⲟⲩⲥϩⲓⲙⲉ ⲉⲧⲉ ⲛⲧⲟⲥ ⲟⲛ ⲡⲉ ⲙⲁⲣⲓⲁ ⲧⲡⲁⲣⲑⲉⲛⲟⲥ ⲉⲧⲟⲩⲁⲁⲃ .

ϩⲟⲓⲛⲉ ⲇⲉ ⲟⲛ ϫⲉ ⲡⲟⲉⲓⲕ ⲁⲩⲱ ⲡⲡⲟⲧⲏⲣⲓⲟⲛ . ⲡⲥⲱⲙⲁ ⲁⲛ ⲡⲉ ⲙⲡⲉⲭⲣⲓⲥⲧⲟⲥ ⲁⲩⲱ ⲡⲉϥⲥⲛⲟϥ ⲁⲗⲗⲁ ⲟⲩⲧⲩⲡⲟⲥ ⲙⲙⲁⲧⲉ ⲡⲉ . ⲁⲓⲃⲱⲗ ⲉⲃⲟⲗ ⲉⲓϫⲱ ⲛⲛⲁⲓ . ⲟⲩⲟⲓ ⲛⲁⲓ ⲁⲓϣⲧⲟⲣⲧⲣ ⲉϫⲛ ϯⲙⲛⲧⲁⲧⲛⲟⲩⲧⲉ .

ⲉϣϫⲉ ⲛⲧⲟϥ ⲙⲙⲓⲛ ⲙⲙⲟϥ ⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲡⲉⲧⲛⲁⲟⲩⲱⲙ ⲛⲧⲁⲥⲁⲣⲝ ⲛϥⲥⲱ ⲙⲡⲁⲥⲛⲟϥ ϥⲛⲁⲱⲛϩ ϣⲁ ⲉⲛⲉϩ . ⲁⲩⲱ ⲟⲛ ϫⲉ ⲡⲁⲓ ⲡⲉ # ⲡⲁⲥⲱⲙⲁ ⲡⲁⲓ ⲡⲉ ⲡⲁⲥⲛⲟϥ . ⲛⲧⲉ ⲛⲁⲓ ϫⲟⲟⲥ ϩⲱⲟⲩ ϫⲉ ⲡⲉϥⲥⲱⲙⲁ ⲁⲛ ⲡⲉ ⲁⲩⲱ ⲡⲉϥⲥⲛⲟϥ . ⲟⲩⲟⲓ ⲛⲁⲩ ⲛⲟⲩⲏⲣ ⲁⲩⲱ ⲟⲩⲟⲓ ⲛⲟⲩⲏⲣ ⲛⲛⲉⲧϫⲓ ⲛⲛⲉⲩϣⲁϫⲉ .

ⲛⲓⲙ ⲡⲉⲧⲛⲁⲥⲉϣϥ ⲡⲟⲉⲓⲕ ⲙⲛ ⲡⲡⲟⲧⲏⲣⲓⲟⲛ ⲛⲧⲉⲧⲙ ⲓⲏⲥⲟⲩⲥ ⲣ ϩⲟⲩⲉ ⲥⲟϣϥ . ϫⲉ ⲛⲧⲟϥ ϩⲱⲱϥ ⲁϥⲥⲱϣϥ ⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ . ⲉⲧⲉⲣⲉ ⲡⲛⲟⲩⲧⲉ ⲧⲛⲛⲟⲟⲩ ⲙⲙⲟϥ ⲉϩⲣⲁⲓ ⲉϫⲱⲟⲩ ⲉⲧⲣⲉⲩϣⲱⲡⲉ ⲙⲡⲥⲱⲙⲁ ⲙⲡⲉⲭⲣⲓⲥⲧⲟⲥ ⲁⲩⲱ ⲡⲉϥⲥⲛⲟϥ .

ⲛⲓⲙ ⲡⲉⲧⲛⲁϫⲟⲟⲥ ϫⲉ ⲡⲁⲓ ⲁⲛ ⲡⲉ . ⲛϥⲧⲙⲕⲁⲧⲁⲫⲣⲟⲛⲉⲓ ϩⲓϫⲙ ⲡⲙⲁ ⲉⲧⲟⲩⲁⲁⲃ . ⲡⲉⲑⲩⲥⲓⲁⲥⲧⲏⲣⲓⲟⲛ ⲛⲛⲉⲧϩⲉ ⲉϩⲣⲁⲓ ⲁⲩⲱ ⲉⲧⲡⲱϩⲧ ⲉⲃⲟⲗ ⲛϩⲏⲧⲟⲩ . ⲛⲑⲉ # ⲛⲧⲁⲓⲉⲓⲙⲉ ⲉⲡⲁⲓ . ⲛϥⲟ ⲅⲁⲣ ⲛⲣⲟⲟⲩϣ ⲛⲁⲩ ⲁⲛ . ϩⲱⲥ ⲉϣϫⲉ ⲉⲩⲟⲩⲱⲙ ⲛⲟⲩⲟⲉⲓⲕ ⲁⲩⲱ ⲉⲩⲥⲱ ⲛⲟⲩⲏⲣⲡ .

ⲁⲗⲏⲑⲱⲥ ⲡⲉⲧϫⲱ ⲙⲙⲟⲥ ϫⲉ ⲡⲉϥⲥⲱⲙⲁ ⲁⲛ ⲡⲉ ⲁⲩⲱ ⲡⲉϥⲥⲛⲟϥ . ⲙⲁⲗⲓⲥⲧⲁ ⲛⲉⲉⲃⲟⲗ ⲛϩⲏⲧⲛ ⲁⲩⲱ ⲛϩ(ⲉ)ⲗⲗⲏⲛ ⲁⲛ ⲙⲁⲩⲁⲁⲩ . ⲥⲉⲣ ϩⲟⲩⲉ ϩⲟⲟⲩ ⲉ ⲛⲉⲟⲩϩⲟⲟⲣ ⲙⲛ ⲛⲉϣⲁⲩ . ⲏ ⲉⲛϫⲱ ⲙⲙⲟⲥ ϫⲉ ⲟⲩⲟⲉⲓⲕ ⲡⲉⲧⲛϫⲓ ⲉⲃⲟⲗ ⲛϩⲏⲧϥ . ⲙⲏ ⲟⲩⲙⲩⲥⲧⲏⲣⲓⲟⲛ ⲁⲛ ⲡⲉ ⲕⲁⲧⲁ ⲛⲉⲅⲣⲁⲫⲏ .

ⲡⲉⲧⲟ ⲛⲁⲧⲛⲁϩⲧⲉ ⲉⲡⲉⲧⲛϫⲱ ⲙⲙⲟϥ . ⲟⲩⲙⲟⲛⲟⲛ ϫⲉ ϥϩⲟⲟⲩ ⲉⲛⲉⲑⲏⲣⲓⲟⲛ ⲁⲗⲗⲁ ϥⲣ ⲡⲕⲉ ϩⲟⲟⲩ ⲉⲛⲇⲁⲓⲙⲱⲛ ⲛⲁⲕⲁⲑⲁⲣⲧⲟⲛ . ⲉϣϫⲉ ⲛⲅϫⲓ ⲁⲛ ⲙⲡⲁⲡⲟⲥⲧⲟⲗⲟⲥ ⲉϥϣⲁ#ϫⲉ ⲁⲩⲱ ⲕⲥⲧⲟ ⲉⲃⲟⲗ ⲙⲡⲉⲩⲁⲅⲅⲉⲗⲓⲟⲛ ϩⲙ ⲡⲁⲓ . ⲛⲓⲙ ⲡⲉⲧⲛⲁϫⲓⲧⲕ ⲛⲧⲟⲕ . ⲏ ⲛⲓⲙ ⲡⲉⲧⲛⲁⲥⲧⲟⲕ ⲉⲃⲟⲗ ⲁⲛ .

ⲙⲁⲗⲗⲟⲛ ⲉϣϫⲉ ⲟⲩⲡⲣⲉⲥⲃⲩⲧⲉⲣⲟⲥ ⲡⲉ ⲏ ⲟⲩⲕⲗⲏⲣⲓⲕⲟⲥ ⲡⲉ ⲕⲁⲧⲁ ⲧⲉϥⲧⲁⲝⲓⲥ ϩⲛ ⲧⲙⲛⲧⲟⲩⲏⲏⲃ . ⲉⲛϥⲡⲓⲥⲧⲉⲩⲉ ⲁⲛ ϫⲉ ⲟⲩⲛ ϭⲟⲙ ⲙⲡⲛⲟⲩⲧⲉ ⲉϩⲱⲃ ⲛⲓⲙ ⲛ ϩⲟⲩⲟ ⲇⲉ ⲉⲡⲁⲓ . ⲙⲁⲣⲉϥⲧⲱⲙ ⲣⲱϥ ⲉϥϣⲗⲏⲗ ⲁⲩⲱ ⲉϥⲥⲟⲡⲥ ⲙⲡⲉⲧϫⲟⲥⲉ ⲉϥϫⲱ ⲙⲙⲟⲥ ϫⲉ ⲡⲁⲓ ⲡⲉ ⲡⲁⲥⲱⲙⲁ ⲉⲧⲟⲩⲛⲁⲧⲁⲁϥ ϩⲁⲣⲱⲧⲛ ⲉⲡⲕⲱ ⲉⲃⲟⲗ ⲛⲛⲉⲧⲛⲟⲃⲉ . ⲁⲩⲱ ⲟⲛ ϫⲉ ⲡⲁⲓ ⲡⲉ ⲡⲁⲥⲛⲟϥ ⲉⲧⲟⲩⲛⲁⲡⲁϩⲧϥ ⲉⲃⲟⲗ ϩⲁ ϩⲁϩ ⲉⲡⲕⲱ ⲉⲃⲟⲗ ⲛⲛⲉⲩⲛⲟⲃⲉ . #

ⲏ ϣⲁⲣⲉ ⲟⲉⲓⲕ ϩⲓ ⲏⲣⲡ ⲧⲃⲃⲟ ⲣⲱⲙⲉ ⲉⲃⲟⲗ ϩⲛ ϩⲉⲛⲛⲟⲃⲉ . ⲏ ⲧⲁⲗϭⲟϥ ϩⲛ ϩⲉⲛϣⲱⲛⲉ . ⲛⲥⲉϣⲱⲡⲉ ⲛⲁϥ ⲛⲥⲙⲟⲩ ⲛⲱⲛϩ . ⲁⲩⲱ ⲁϩⲣⲟⲕ ⲙⲡⲉⲕⲧⲱⲙ ⲣⲱⲕ ⲕⲁⲧⲁ ⲡⲉⲛⲧⲁⲓⲣ ϣⲣⲡ ϫⲟⲟϥ ⲉⲕϣⲁϫⲉ ⲉϩⲣⲁⲓ ⲉⲡϫⲟⲉⲓⲥ ϫⲉ ⲡⲟⲉⲓⲕ ⲙⲡⲉⲥⲙⲟⲩ . ⲡⲟⲉⲓⲕ ⲙⲡⲧⲃⲃⲟ ⲁⲩⲱ ⲧⲙⲛⲧⲁⲧⲙⲟⲩ ⲡⲡⲟⲇⲏⲣⲓⲟⲛ ⲛⲧⲇⲓⲁⲑⲩⲕⲏ ⲛⲃⲣⲣⲉ . ⲁⲩⲱ ϫⲉ ⲡⲁⲓ ⲡⲉ ⲡⲥⲱⲙⲁ ⲙⲛ ⲡⲉⲥⲛⲟϥ ⲙⲡⲉⲕⲙⲟⲛⲟⲅⲉⲛⲏⲥ ⲛϣⲏⲣⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ .

ϩⲟⲉⲓⲛⲉ ⲇⲉ ⲟⲛ ⲉⲩⲥⲱϣ ⲙⲡⲥⲱⲙⲁ . ϫⲉ ϯⲥⲁⲣⲝ ⲛⲉϣⲱ . ⲁⲩⲱ ϫⲉ ⲉⲩⲛⲁⲛⲟϫⲥ ⲉⲃⲟⲗ . ⲉⲩϫⲱ ⲇⲉ ⲙⲡⲁⲓ ⲉⲃⲟⲗ ϫⲉ ⲛⲥⲉⲡⲓⲥⲧⲉⲩⲉ ⲁⲛ ϫⲉ ⲥⲛⲁⲧⲱⲟⲩⲛ .

ⲏ ⲉϣϫⲉ ⲟⲩⲉϣⲱ ⲧⲉ # ⲛⲓⲙ ⲡⲉⲛⲧⲁϥⲁⲁⲥ ⲛⲧⲉⲓϩⲉ . ⲏ ⲁϥⲧⲣ(ⲉ)ⲕϣⲱⲡⲉ ⲉⲥϩⲟⲟⲩ ⲉⲧⲥⲕⲣⲱⲫⲁ . ⲙⲏ ⲛⲧⲱⲧⲛ ⲁⲛ ⲡⲉ . ⲙⲁⲗⲗⲟⲛ ⲇⲉ ⲛⲉⲧϫⲱ ⲙⲙⲟⲥ ϫⲉ (ⲉ)ⲣϣⲁⲛ ⲧⲉⲯⲩⲭⲏ ⲣ ⲛⲟⲃⲉ ⲁⲩⲧⲁⲁⲥ ⲉⲡⲥⲱⲙⲁ . ⲛⲧⲟⲟⲩ ⲛⲉⲧⲧⲟⲛⲧⲛ ⲙⲡⲥⲱⲙⲁ ⲉⲡⲉⲓⲍⲱⲟⲛ . ⲁⲗⲗⲁ ⲕⲁⲗⲱⲥ ⲁⲩⲱ ⲇⲓⲕⲁⲓⲱⲥ ⲉⲩⲥⲱϣ ⲛⲧⲥⲁⲣⲝ ⲧⲱⲟⲩ ⲙⲁⲩⲁⲁⲩ {ⲛϭⲓ} ⲛⲁⲡⲓⲥⲧⲟⲥ ⲉⲧⲙⲙⲁⲩ .

ⲁⲛⲟⲛ ⲇⲉ ⲛⲛⲉⲥϣⲱⲡⲉ ⲉⲧⲣⲉⲛⲙⲉⲉⲩⲉ ⲉⲡⲁⲓ ⲉⲛⲉϩ ⲟⲩⲇⲉ ⲉⲧⲣⲉⲛⲥⲉϣϥ ⲡⲥⲱⲙⲁ ⲏ ⲉϫⲟⲟⲥ {ϫⲉ} ϥⲛⲁⲧⲱⲟⲩⲛ ⲁⲛ . ⲡⲣⲱⲙⲉ ⲟⲛ ⲙⲡⲛⲟⲩⲧⲉ ϩⲛ ⲟⲩⲙⲉ ϫⲡⲓⲉ ⲧⲙⲛⲧⲁⲑⲏⲧ ⲛⲛⲉⲧⲥⲱϣϥ ⲙⲡⲥⲱⲙⲁ ⲉϥϫⲱ ⲙⲙⲟⲥ # ϫⲉ ⲑⲁⲓⲃⲉⲥ ⲙⲡⲉⲧⲣⲟⲥ ⲁⲥⲧⲁⲗϭⲉ ϩⲉⲛⲙⲏⲏϣⲉ .

ϩⲉⲛⲕⲟⲟⲩⲉ ⲇⲉ ⲟⲛ ϫⲉ ⲛⲧⲁⲩⲛⲉϫ (ϩ)ⲱⲣⲓⲅⲉⲛⲏⲥ ⲉⲃⲟⲗ ϩⲛ ⲧⲉⲕⲕⲗⲏⲥⲓⲁ ϫⲉ ⲁϥϭⲱⲗⲡ ⲉⲃⲟⲗ ⲛⲛⲉⲑⲏⲡ ⲉⲛⲅⲣⲁⲫⲏ . ⲏ ⲛⲉⲧⲉ ⲙⲡⲉ ⲛⲉⲅⲣⲁⲫⲏ ⲥⲁϩⲟⲩ . ⲁⲩⲱ ⲉⲧⲟⲩⲟⲧⲃ ⲉⲛⲉⲛⲧⲁ ⲛⲉⲧⲟⲩⲁⲁⲃ ϫⲟⲟⲩ . ⲁⲩⲱ ϫⲉ ⲛⲧⲁⲩⲛⲟϫϥ ⲁⲛ ⲉⲃⲟⲗ ϫⲉ ⲟⲩϩⲁⲓⲣⲉⲧⲓⲕⲟⲥ ⲡⲉ . ⲁⲗⲗⲁ ⲉⲧⲃⲉ ⲟⲩⲫⲑⲟⲛⲟⲥ .

ⲁⲛⲟⲕ ϩⲱⲱⲧ ϯⲛⲁϫⲟⲟⲥ ϫⲉ ⲛⲧⲁϥⲟⲩⲱⲛϩ ⲁⲛ ⲉⲃⲟⲗ ⲛⲛⲉⲑⲏⲡ ⲉⲛⲉⲅⲣⲁⲫⲏ . ⲙⲙⲛ ⲕⲉ ϩⲱⲃ ⲅⲁⲣ ⲁⲩⲱ ⲕⲉ ϣⲁϫⲉ . ⲉⲟⲩⲛ ϭⲟⲙ ⲉⲧⲣⲉ ⲣⲱⲙⲉ ⲥⲱⲧⲙ ⲉⲣⲟⲟⲩ . ⲏ ⲉⲛⲟⲉⲓ ⲙⲙⲟⲟⲩ # ⲏ ⲉϯ ⲕⲁⲣⲡⲟⲥ ⲛϩⲏⲧⲟⲩ ϫⲉ ⲙⲡⲉ ⲛⲉⲡⲣⲟⲫⲏⲧⲏⲥ ⲙⲛ ⲛⲁⲡⲟⲥⲧⲟⲗⲟⲥ ⲁⲩⲱ ⲛⲉⲓⲟⲧⲉ ⲙⲡⲓⲥⲧⲟⲥ ⲁⲩⲱ ⲛⲥⲁϩ ⲛⲁ ⲙⲉ ⲛⲧⲉⲕⲕⲗⲏⲥⲓⲁ ⲟⲩⲟⲛϩⲟⲩ ⲉⲃⲟⲗ ⲧⲏⲣⲟⲩ .

ⲁⲗⲗⲁ ⲛⲉⲧϩⲏⲡ ⲉⲧⲕⲁⲕⲓⲁ ⲙⲡⲉⲧⲙⲙⲁⲩ . ⲁⲩⲱ ⲙⲙⲩⲥⲧⲏⲣⲓⲟⲛ ⲙⲡⲉϥⲉⲓⲱⲧ ⲡⲇⲓⲁⲃⲟⲗⲟⲥ ⲛⲉⲛⲧⲁϥϭⲟⲗⲡⲟⲩ ⲉⲃⲟⲗ ⲁⲩⲱ ⲁϥⲟⲩⲟⲛϩⲟⲩ ⲉⲃⲟⲗ ⲉⲩϩⲏⲡ ϩⲣⲁⲓ ⲛϩⲏⲧϥ .

ⲟⲩⲛ ⲕⲱϩⲧ ⲅⲁⲣ ⲉϥϫⲉⲣⲟ ⲁⲩⲱ ⲉⲛⲁϣⲉ ⲡⲉϥϣⲁϩ . ⲉϥⲱⲫⲉⲗⲉⲓ ⲁⲩⲱ ⲉϥϯ ϩⲏⲩ ⲛⲟⲩⲟⲛ ⲛⲓⲙ . ⲁⲩⲱ ⲟⲩⲛ ⲕⲱϩⲧ ⲉⲁⲩϫⲉⲣⲱϥ ⲉⲛⲉⲙⲡⲉ ⲛⲉⲧϥⲓ ⲣⲟⲟⲩϣ ⲟϣⲙⲉϥ ⲧⲁⲭⲏ ⲛⲉϥⲛⲁⲣⲱⲕϩ ⲛϩⲉⲛⲡⲟⲗⲓⲥ ⲙⲛ ϩⲉⲛϯⲙⲉ # ⲁⲩⲱ ϩⲉⲛⲏⲓ ⲙⲛ ϩⲁϩ ⲛϩⲛⲁⲁⲩ ⲛⲁⲛⲁⲅⲕⲁⲓⲟⲛ .

ⲧⲁⲓ ⲧⲉ ⲑⲉ ⲉⲧⲉ ⲟⲩϩⲟⲩⲉ ⲁⲅⲁⲑⲟⲛ ⲡⲉ ⲡⲥⲟⲟⲩⲛ ⲛⲛⲉⲅⲣⲁⲫⲏ ⲙⲛ ⲧⲉⲩⲥⲃⲱ ⲛⲛⲉⲧⲛⲟⲉⲓ ⲙⲙⲟⲟⲩ ⲁⲩⲱ ⲉⲟⲩⲡⲟⲛⲏⲣⲟⲛ ⲛϩⲟⲩⲟ ⲡⲉ ⲡⲥⲟⲟⲩⲛ ⲛⲛⲉⲧϫⲱ ⲙⲙⲟⲟⲩ ϫⲉ ⲟⲩⲛ ⲕⲉ ⲥⲟⲟⲩⲛ ⲉϥϩⲏⲡ ⲉⲛⲉⲅⲣⲁⲫⲏ . ⲏ ⲙⲡⲉ ⲛⲉⲅⲣⲁⲫⲏ ⲟⲩⲟⲛϩϥ ⲉⲃⲟⲗ .

ⲛⲁⲡⲟⲥⲧⲟⲗⲟⲥ ϭⲉ ⲉⲧⲟⲩⲁⲁⲃ ⲁⲩⲱ ⲛⲉⲡⲣⲟⲫⲏⲧⲏⲥ ⲧⲏⲣⲟⲩ ⲙⲛ ⲛⲥⲟⲫⲟⲥ ⲧⲏⲣⲟⲩ ϫⲓⲛ ⲛϣⲟⲣⲡ ϣⲁϩⲣⲁⲓ ⲉⲧⲉⲛⲟⲩ . ⲥⲉϣⲟⲣϣⲣ ⲛⲙⲙⲉⲉⲩⲉ ⲁⲩⲱ ϫⲓⲥⲉ ⲛⲓⲙ ⲉⲧⲧⲱⲟⲩⲛ ⲉϩⲣⲁⲓ ⲉϫⲙ ⲡⲥⲟⲟⲩⲛ ⲙⲡⲛⲟⲩⲧⲉ . ⲉⲩⲃⲟⲏⲑⲉⲓ ⲉⲛϩⲁⲡⲗⲟⲩⲥ ⲉⲧⲙⲧⲣⲉⲩϫⲱ#ⲗϫ ϩⲛ ⲛⲉⲥⲃⲟⲟⲩⲉ ⲛⲛϩⲁⲓⲣⲁⲓⲧⲓⲕⲟⲥ . ⲁⲩⲱ ⲁⲩⲧⲉⲕⲙ ϩⲁϩ ⲟⲛ ⲉⲃⲟⲗ ϩⲙ ⲡⲥⲟⲟⲩⲛ ⲛⲛⲟⲩϫ .

ⲁⲩⲱ ⲛⲉⲧⲉϩⲛⲁⲩ ⲁⲛ ⲉⲥⲁϩⲱⲟⲩ ⲉⲃⲟⲗ ⲛⲧⲉⲥⲃⲱ ⲉⲑⲟⲟⲩ ⲛⲟⲩⲟⲉⲓϣ ⲛⲓⲙ . ⲡϣⲁϫⲉ ϫⲱ ⲙⲙⲟⲥ ⲛⲁⲩ ϫⲓⲛ ⲧⲉⲛⲟⲩ ϣⲁ ⲧⲥⲩⲛⲧⲉⲗⲉⲓⲁ ⲉⲩϯ ⲙⲙⲟⲟⲩ ⲉⲧⲟⲟⲧϥ ⲙⲡⲟⲩⲱϩⲙ ⲙⲡⲥⲟⲟⲩⲛ ⲉⲧⲙⲙⲁⲩ . ⲛⲣⲉϥⲧⲁⲕⲉ ⲯⲩⲭⲏ ϫⲉ ⲃⲱⲕ ϩⲙ ⲡⲟⲩⲟⲉⲓⲛ ⲙⲡⲉⲧⲛⲕⲱϩⲧ . ⲁⲩⲱ ⲡϣⲁϩ ⲛⲧⲁⲧⲉⲧⲛϫⲉⲣⲱϥ .

ⲧⲁⲓ ⲧⲉ ⲑⲉ ⲉⲧⲉ ⲛⲁϣⲉ ⲛⲉⲧⲟⲧⲡ ⲉϩⲟⲩⲛ ⲉⲡⲕⲁⲕⲉ ⲙⲡⲥⲟⲟⲩⲛ # ⲙⲡⲟⲩⲟⲉⲓⲛ ⲉⲧⲙⲙⲁⲩ . ⲛϩⲟⲩⲟ ⲕⲁⲕⲉ ⲛⲓⲙ .

ⲏ ⲕⲉ ⲙⲛⲧⲉⲩⲥⲉⲃⲏⲥ ⲁⲛ ⲛⲃⲣⲣⲉ ⲧⲉ ⲧⲁⲓ ⲉⲁⲥⲟⲩⲱⲛϩ ⲉⲃⲟⲗ ϩⲛ ⲛϩ(ⲉ)ⲗⲗⲏⲛ ⲁⲛ . ⲡϩⲱⲃ ⲅⲁⲣ ⲛⲛⲉⲧⲙⲙⲁⲩ ⲡⲉ ϩⲓⲗⲁ ⲉⲛⲉⲅⲣⲁⲫⲏ ⲛⲟⲩⲟⲉⲓϣ ⲛⲓⲙ . ⲁⲗⲗⲁ ⲉⲁⲥϭⲱⲗⲡ ⲉⲃⲟⲗ ⲛϩⲏⲧⲛ ⲛϭⲓ ⲟⲩⲁⲛⲟⲙⲓⲁ ⲛⲃⲣⲣⲉ ⲉⲧⲉ ⲧⲁⲓ ⲧⲉ ϫⲉ ⲙⲡⲉ ⲙⲁⲣⲓⲁ ⲱ ⲙⲡⲥⲱⲧⲏⲣ . ⲡⲁⲗⲓⲛ ⲟⲛ ϫⲉ ⲡⲉϥⲥⲱⲙⲁ ⲁⲛ ⲙⲛ ⲡⲉϥⲥⲛⲟϥ ⲡⲉⲧⲛϫⲓ ⲉⲃⲟⲗ ⲛϩⲏⲧϥ .

ⲧⲉⲧⲛⲛⲁⲩ ϫⲉ ⲛⲁϣⲉ ⲛⲉⲧⲉ ⲙⲛⲧⲁⲩ ⲡⲛⲟⲩⲧⲉ ⲙⲙⲁⲩ ⲛϩⲏⲧⲛ . ⲛⲑⲉ ϩⲱⲟⲩ ⲛⲛⲓⲁⲧⲛⲟⲩⲧⲉ . ⲏ ⲉⲣⲉ # ⲛⲟⲩⲁ ⲉⲧⲉⲣⲉ ⲛⲓⲁⲧⲛⲟⲩⲧⲉ ϫⲱ ⲙⲙⲟⲟⲩ ⲉϩⲟⲩⲛ ⲉⲡⲉⲭⲣⲓⲥⲧⲟⲥ ⲣ ⲟⲩ ⲛⲧⲟⲟⲩ . ⲛϩⲟⲩⲟ ⲉⲛⲉⲧⲉⲣⲉ ⲛⲉⲧϫⲱ ⲙⲙⲟⲥ . ϫⲉ (ⲉ)ⲛⲥⲟⲟⲩⲛ ⲙⲙⲟϥ ⲧⲁⲟⲩⲟ ⲙⲙⲟⲟⲩ . ⲙⲙⲟⲛ ⲛⲣⲱⲙⲉ ⲛⲧⲁ ⲧⲕⲁⲕⲓⲁ ⲧⲱⲙ ⲛⲛⲉⲩⲃⲁⲗ .

ⲉϣϫⲉ ⲧⲉⲧⲛⲡⲓⲥⲧⲓⲥ ⲧⲉ ⲧⲁⲓ ⲉⲧⲉⲧⲛϣⲗⲏⲗ ⲉⲛⲓⲙ . ⲛⲓⲙ ⲡⲉⲧⲛⲁⲡⲣⲟⲥⲉⲭⲉ ⲉⲣⲱⲧⲛ . ⲏ ⲟⲩⲛⲧⲏⲧⲛ ⲛⲟⲩⲧⲉ ⲣⲱ ⲙⲙⲁⲩ . ⲉϣϫⲉ ⲛⲧⲉⲧⲛϫⲓ ⲁⲛ ⲛⲧⲉⲅⲣⲁⲫⲏ ϩⲙ ⲡⲁⲓ . # ⲉⲧⲉⲧⲛϫⲱ ⲙⲙⲟⲥ ϩⲛ ⲟⲩ ⲏ ⲉⲧⲉⲧⲛⲏⲡ ⲉⲓⲏⲥⲟⲩⲥ ϩⲛ ⲟⲩ . ⲉⲧⲉⲧⲛⲥⲱϣϥ ⲙⲡⲉϥⲥⲱⲙⲁ ⲉⲧⲟⲩⲁⲁⲃ ⲁⲩⲱ ⲡⲉϥⲥⲛⲟϥ ⲉⲧⲧⲁⲉⲓⲏⲩ .

ⲏ ⲉⲧⲃⲉ ⲟⲩ ⲧⲉⲧⲛϫⲓ ⲉⲃⲟⲗ ϩⲙ ⲡⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ ⲙⲏ ⲙⲡⲉⲧⲛϭⲛ ⲟⲉⲓⲕ ⲉⲟⲩⲱⲙ ⲁⲩⲱ ⲏⲣⲡ ⲉⲥⲱ ⲛⲑⲉ ⲛⲧⲁⲛⲥⲉϩ ⲛⲁⲓ ⲛⲕⲉ ⲙⲁ . ⲛⲣⲱⲙⲉ ⲛϩⲩⲡⲟⲕⲣⲓⲧⲏⲥ ⲁⲩⲱ ⲛⲕⲣⲟϥ ⲛⲁ ⲙⲉ ⲛⲭⲣⲓⲥⲧⲓⲁⲛⲟⲥ ⲛⲛⲟⲩϫ . ⲣⲁⲛ ⲛⲧⲟϥ ϫⲉ ⲟⲩⲏⲏⲃ ϩⲓ ⲙⲟⲛⲁⲭⲟⲥ ⲁⲩⲱ ⲁⲣⲭⲏⲅⲟⲥ ϩⲓ ⲉⲓⲱⲧ .

ⲱ ⲟⲩⲟⲉⲓ ⲛⲛⲉⲧϫⲱ ⲛⲛⲁⲓ ⲉⲧⲉⲧⲛⲁⲣ ϫⲁϫⲉ ⲉⲡⲛⲟⲩⲧⲉ ⲉϫⲛ ⲟⲩ . ⲟⲩ ⲡⲉ ⲡϩⲏⲩ ⲉⲧⲛⲁϣⲱⲡⲉ # ⲛⲏⲧⲛ ϩⲙ ⲡⲁⲓ . ⲛϯⲛⲁⲩ ⲁⲛ ⲉⲗⲁⲁⲩ ⲉⲓⲙⲏⲧⲉⲓ ϫⲉ ⲉⲧⲉⲧⲛⲁⲟⲩⲱⲛϩ ⲉⲃⲟⲗ ⲙⲙⲁⲧⲉ ϩⲱⲥ ⲣⲉϥϯⲥⲃⲱ ⲕⲁⲗⲱⲥ ⲛⲛⲁϩⲣⲛ ⲛⲃⲁⲗϩⲏⲧ .

ⲉⲣⲉ ϯⲫⲓⲗⲟⲥⲟⲫⲓⲁ ⲛⲛⲟⲩϫ ⲛⲁⲣ ⲟⲩ ⲛⲏⲧⲛ ⲙⲛ ⲧⲉⲓⲁⲡⲁⲧⲏ ⲉⲧϣⲟⲩⲉⲓⲧ . ⲙⲡⲛⲁⲩ ⲉⲧⲉⲧⲛⲁϯ ⲗⲟⲅⲟⲥ ⲛⲓⲏⲥⲟⲩⲥ ⲥⲁ ⲛⲉⲯⲩⲭⲏ ⲛⲧⲁⲧⲉⲧⲛⲥⲟⲕⲟⲩ ⲉⲧⲉⲧⲛⲡⲗⲁⲛⲏ ϩⲓⲧⲛ ⲧⲥⲟⲫⲓⲁ ⲙⲡⲕⲟⲥⲙⲟⲥ ⲙⲯⲩⲭⲓⲕⲟⲛ ⲙⲙⲛⲧⲣⲉϥϣⲟⲟⲣ .

ⲥⲉⲥϩⲟⲩⲟⲣⲧ ⲛϭⲓ ⲟⲩⲟⲛ ⲛⲓⲙ ⲉⲧϫⲱ ⲛⲧⲉⲓⲙⲛⲧⲁⲥⲉⲃⲏⲥ ⲙⲛ ⲟⲩⲟⲛ ⲛⲓⲙ ⲉⲧⲡⲓⲥⲧⲉⲩⲉ ⲛⲁⲩ ⲉⲩⲥⲱϣϥ ⲙ#ⲡⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ . ⲑⲉⲗⲡⲓⲥ ⲁⲩⲱ ⲡⲱⲛϩ ⲛⲟⲩⲟⲛ ⲛⲓⲙ . ⲁⲩⲱ ⲉⲩⲥⲙⲁⲙⲁⲁⲧ ⲛϭⲓ ⲛⲉⲧϫⲓ ⲉⲃⲟⲗ ⲛϩⲏⲧϥ ϩⲛ ⲟⲩϩⲏⲧ ⲙⲙⲉ .

ⲥⲉⲥϩⲟⲩⲟⲣⲧ ⲇⲉ ⲟⲛ ⲛϭⲓ ⲛⲉⲧϫⲓ ⲉⲃⲟⲗ ⲛϩⲏⲧϥ ϩⲛ ⲟⲩⲙⲛⲧⲁⲡⲓⲥⲧⲟⲥ . ⲙⲁⲗⲗⲟⲛ ⲇⲉ ⲡⲉⲧϩⲟⲙⲟⲗⲟⲅⲉⲓ ⲙⲙⲟϥ ϩⲛ ⲧⲉϥⲧⲁⲡⲣⲟ . ⲉϥϯ ⲛϩⲉⲛⲕⲟⲟⲩⲉ ϫⲉ ⲥⲱⲙⲁ ⲭⲣⲓⲥⲧⲟⲩ ⲁⲓⲙⲁ ⲭⲣⲓⲥⲧⲟⲩ ⲉϥⲁⲣⲛⲁ ⲙⲙⲟϥ ϫⲉ ⲡⲉϥⲥⲱⲙⲁ ⲁⲛ ⲡⲉ . ⲁⲩⲱ ⲡⲉϥⲥⲛⲟϥ ⲁⲗⲏⲑⲱⲥ.

ⲛⲉⲧⲙⲉⲉⲩⲉ ⲉⲡⲁⲓ ⲛϩⲏⲧⲛ ϩⲟⲟⲩ ⲉⲛⲉⲧⲟ ⲛⲁⲧⲥⲟⲟⲩⲛ ⲙⲡⲛⲟⲩⲧⲉ . ⲕⲁⲛ ⲙⲛ ⲣⲱⲙⲉ # ⲛⲉⲩⲥⲉⲃⲏⲥ ⲛⲁ ⲙⲉ ⲛⲁⲥⲕⲁⲛⲇⲁⲗⲓⲍⲉ ⲉⲃⲟⲗ ⲙⲙⲟⲟⲩ . ⲥⲉⲥⲟⲟⲩⲛ ⲅⲁⲣ ϫⲉ ϩⲉⲛⲁⲧⲛⲟⲩⲧⲉ ⲛⲉ ⲫⲁⲛⲉⲣⲟⲛ .

ϩⲁϩ ⲇⲉ ⲛⲧⲟϥ ⲛⲉⲧⲛⲁⲥⲕⲁⲛⲇⲁⲗⲓⲍⲉ ϩⲓⲧⲛ ⲛⲓⲙⲓⲛⲉ ⲛⲣⲱⲙⲉ . ⲉⲩⲣ ⲡⲕⲉ ⲕⲱ ⲛϩⲧⲏⲩ ⲉⲣⲟⲟⲩ ϫⲉ ⲥⲉⲥⲟⲟⲩⲛ . ⲟⲛⲧⲱⲥ ⲟⲩⲛ ϭⲟⲙ ⲛϩⲉⲛⲙⲛⲧⲓⲱⲧ ⲛⲧⲓⲙⲓⲛⲉ . ⲏ ϩⲉⲛⲙⲛⲧⲛⲟϭ ⲉϫⲱϩⲙ ⲛⲛϩⲏⲧ ⲛϩⲁϩ ⲛⲗⲁⲟⲥ ⲉⲙⲁⲧⲉ ϩⲛ ϩⲁϩ ⲛⲧⲟⲡⲟⲥ ⲙⲡⲉⲭⲣⲓⲥⲧⲟⲥ

ⲛⲁⲓ ⲉⲡⲉⲧϣϣⲉ ⲡⲉ ⲉϫⲟⲟⲥ ⲛⲁⲩ ⲛⲧⲉⲓϩⲉ . ϫⲉ ⲕⲁⲛ ⲛⲧⲉⲧⲛⲁⲕⲁⲑⲁⲣⲓⲍⲉ ⲁⲛ ⲧⲉⲯⲩⲭⲏ ⲛϩⲉⲛⲣⲱⲙⲉ ⲛⲁⲧⲛⲟⲩⲧⲉ ⲉⲧⲣⲉⲩⲥⲟⲩⲱⲛϥ . ⲙⲡⲣϫⲱϩⲙ ⲟⲛ ⲛ#ϩⲉⲛⲯⲩⲭⲏ ⲛϩⲉⲛⲣⲙⲛⲛⲟⲩⲧⲉ ϩⲙ ⲡⲧⲣⲉⲧⲛⲙⲉϩ ⲛⲉⲩⲙⲁⲁϫⲉ ϩⲛ ⲛⲓⲥⲃⲱ ⲙⲡⲟⲛⲏⲣⲟⲛ .

ⲁⲓϫⲟⲟⲥ ⲛⲕⲉ ⲥⲟⲡ ϫⲉ ⲉⲧⲃⲉ ⲟⲩ ⲉⲧⲉⲧⲛⲁⲙⲟⲩ ⲱ ⲧⲉⲓⲙⲓⲛⲉ ⲛⲣⲱⲙⲉ ⲛⲁⲑⲏⲧ . ⲟⲩ ⲉⲣⲱⲧⲛ ⲛⲉ ⲛⲉⲓϣⲁϫⲉ ⲉⲧϣⲟⲩⲉⲓⲧ . ⲉⲟⲩⲛ ϭⲟⲙ ⲉⲕⲱⲧ ⲛϩⲉⲛⲧⲃⲁ ⲛⲗⲁⲟⲥ ϩⲛ ⲟⲩⲯⲁⲗⲙⲟⲥ ⲛⲟⲩⲱⲧ . ϫⲉ ⲛⲛⲉⲓϫⲟⲟⲥ ϫⲉ ⲛⲅⲣⲁⲫⲏ ⲧⲏⲣⲟⲩ ⲙⲡⲱⲛϩ .

ⲉⲧⲃⲉ ⲟⲩ ⲧⲉⲧⲛϣⲓⲕⲉ ⲛⲏⲧⲛ ⲛϩⲉⲛϣⲏⲓ ⲉⲩⲟⲩⲟϭⲡ . ⲉⲛⲁϣⲉ ⲛⲉⲧϣⲏⲕ ⲉⲩⲥⲱⲕ ⲉⲃⲟⲗ ϩⲛ ⲧⲡⲩⲅⲏ ⲙⲙⲟⲟⲩ ⲛⲱⲛϩ ⲏ ⲉⲣⲉ ⲧⲡⲩⲅⲏ ⲙ#ⲙⲟⲟⲩ ⲛⲱⲛϩ ⲥⲱⲕ ⲁⲩⲱ ⲉⲥϣⲟⲩⲟ ⲉϩⲟⲩⲛ ⲉⲣⲟⲟⲩ ⲛϩⲟⲩⲟ ⲉϩⲉⲛⲕⲁⲧⲁϩⲣⲁⲕⲧⲏⲥ .

ϣⲓⲡⲉ ϩⲏⲧϥ ⲙⲡⲁⲡⲟⲥⲧⲟⲗⲟⲥ ⲉϥϫⲱ ⲙⲙⲟⲥ ϫⲉ ϯⲟⲩⲉϣ ϯⲟⲩ ⲛϣⲁϫⲉ ⲉϫⲟⲟⲩ ϩⲙ ⲡⲁϩⲏⲧ . ⲉϩⲟⲩⲉ ⲟⲩⲧⲃⲁ ⲛϣⲁϫⲉ ϩⲛ ⲧⲁⲥⲡⲉ . ⲛⲁⲛⲟⲩ ϩⲉⲛⲕⲟⲩⲓ ⲅⲁⲣ ⲉϫⲟⲟⲩ ⲉⲩⲣ ϩⲟⲩⲉ ⲥⲟⲟϩⲉ ⲛⲛⲉⲧⲥⲱⲧⲙ . ⲛϩⲟⲩⲟ ⲉⲟⲩⲁϣⲏ . ⲟⲩⲙⲟⲛⲟⲛ ϫⲉ ⲙⲛ ϩⲏⲩ ⲛϩⲏⲧⲟⲩ ⲁⲗⲗⲁ ⲉⲩϣⲟⲣϣⲣ ⲛⲛⲉⲧⲥⲱⲧⲙ .

ⲛⲉⲧⲃⲣⲃⲣ ϩⲙ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲉⲩϣⲁϫⲉ ϩⲛ ⲛⲉⲅⲣⲁⲫⲏ . ⲉⲙⲉⲩⲣ ⲭⲣⲓⲁ ⲛϩⲉⲛⲕⲉ ϣⲁϫⲉ ϣⲃⲟⲗ ϩⲛ ϩⲉⲛϫⲱⲱⲙⲉ ⲉⲩⲟ ⲛϣⲙⲙⲟ ⲉⲣⲟⲥ . #

ⲙⲏⲧ ⲛϣⲁϫⲉ ⲛⲉ ⲛⲧⲁ ⲡⲛⲟϭ ⲙⲡⲣⲟⲫⲏⲧⲏⲥ ⲙⲱⲩⲥⲏⲥ ⲛⲧⲟⲩ ⲉϩⲣⲁⲓ ⲉϥⲛⲏⲩ ϩⲣⲁⲓ ϩⲓ ⲡⲧⲟⲟⲩ . ⲉⲩⲥⲏϩ ϩⲙ ⲡⲧⲏⲏⲃⲉ ⲙⲡⲛⲟⲩⲧⲉ . ⲁⲩⲱ ⲛⲧⲁ ⲛⲓϣⲁϫⲉ ⲧⲏⲣⲟⲩ ⲉⲓ ⲧⲱⲛ ϩⲛ ⲛⲉϥϫⲱⲱⲙⲉ ⲧⲏⲣⲟⲩ . ⲙⲏ ⲉⲃⲟⲗ ⲁⲛ ϫⲉ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ⲡⲉⲧⲉⲛⲉⲣⲅⲉⲓ ⲛϩⲏⲧϥ ⲁⲩⲱ ⲡⲉϥⲡⲛⲉⲩⲙⲁ .

ⲟⲩⲁⲧϭⲟⲙ ⲡⲉ ⲉⲧⲣⲉ ⲣⲱⲙⲉ ⲉϥϣⲁϫⲉ ϩⲙ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϫⲟⲟⲥ ⲉⲛⲉϩ ϫⲉ ⲡⲙⲩⲥⲧⲏⲣⲓⲟⲛ ⲁⲛ ⲉⲧⲟⲩⲁⲁⲃ . ⲡⲉ ⲡⲥⲱⲙⲁ ⲁⲩⲱ ⲡⲉⲥⲛⲟϥ ⲙⲡⲉⲭⲣⲓⲥⲧⲟⲥ . ⲁⲩⲱ ⲙⲛ ϭⲟⲙ ⲛⲣⲱⲙⲉ # ⲉϫⲟⲟⲥ ϫⲉ ⲡⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ ⲡⲉ ⲡⲥⲱⲙⲁ ⲁⲩⲱ ⲡⲉⲥⲛⲟϥ ⲛⲓⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡϣⲏⲣⲉ ⲙⲡⲛⲟⲩⲧⲉ ⲉⲓⲙⲏⲧⲉⲓ ϩⲛ ⲟⲩⲡⲛⲉⲩⲙⲁ ⲉϥⲟⲩⲁⲁⲃ .

ϫⲱⲱⲙⲉ ⲅⲁⲣ ⲛⲓⲙ ⲙⲡⲃ(ⲟ)ⲗ ⲛⲛⲉⲅⲣⲁⲫⲏ . ⲉⲓⲧⲉ ⲛⲁ ⲛϩ(ⲉ)ⲗⲗⲏⲛ . ⲉⲓⲧⲉ ⲛⲁ ϩⲉⲑⲛⲟⲥ ⲛⲓⲙ ⲛⲁⲧⲛⲟⲩⲧⲉ ⲉⲓⲧⲉ ⲛⲁ ⲛϩⲁⲓⲣⲉⲧⲓⲕⲟⲥ . ϩⲉⲛⲡⲛⲉⲩⲙⲁ ⲛⲥⲱⲣⲙ ⲛⲉⲧϣⲟⲟⲡ ⲛϩⲏⲧⲟⲩ . ⲁⲩⲱ ϣⲁϩⲣⲁⲓ ⲉⲛⲕⲉ ⲁⲡⲟⲕⲣϯⲫⲟⲛ ⲉϣϫⲉ ⲥⲉⲧⲁⲟⲩⲟ ⲙⲡⲣⲁⲛ ⲙⲡⲛⲟⲩⲧⲉ ⲛϩⲏⲧⲟⲩ . ⲏ ⲥⲉϫⲱ ⲛϩⲉⲛϣⲁϫⲉ ⲉⲩⲥⲙⲟⲛⲧ . ϣⲁⲣⲉ ⲛⲉⲑⲟⲟⲩ ⲧⲏⲣⲟⲩ ⲉⲧⲥⲏϩ ⲉⲣⲟⲟⲩ ⲧⲁⲕⲟ ⲙⲡⲕⲉ ⲟⲩⲁ ⲉⲧⲛⲁⲛⲟⲩϥ .

ⲙⲏ ⲛⲉⲩϣⲁϫⲉ ⲛⲧⲟϥ # ⲁⲛ ⲛⲉ ⲛⲁⲓ ⲛⲑⲉ ⲟⲛ ⲛⲛⲉⲛⲧⲁⲛⲣ ϣⲣⲡ ϫⲟⲟⲩ ⲧⲉⲛⲟⲩ ⲉⲩⲥⲏϩ ϩⲛ ⲛⲁⲡⲟⲕⲣⲩⲫⲟⲛ . ⲉⲩϫⲱ ⲙⲙⲟⲥ ⲉⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ . ϫⲉ ⲡⲉⲧⲡⲏⲧ ϩⲙ ⲡⲉⲇⲣⲟⲙⲟⲥ ⲙⲡⲣⲏ ⲁⲩⲱ ϫⲉ ⲡⲙⲟⲩϩ ⲙⲡⲟⲟϩ ⲉϥⲁⲩⲝⲁⲛⲉ ⲛⲛϣⲏⲛ ⲙⲛ ⲛⲧⲃⲛⲟⲟⲩⲉ .

ⲱ ⲧⲙⲛⲧⲁⲥⲉⲃⲏⲥ . ⲏ ⲟⲩⲙⲛⲧⲁⲥⲉⲃⲏⲥ ⲁⲛ ⲡⲉ ϫⲟⲟⲥ ϫⲉ ⲡⲛⲟⲩⲧⲉ ⲙⲡⲧⲏⲣϥ ⲉϥⲡⲏⲧ ϩⲙ ⲡⲣⲏ . ⲁⲩⲱ ⲉϥⲙⲟⲩϩ ϩⲙ ⲡⲟⲟϩ . ⲙⲏ ⲛⲧⲟϥ ⲁⲛ ⲡⲉⲧⲧⲣⲉ ⲡⲣⲏ ⲡⲱⲧ ϩⲛ ⲧⲉϥⲗⲓⲧⲟⲩⲣⲅⲓⲁ ϩⲙ ⲡⲉϥⲟⲩⲉϩⲥⲁϩⲛⲉ . ⲁⲩⲱ ⲟⲛ ⲉⲣⲉ ⲡⲟⲟϩ ⲙⲟⲩϩ ϩⲙ ⲡⲉϥⲟⲩⲉϩⲥⲁϩⲛⲉ .

ⲏ ⲡⲟⲟϩ ⲡⲉⲧⲁⲩⲝⲁⲛⲉ ⲛⲛϣⲏⲛ # ⲙⲛ ⲛⲧⲃⲛⲟⲟⲩⲉ . ⲙⲏ ⲉⲩⲁⲩⲝⲁⲛⲉ ⲧⲏⲣⲟⲩ ⲁⲛ ⲉⲃⲟⲗ ϩⲓⲧⲙ ⲡⲛⲟⲩⲧⲉ ⲏ ⲛⲧⲟϥ ⲡⲉⲧⲣ ⲟⲩⲟⲉⲓⲛ ⲉⲛⲁⲥⲧⲏⲣ ⲧⲏⲣⲟⲩ ⲕⲁⲧⲁ ⲙⲉⲣⲟⲥ ⲛⲑⲉ ⲉⲧⲉⲣⲉ ⲛⲁⲓ ϫⲱ ⲙⲙⲟⲥ ϫⲉ ⲉⲩⲟ ⲛⲁⲫⲟⲣⲙⲏ ⲛϣⲙϣⲉ ⲙⲡⲥⲱⲛⲧ .

ⲁⲗⲗⲁ ⲛⲉⲅⲣⲁⲫⲏ ϯ ⲟⲩⲃⲉ ⲧⲉⲩⲙⲛⲧⲁⲑⲏⲧ . ⲡⲣⲏ ⲅⲁⲣ ⲁⲩⲱ ⲡⲟⲟϩ ⲙⲛ ⲛⲥⲓⲟⲩ ⲁⲩⲱ ⲛⲉϩⲟⲟⲩ ⲙⲛ ⲛⲉⲩϣⲟⲟⲩⲉ . ⲁⲩⲱ ⲛⲧⲏⲩ ⲙⲛ ⲛⲉⲕⲗⲟⲟⲗⲉ . ⲁⲩⲱ ⲡⲧⲁⲙⲓⲟ ⲧⲏⲣϥ ⲉϥⲕⲓⲙ ⲁⲛ ⲛϩⲏⲧⲟⲩ ⲁⲗⲗⲁ ⲉⲩⲕⲓⲙ ⲧⲏⲣⲟⲩ ⲁⲩⲱ ⲉⲩⲉⲛ(ⲉ)ⲣⲅⲉⲓ ϩⲙ ⲡⲉϥⲟⲩⲉϩⲥⲁϩⲛⲉ . ⲉⲛϥⲕⲓⲙ ⲁⲛ ⲛⲧⲟϥ . ⲡⲁⲓ ϩⲱⲱⲛ ⲉⲧⲛⲕⲓⲙ ⲛϩⲏⲧϥ ⲛⲑⲉ ⲉⲧⲥⲏϩ . ϫⲉ ⲉⲛϣⲟⲟⲡ # ⲅⲁⲣ ⲛϩⲏⲧϥ ⲁⲩⲱ ⲉⲛ ⲕⲓⲙ .

ⲉⲧⲃⲉ ⲧⲁⲛⲁⲥⲧⲁⲥⲓⲥ ⲇⲉ ⲛⲉⲛⲧⲁⲩⲙⲟⲩ ϩⲛ ⲙⲙⲟⲩⲛⲉⲓⲟⲟⲩⲉ ⲛⲉⲛⲧⲁⲩⲣⲟⲕϩⲟⲩ ϩⲙ ⲡⲕⲱϩⲧ ⲁⲩⲱ ⲛⲉⲧϩⲛ ⲛⲧⲁⲫⲟⲥ ⲧⲁⲛⲁⲅⲕⲏ ⲧⲉ ⲉⲧⲣⲉⲩⲧⲱⲟⲩⲛ ⲧⲏⲣⲟⲩ . ⲁⲩⲱ ⲛⲉⲛⲧⲁ ⲛⲉⲑⲏⲣⲓⲟⲛ ⲟⲩⲟⲙⲟⲩ ⲙⲛ ⲛⲉⲛⲧⲁⲩⲙⲟⲩ ϩⲛ ϩⲉⲛⲕⲉ ⲥⲙⲟⲧ ⲉⲩϣⲟⲃⲉ ϩⲁⲡⲥ ⲡⲉ ⲉⲧⲣⲉⲩⲧⲱⲟⲩⲛ ⲧⲏⲣⲟⲩ ⲕⲁⲧⲁ ⲛⲉⲅⲣⲁⲫⲏ .

ⲏ ⲉⲧⲃⲉ ⲟⲩ ⲡⲁⲓ ⲟ ⲛⲁⲡⲓⲥⲧⲟⲛ ⲛⲛⲁϩⲣⲏⲧⲛ ⲉⲁⲧⲉⲫⲩⲥⲓⲥ ⲛⲛⲣⲱⲙⲉ ⲟⲩⲱ ⲉⲥϫⲓ ⲧⲓⲡⲉ ⲙⲙⲟϥ . ⲕⲁⲓⲅⲁⲣ ⲁⲡϫⲟⲉⲓⲥ ⲙⲛ ⲛⲉϥⲡⲉⲧⲟⲩⲁⲁⲃ ⲧⲟⲩⲛⲉⲥ ϩⲉⲛⲕⲟⲟⲩⲉ ⲉⲩⲙⲁⲉⲓⲛ ⲛⲧⲛⲟϭ ⲛⲁⲛⲁⲥⲧⲁⲥⲓⲥ ⲙⲡⲉϩⲟⲟⲩ # ⲉⲧⲉϥⲛⲁⲥⲁⲗⲡⲓⲍⲉ ⲛⲧⲉ ⲛⲉⲧⲙⲟⲟⲩⲧ ⲧⲱⲟⲩⲛ ⲉⲩⲟ ⲛⲁⲧⲧⲁⲕⲟ . ⲁⲩⲱ ⲁⲛⲟⲛ ⲛⲧⲛϣⲓⲃⲉ ⲛⲑⲉ ⲉⲧⲥⲏϩ . ϫⲉ ⲡⲁⲓ ⲉⲧⲛⲁϣⲓⲃⲉ ⲙⲡⲥⲱⲙⲁ ⲙⲡⲉⲛⲑⲃⲃⲓⲟ ⲉⲡⲉⲓⲛⲉ ⲙⲡⲥⲱⲙⲁ ⲙⲡⲉϥⲉⲟⲟⲩ .

ⲛⲑⲉ ⲟⲛ ⲛⲧⲁϥϫⲟⲟⲥ ⲛⲧⲟϥ ⲡϫⲟⲉⲓⲥ ϫⲉ ⲟⲩⲛ ⲟⲩⲟⲩⲛⲟⲩ ⲛⲏⲩ ⲉⲣⲉ ⲟⲩⲟⲛ ⲛⲓⲙ ⲉⲧϩⲛ ⲛⲧⲁⲫⲟⲥ ⲛⲁⲥⲱⲧⲙ ⲉⲧⲉⲥⲙⲏ ⲙⲡϣⲏⲣⲉ ⲙⲡⲛⲟⲩⲧⲉ ⲁⲩⲱ ⲛⲥⲉⲉⲓ ⲉⲃⲟⲗ . ⲏ ⲉⲣⲉ ⲡⲉϩⲣⲟⲟⲩ ⲛⲧⲥⲁⲗⲡⲓⲅⲝ ⲉⲧⲟⲩⲛⲁ ⲥⲁⲗⲡⲓⲍⲉ ⲙⲙⲟⲥ ⲛϭⲓ ϩⲁⲛⲁⲣⲭⲁⲅⲅⲉⲗⲟⲥ ⲛⲧⲉ ⲛⲉⲧⲙⲟⲟⲩⲧ ϫⲓⲛ ⲛϣⲟⲣⲡ ⲧⲱⲟⲩⲛ ⲉⲩⲟ ⲛⲁⲧⲧⲁⲕⲟ . ⲉⲩϫⲓ ⲛϩⲉⲛϩⲃⲏⲩⲉ ⲧⲏⲣⲟⲩ ⲉⲣⲟⲟⲩ . ⲏ ⲉⲩⲁϩⲉ ⲛϩⲉⲛⲙⲏⲏϣⲉ ⲛϣⲁϫⲉ #

ⲏ ⲟⲩⲛ ϩⲉⲛⲕⲉ ⲧⲱϣ ⲏ ϩⲉⲛⲕⲉ ⲧⲩⲡⲟⲥ ⲉⲣⲉ ⲛⲉⲧⲙⲟⲟⲩⲧ ⲛⲁⲧⲱⲟⲩⲛ ⲛϩⲏⲧⲟⲩ ⲛϩⲟⲩⲟ ⲉⲛⲉⲛⲧⲁⲩⲟⲩⲱ ⲉⲩⲧⲱⲟⲩⲛ . ⲛⲧⲁⲓⲧⲁⲟⲩⲉ ⲛⲁⲓ ⲉⲓϯ ⲟⲩⲃⲉ ⲧⲉⲧⲛⲙⲛⲧⲁⲧⲛⲁϩⲧⲉ . ⲙⲙⲟⲛ ϯⲥⲟⲟⲩⲛ ϫⲉ ⲙⲛ ⲧⲟⲡⲟⲥ ⲟⲩⲇⲉ ⲕⲗϫⲉ ϩⲛ ⲧⲟⲓⲕⲟⲩⲙⲉⲛⲏ ⲧⲏⲣⲥ ϫⲉ ⲛⲥⲉⲛⲁⲛⲟⲉⲓⲛ ⲁⲛ ⲉⲩⲥⲱⲧⲙ ⲉⲡⲉϩⲣⲟⲟⲩ ⲛϩⲉⲛⲁⲣⲭⲁⲅⲅⲉⲗⲟⲥ ⲉⲩⲱϣ ⲉⲃⲟⲗ ϩⲛ ⲧϭⲟⲙ ⲙⲡⲇⲩⲙⲓⲟⲩⲣⲅⲟⲥ ⲙⲡⲧⲏⲣϥ ⲡⲛⲟⲩⲧⲉ ⲥⲁⲃⲁⲱⲑ .

ϩⲙ ⲡⲉϩⲣⲟⲟⲩ ⲅⲁⲣ ⲉⲧⲙⲙⲁⲩ ⲙⲡⲉⲧⲣⲁ ⲁⲩⲱ ⲛⲧⲟⲟⲩ ⲥⲉⲛⲁⲡⲱϩ . ⲁⲩⲱ ⲡⲕⲁϩ ⲧⲏⲣϥ ⲛⲁⲡⲱϩ . ⲁⲩⲱ ⲛⲧⲁⲫⲟⲥ ⲛⲁⲟⲩⲱⲛ # ⲁⲩⲱ ⲛⲉⲧⲧⲟⲙⲥ ϩⲙ ⲙⲁ ⲛⲓⲙ ⲥⲉⲛⲁⲧⲱⲟⲩⲛ ⲧⲁⲭⲏ . ⲁⲩⲱ ⲛⲧⲟⲡⲟⲥ ⲉⲧⲟⲩⲛϩⲏⲧⲟⲩ ⲥⲉⲛⲁⲟⲩⲱⲛ ⲧⲁⲭⲏ . ⲛⲥⲉⲧⲙϩⲱⲡ ⲛϭⲓ ⲛⲥⲱⲙⲁ ⲛⲛⲉⲧⲙⲟⲟⲩⲧ .

ⲁⲩⲱ ⲛⲥⲉⲣ ⲭⲣⲓⲁ ⲁⲛ ⲛⲥⲕⲣⲕⲣ ϩⲉⲛⲱⲛⲉ ⲉⲃⲟⲗ ϩⲓⲣⲛ ϩⲉⲛⲙϩⲁⲁⲩ ⲏ ⲛⲧⲟϥ ϩⲉⲛⲕⲉ ⲙⲁ ⲉⲟⲩⲱⲛ ⲉⲣⲟⲟⲩ ⲏ ⲉϭⲟⲗⲡⲟⲩ ⲉⲃⲟⲗ ⲉⲩⲕⲏ ⲛϩⲏⲧⲟⲩ ⲛϭⲓ ⲛⲥⲱⲙⲁ ⲉⲧⲙⲟⲟⲩⲧ . ⲛⲑⲉ ⲛⲧⲁ ⲡϫⲟⲉⲓⲥ ϫⲟⲟⲥ ⲙⲡⲉⲓⲟⲩⲟⲉⲓϣ ϫⲉ ϥⲓ ⲡⲱⲛⲉ ⲙⲙⲁⲩ ⲙⲡⲥⲟⲡ ⲛⲧⲁⲧⲟⲩⲛⲉⲥ ⲗⲁⲍⲁⲣⲟⲥ . ⲉⲁϥⲣ ⲡⲁⲓ ⲕⲁⲧⲁ ⲟⲩⲟⲓⲕⲟⲛⲟⲙⲓⲁ .

ϩⲙ ⲡⲉϩⲟⲟⲩ ⲇⲉ ⲛⲧⲟϥ ⲉⲧⲙⲙⲁⲩ ⲁⲓⲟⲩⲱ ⲉⲓϫⲱ ⲙⲙⲟⲥ # ϫⲉ ⲡⲕⲁϩ ⲛⲁϣⲧⲟⲣⲧⲣ ϫⲓⲛ ⲛⲉϥⲥⲛⲧⲉ ⲁⲩⲱ ⲛⲓⲙ ⲡⲉⲧⲛⲁⲥⲱⲧⲙ ⲉⲡⲉϩⲣⲟⲟⲩ ⲙⲡϣⲏⲣⲉ ⲙⲡⲛⲟⲩⲧⲉ ⲛϥⲧⲙⲧⲱⲟⲩⲛ ⲛⲑⲉ ⲉⲧⲥⲏϩ . ⲏ ⲁϣ ⲛⲧⲁⲫⲟⲥ ⲡⲉⲧⲛⲁⲁⲙⲁϩⲧⲉ ⲙⲙⲟⲟⲩ ⲉⲧⲙⲉⲓ ⲉⲃⲟⲗ . ⲛⲧⲉⲓϩⲉ ⲟⲛ ⲧⲉⲑⲁⲗⲁⲥⲥⲁ ⲙⲛ ⲛⲓⲉⲣⲱⲟⲩ.

ϩⲙ ⲡⲉϩⲟⲟⲩ ⲅⲁⲣ ⲉⲧⲙⲙⲁⲩ ⲧⲟⲧⲉ ⲥⲉⲛⲁⲧⲉⲗⲏⲗ ⲛϭⲓ ⲛϣⲏⲛ ⲧⲏⲣⲟⲩ ⲛⲧⲥⲱϣⲉ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ϫⲉ ϥⲛⲏⲩ ⲉⲕⲣⲓⲛⲉ ⲙⲡϫⲁϩ . ϩⲙ ⲡϩⲟⲟⲩ ⲉⲧⲙⲙⲁⲩ ⲥⲉⲛⲁⲱⲕⲙ ⲛⲥⲉⲑⲃⲃⲓⲟ ⲛϭⲓ ⲛϣⲏⲛ ⲧⲏⲣⲟⲩ ⲛⲧⲥⲱϣⲉ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ϫⲉ ϥⲛⲏⲩ ⲉⲕⲣⲓⲛⲉ # ⲙⲡⲕⲁϩ .

ⲁⲣⲁ ⲉⲓϣⲁϫⲉ ⲟⲩⲃⲉ ϩⲉⲛϣⲏⲛ ϩⲛ ⲧⲥⲱϣⲉ . ⲙⲏ ⲧⲕⲁⲉⲓ ⲁⲛ ⲡⲉ ⲡⲕⲟⲥⲙⲟⲥ . ⲛⲑⲉ ⲛⲧⲁⲛϫⲉ ⲡⲁⲓ ⲛϩⲁϩ ⲛⲥⲟⲡ ⲁⲩⲱ ⲛⲣⲱⲙⲉ ⲛⲉ ⲛϣⲏⲛ . ⲛⲉⲅⲣⲁⲫⲏ ⲙⲉⲛ ⲙⲙⲁⲥⲧⲫⲑⲟⲛⲉⲓ ⲉⲣⲱⲙⲉ ⲛⲓⲙ ⲥⲉϫⲱ ⲙⲙⲟⲥ ϫⲉ ⲥⲉⲛⲁⲧⲉⲗⲏⲗ ⲧⲏⲣⲟⲩ .

ⲁⲛⲟⲛ ⲇⲉ ⲛⲉⲧⲡⲟⲛⲏⲣⲉⲩⲉ ⲉⲣⲟⲛ ⲙⲁⲩⲁⲁⲛ . ⲙⲙⲟⲛ ⲥⲉⲛⲁⲣⲁϣⲉ ⲛϭⲓ ⲣⲱⲙⲉ ⲛⲓⲙ ϩⲙ ⲡⲉϩⲟⲟⲩ ⲉⲧⲙⲙⲁⲩ . ⲉⲩⲛⲁϭⲛ ⲣⲁϣⲉ ⲧⲱⲛ ⲛϭⲓ ⲛϣⲏⲛ ⲉⲧⲉⲣⲉ ⲡⲕⲉⲗⲉⲃⲓⲛ ⲕⲏ ϩⲁ ⲧⲉⲩⲛⲟⲩⲛⲉ . ⲉⲩⲥⲃⲧⲱⲧ ⲉϣⲁⲁⲧⲟⲩ ⲉⲛⲟϫⲟⲩ ⲉⲡⲕⲱϩⲧ .

ⲏ ⲟⲩⲥⲟⲡ ⲡⲉ ⲛⲧⲁⲛϫⲉ ⲡⲉⲧⲥⲏϩ ϩⲙ ⲡⲉⲡⲣⲟⲫⲏⲧⲏⲥ ϫⲉ ⲙⲛ ⲣⲁϣⲉ ϣⲟⲟⲡ # ⲛⲛⲁⲥⲉⲃⲏⲥ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ . ⲛⲁⲓ ⲉⲧⲉ ⲙⲡⲟⲩⲥⲟⲩⲱⲛϥ . ⲁⲗⲗⲁ ⲛⲉⲩⲥⲉⲃⲏⲥ ⲙⲡⲓⲥⲧⲟⲥ ⲙⲁⲩⲁⲁⲩ ⲛⲉⲧⲛⲁⲥⲱⲧⲙ ⲉⲡⲁⲓ ϫⲉ ⲃⲱⲕ ⲉϩⲟⲩⲛ ⲉⲡⲣⲁϣⲉ ⲙⲡⲉⲧⲛϫⲟⲉⲓⲥ .

ⲛⲁⲓ ⲛⲉ ⲛϣⲏⲛ ⲉⲧⲥⲧⲁⲧⲉⲛ ⲛⲉⲩⲕⲗⲁⲇⲟⲥ ⲉⲧⲉ ⲛⲣⲱⲙⲉ ⲛⲉ ⲉⲧⲉⲣⲉ ⲛⲉⲩⲡⲣⲁⲝⲓⲥ ⲛⲁⲅⲁⲑⲟⲛ ϩⲏⲡ ⲁⲛ ⲉⲛⲣⲱⲙⲉ ⲙⲁⲗⲓⲥⲧⲁ ⲓⲏⲥⲟⲩⲥ . ⲛⲁⲓ ⲛⲉⲧⲉⲣⲉ ⲛⲧⲟⲟⲩ ⲙⲛ ⲛⲥⲓⲃⲧ ⲉⲧⲉ ⲛⲉⲡⲣⲟⲫⲏⲧⲏⲥ ⲛⲉ ⲙⲛ ⲛ ⲁⲡⲟⲥⲧⲟⲗⲟⲥ ⲙⲛ ⲛⲉⲧⲟⲩⲁⲁⲃ ⲧⲏⲣⲟⲩ ϭⲱϣⲧ ⲉⲃⲟⲗ ϩⲏⲧⲟⲩ ⲉⲧⲣⲉⲩϣⲱⲡⲉ ϩⲁⲧⲏⲩ ϩⲛ ⲧⲙⲛⲧⲉⲣⲟ ⲛⲙⲡⲏⲩⲉ .

ⲛⲧⲁⲓϫⲉ ⲛⲁⲓ ⲉⲧⲃⲉ ⲛⲉⲧ#ϫⲱ ⲙⲙⲟⲥ ϫⲉ ⲙⲛ ⲁⲛⲁⲥⲧⲁⲥⲓⲥ ⲛⲁϣⲱⲡⲉ . ⲛⲁⲓ ⲉⲧⲧⲛⲧⲱⲛ ⲉⲛϩ(ⲉ)ⲗⲗⲏⲛ ⲉⲧⲡⲉⲣⲉ ⲣⲁⲥⲟⲩ ⲁⲩⲱ ⲉⲧϫⲱ ⲙⲙⲟⲥ ϫⲉ ⲛⲧⲁ ⲡⲥⲱⲙⲁ ϣⲱⲡⲉ ⲉⲃⲟⲗ ϩⲙ ⲡⲉϥⲧⲟⲟⲩ ⲛⲥⲧⲟⲓⲭⲉⲓⲟⲛ ⲡⲙⲟⲟⲩ ⲙⲛ ⲡⲕⲁϩ ⲙⲛ ⲡⲁⲏⲣ ⲙⲛ ⲡⲕⲱϩⲧ ⲁⲩⲱ ϫⲉ ⲥⲉ ⲛⲁⲃⲱⲗ ⲉⲃⲟⲗ ⲛⲥⲉⲕⲧⲟⲟⲩ ⲛⲕⲉ ⲥⲟⲡ ⲉϩⲟⲩⲛ ⲉⲛⲉⲥⲧⲟⲓⲭⲓⲟⲛ ⲛⲧⲁⲩϣⲱⲡⲉ ⲉⲃⲟⲗ ⲛϩⲏⲧⲟⲩ ⲛϭⲓ ⲛⲥⲱⲙⲁ ⲕⲁⲧⲁ ⲛⲉ{ⲥ}ⲃⲱ ⲛⲛⲉⲧⲙⲙⲁⲩ ⲛⲁⲓ ⲉⲧⲉ ⲛⲥⲉⲡⲓⲥⲧⲉⲩⲉ ⲁⲛ . ϫⲉ ⲁⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ϫⲓ ⲛⲟⲩ#ⲕⲁϩ ⲉⲃⲟⲗ ϩⲙ [ⲕⲁϩ ⲁϥⲡⲗⲁⲥⲥⲉ ⲙⲡⲣⲱⲙⲉ .

ϯ ϩⲧⲏⲕ ϫⲉ ⲉⲃⲟⲗ ϩⲙ ⲡⲕⲁϩ ⲁⲩⲱ ⲉⲃⲟⲗ ⲁⲛ ϩⲛ ϩⲉⲛⲕⲉ ⲥⲧⲟⲓⲭⲓⲟⲛ . ⲁϥⲡⲗⲁⲥⲥⲉ ⲙⲙⲟϥ ⲁϥⲛⲓϥⲉ ⲉϩⲟⲩⲛ ⲉϩⲣⲁϥ ⲁⲡⲣⲱⲙⲉ ϣⲱⲡⲉ ⲉⲩⲯⲩⲭⲏ ⲉⲥⲟⲛϩ . ⲡⲁⲓ ⲟⲛ ⲉⲧⲉϥⲛⲁⲧⲟⲩⲛⲟⲥϥ̇ ⲕⲁⲧⲁ ⲛⲉⲅⲣⲁⲫⲏ.

ⲁⲗⲗⲁ ⲛⲁⲓ ⲙⲉⲛ ⲉⲩⲁⲣⲛⲁ ⲛ̇ⲧⲁⲛⲁⲥⲧⲁⲥⲓⲥ ⲁⲡⲗⲟⲅⲟⲥ ⲟⲩⲟⲛϩⲟⲩ ⲉⲃⲟⲗ ϫⲉ ϩⲉⲛⲁⲑⲏⲧ ⲛⲉ . ⲙⲁⲣⲉⲛⲛⲁⲩ ⲇⲉ ⲟⲛ ϫⲉ ⲟⲩ ⲡⲉⲧⲟⲩⲥⲟⲫⲓⲍⲉ ⲙⲙⲟϥ ⲛϭⲓ ⲛⲉⲧϫⲱ ⲙⲙⲟⲥ ⲉⲡⲥⲱⲙⲁ ϫⲉ ⲟⲩⲉⲃⲟⲗ ⲡⲉ ϩⲛ ⲛⲉⲥⲧⲟⲓⲭⲉⲓⲟⲛ ⲕⲁⲧⲁ ⲡⲉⲛⲧⲁⲓϣⲣⲡ ϫⲟ(ⲟ)ϥ .

ⲥⲉϫⲱ ϭⲉ ⲙⲙⲟⲥ ⲛⲧⲉⲓϩⲉ ϫⲉ ⲙⲛⲛⲥⲁ ⲧⲣⲉ # ⲡⲣⲱⲙⲉ ⲉⲓ ⲉⲃⲟⲗ ϩⲙ ⲡⲉⲓⲃⲓⲟⲥ ⲛⲁⲙⲛⲧⲉ ϣⲁⲣⲉ ⲛⲥⲱⲙⲁ ⲃⲱⲗ ⲉⲃⲟⲗ ⲉⲛⲉⲥⲧⲟⲓⲭⲉⲓⲟⲛ ⲛⲑⲉ ⲉⲛⲉⲩⲟ ⲙⲙⲟⲥ ⲛϣⲟⲣⲡ ⲛⲥⲉⲕⲧⲟⲟⲩ ⲟⲛ ⲛⲥⲉϫⲡⲟⲟⲩ .

ⲉⲓⲧⲁ ⲉⲩⲥⲩⲛϩⲓ(ⲥ)ⲧⲁ ⲛⲛⲉⲩϣⲁϫⲉ ⲉⲧⲥϩⲟⲩⲟⲣⲧ . ϣⲁⲩϫⲟⲟⲥ ϫⲉ ⲛⲅⲛⲁⲩ ⲁⲛ ⲉⲡϣⲏⲣⲉ ϣⲏⲙ ⲉϣⲁⲩϫⲡⲟϥ ⲉϥⲕⲱⲧⲉ ⲛⲥⲁ ⲧⲉⲕⲓⲃⲉ ⲧⲁⲭⲏ . ⲛⲓⲙ ⲡⲉⲛⲧⲁϥⲧⲥⲁⲃⲟϥ — ⲡⲉϫⲁⲩ — ⲉⲟⲩⲱⲛ ⲛⲣⲱϥ ⲏ ⲉⲥⲟⲩⲧⲛ ⲛⲉϥϭⲓϫ ⲉⲃⲟⲗ ⲉⲧⲉⲕⲓⲃⲉ ⲏ ⲉⲧⲣⲉϥϯ ⲛⲧⲉϥⲥⲙⲏ ⲉⲡⲧⲏⲣϥ ⲉⲓⲙⲏⲧⲉⲓ ϫⲉ ⲁⲩϫⲡⲉ ⲑⲩⲗⲏ ⲛⲕⲉ ⲁϣⲏ ⲛⲥⲟⲡ ⲁⲥⲣ ⲥⲱⲙⲁ . ⲉⲧⲃⲉ ⲡⲁⲓ ⲟⲩⲛⲧⲁⲥ ⲙⲡⲣⲡⲙⲉⲉⲩⲉ ⲛⲛⲉⲛⲧⲁⲥⲁⲁⲩ ⲛϩⲁϩ ⲛⲥⲟⲡ ⲉⲩϫⲡⲟ # ⲙⲙⲟⲥ ϩⲛ ⲛⲥⲱⲙⲁ .

ⲛⲛⲉⲓϥⲓ ⲣⲟⲟⲩϣ ⲁⲛ ϩⲁ ϩⲉⲛϣⲁϫⲉ ⲉⲙⲛ ϯⲡⲉ ⲙⲙⲟⲟⲩ . ⲛⲥⲉⲙⲡϣⲁ ⲅⲁⲣ ⲁⲛ ⲛϫⲟⲟⲩ ⲟⲩⲧⲉ ⲛⲥⲱⲧⲙ ⲉⲣⲟⲟⲩ . ⲁⲗⲗⲁ ⲛⲧⲁⲓⲥϩⲁⲓⲥⲟⲩ ϩⲛ ⲟⲩⲟⲩⲱⲛϩ ⲉⲃⲟⲗ ⲉⲓϥⲓ ⲣⲟⲟⲩϣ ϩⲁ ⲛⲉⲧⲙⲯⲩⲭⲏ ⲁⲩⲱ ϫⲉⲕⲁⲥ ⲉⲣⲉ ⲛⲉⲩϣⲓⲡⲉ ⲛⲁϭⲟⲗⲡ ⲉⲃⲟⲗ ⲉⲟⲩⲟⲛ ⲛⲓⲙ .

ⲁⲩⲱ ϫⲉ ⲕⲁⲛ ⲉϣϣⲉ ⲉⲉⲗⲉⲅⲭⲉ ⲛⲧⲉⲩⲡⲗⲁⲛⲏ ⲉⲃⲟⲗ ϩⲛ ϩⲁϩ ⲙⲙⲁ ϩⲛ ⲛⲉⲅⲣⲁⲫⲏ . ⲁⲗⲗⲁ ⲛⲁⲛⲟⲩⲥ ⲉⲧⲙⲃⲱⲕ ϩⲟⲗⲱⲥ ⲉⲃⲟⲗ ⲛϩⲏⲧⲟⲩ .

ⲛⲓⲙⲛⲧⲥⲟϭ ⲅⲁⲣ ⲛⲧⲉⲓⲙⲓⲛⲉ ϩⲉⲛϣⲟⲩ ⲅⲩⲙ#ⲛⲁⲍⲉ ⲙⲙⲟⲟⲩ ⲁⲛ ⲛⲉ . ϥⲣⲱϣⲉ ⲇⲉ ⲉϫⲟⲟⲥ ⲙⲙⲁⲧⲉ ϫⲉ ϩⲉⲛⲡⲗⲁⲛⲏ ⲛⲉ ⲛⲁⲓ ⲁⲩⲱ ϩⲉⲛϫⲁϫⲉ ⲛⲉ ⲉⲧⲙⲉ . ⲙⲡⲣⲡⲣⲟⲥⲉⲭⲉ ⲉⲣⲟⲟⲩ . ⲡⲗⲏⲛ ϫⲉⲕⲁⲥ ⲛⲛⲉⲛⲕⲁ ⲣⲱⲛ ⲉⲡⲉϩⲟⲩⲟ ⲛⲥⲉϭⲛ ⲟⲩⲡⲣⲟⲫⲁⲥⲓⲥ ⲛⲁⲛⲟⲩⲥ ⲉⲗⲉⲅⲭⲉ ⲙⲙⲟⲟⲩ ϩⲛ ⲛⲉⲧⲟⲩⲱⲛϩ ⲉⲃⲟⲗ .

ⲙⲏ ⲛⲧⲁⲩϫⲟⲟⲥ ⲁⲛ ϫⲉ ⲧⲕⲟⲗⲁⲥⲓⲥ ⲛⲧⲉⲯⲩⲭⲏ ⲡⲉ ⲡⲓⲥⲱⲙⲁ ⲁⲩⲱ ⲡⲉϣⲧⲉⲕⲟ . ⲁⲛⲟⲕ ϩⲱ ϯϫⲱ ⲙⲙⲟⲥ ϫⲉ ⲡⲟⲩⲛⲟϥ ⲁⲩⲱ ⲡⲉⲙⲧⲟⲛ ⲛⲧⲉⲯⲩⲭⲏ ⲡⲉ ⲡⲥⲱⲙⲁ ⲙⲡⲇⲓⲕⲁⲓⲟⲥ ⲛⲁ ⲙⲉ .

ⲉⲣϣⲁⲛ ⲧⲉⲯⲩⲭⲏ ⲅⲁⲣ ⲙⲡⲁⲥⲉⲃⲏⲥ # ⲣ ⲕⲁⲕⲉ ϣⲁⲥⲣ ⲡⲥⲱⲙⲁ ⲧⲏⲣϥ ⲛⲕⲁⲕⲉ . ⲁⲩⲱ ϣⲁⲥϣⲱⲡⲉ ⲛⲉⲛⲟⲭⲟⲥ ⲉⲧⲅⲉϩⲉⲛⲛⲁ ⲙⲛ ⲡⲥⲱⲙⲁ . ⲉⲣϣⲁⲛ ⲧⲉⲯⲩⲭⲏ ⲙⲡⲉⲩⲥⲉⲃⲏⲥ ⲣ ⲟⲩⲟⲉⲓⲛ ϣⲁⲥⲣ ⲡⲥⲱⲙⲁ ⲧⲏⲣϥ ⲛⲟⲩⲟⲉⲓⲛ .

ⲁⲩⲱ ⲁⲗⲏⲑⲱⲥ ⲧⲉⲯⲩⲭⲏ ⲉⲧⲙⲉ ⲙⲡⲉⲭⲣⲓⲥⲧⲟⲥ ⲉⲥⲟ ⲛⲑⲉ ⲛⲛⲉⲧϩⲛ ⲙⲡⲏⲩⲉ ⲉⲥϩⲙ ⲡⲥⲱⲙⲁ ⲉⲥⲣ ϣⲁ ϩⲙ ⲡⲥⲱⲙⲁ ϩⲛ ⲛϣⲁ ⲙⲡⲉⲭⲣⲓⲥⲧⲟⲥ . ϩⲛ ⲛⲉⲥⲙⲟⲩ ⲙⲛ ⲛⲉϣⲗⲏⲗ ⲙⲛ ⲁⲅⲁⲑⲟⲛ ⲛⲓⲙ ⲉⲧⲉⲣⲉ ⲡⲟⲩⲁ ⲡⲟⲩⲁ ⲁⲅⲱⲛⲓⲍⲉ ⲉϯ ⲉⲟⲟⲩ ⲙⲡⲛⲟⲩⲧⲉ ⲛϩⲏⲧⲟⲩ ⲛⲑⲉ ⲛⲛⲉⲧⲣ ϣⲁ ϩⲛ ⲧⲡⲉ ϩⲙ # ⲡϣⲁ ⲛⲧⲉⲕⲕⲗⲏⲥⲓⲁ ⲛⲛϣⲣⲡⲙⲙⲓⲥⲉ ⲉⲧⲥⲏϩ ϩⲛ ⲙⲡⲏⲩⲉ .

ⲉϣϫⲉ ⲕⲁⲧⲁ ⲛⲉⲧⲛϣⲁϫⲉ ⲇⲉ . ⲧⲕⲟⲗⲁⲥⲓⲥ ⲛⲧⲉⲯⲩⲭⲏ ⲡⲉ ⲡⲥⲱⲙⲁ . ⲉⲓⲉ ⲙⲛ ⲕⲣⲓⲥⲓⲥ ⲣⲱ ⲛⲁϣⲱⲡⲉ . ⲟⲩⲕⲟⲩⲛ ⲉⲣⲉ ⲡⲟⲩⲁ ⲡⲟⲩⲁ ϫⲓ ⲛⲧⲉϥⲕⲟⲗⲁⲥⲓⲥ ⲙⲡⲉⲓⲙⲁ . ⲁⲗⲗⲁ ⲛⲉⲅⲣⲁⲫⲏ ϯ ⲟⲩⲃⲉ ⲧⲉⲧⲛⲙⲛⲧⲁⲑⲏⲧ ⲉⲥⲣ ⲙⲛⲧⲣⲉ ⲛⲧⲉⲕⲣⲓⲥⲓⲥ ⲉⲧⲛⲁϣⲱⲡⲉ .

ⲉⲓⲥ ϩⲏⲏⲧⲉ ϭⲉ ⲁⲧⲉⲡⲗⲁⲛⲏ ⲛⲛⲕⲟⲟⲩⲉ ⲟⲩⲱⲛϩ ⲉⲃⲟⲗ . ⲉⲧⲃⲉ ⲡⲁⲓ ⲉⲁⲛⲡⲱⲧ ⲉⲃⲟⲗ ⲙⲙⲟⲟⲩ ⲙⲁⲣⲛⲣ ϣⲁ ϩⲓϫⲙ ⲡⲕⲁϩ ϩⲛ ⲟⲩⲧⲃⲃⲟ ⲙⲛ ⲟⲩⲙⲉ . ⲁⲩⲱ # ϩⲛ ⲇⲓⲕⲁⲓⲟⲥⲩⲛⲏ ⲛⲓⲙ ⲁϫⲛ ϫⲱϩⲙ ϩⲓ ⲥⲱⲱϥ ⲁⲩⲱ ⲁϫⲛ ⲡⲟⲛⲏⲣⲟⲛ ⲛⲓⲙ ⲉⲧⲉ ⲡⲁⲓ ⲡⲉ ⲡⲉⲑⲁⲃ ⲛⲁⲥ . ϫⲉⲕⲁⲥ ⲙⲛⲛⲥⲁ ⲧⲣⲉⲛⲉⲓ ⲉⲃⲟⲗ ϩⲙ ⲡⲉⲓⲃⲓⲟⲥ ⲉⲛⲛⲁⲣ ϣⲁ ⲙⲛ ⲛⲉⲛⲧⲁⲩϫⲱⲕ ⲉⲃⲟⲗ ⲙⲡⲉⲩⲇⲣⲟⲙⲟⲥ ⲉⲩⲣ ⲁⲛⲁϥ ⲙⲡⲛⲟⲩⲧⲉ ϩⲙ ⲡⲧⲣⲉⲩϫⲣⲟ ⲉⲙⲛⲧⲁⲥⲉⲃⲏⲥ ⲛⲓⲙ .

ⲉϣϫⲉ ⲟⲩⲛ ⲟⲩⲁ ⲇⲉ ⲉϥϫⲱ ⲛⲛⲓⲡⲉⲧϣⲟⲩⲉⲓⲧ ⲉϥⲙⲉⲉⲩⲉ ⲉⲣⲟϥ ϫⲉ ⲟⲩⲥⲟⲫⲟⲥ ⲡⲉ . ⲟⲩⲁⲑⲏⲧ ⲛⲧⲟϥ ⲛϩⲟⲩⲟ ⲡⲉ . ⲁⲩⲱ ⲉⲡⲙⲁ ⲛⲟⲩⲙⲛⲧⲉⲩⲥⲉⲃⲏⲥ ⲉϥϯ ⲥⲃⲱ ⲉⲟⲩⲙⲛⲧⲁⲥⲉⲃⲏⲥ # ⲁⲩⲱ ⲙⲡⲉ(ϯϩ)ⲏⲡ ⲙⲡⲇⲓⲁⲃⲟⲗⲟⲥ ⲙⲛ ⲛⲉⲧⲉ ⲛⲥⲉⲟⲩⲟⲛϩ ⲉⲃⲟⲗ ⲁⲛ ⲙⲡϣⲏⲣⲉ ⲛⲧⲁⲛⲟⲙⲓⲁ ⲛⲉⲧⲟⲩⲟⲛϩ ⲛⲁϥ ⲉⲃⲟⲗ ⲁⲩⲱ ⲉⲧϭⲟⲗⲡ ⲉⲣⲟϥ ⲁⲛⲧⲓ ⲛⲉⲧϩⲏⲡ ⲙⲛ ⲛⲉⲧⲉ ⲛⲥⲉⲟⲩⲟⲛϩ ⲉⲃⲟⲗ ⲁⲛ ⲛⲧⲥⲟⲫⲓⲁ ⲙⲡⲛⲟⲩⲧⲉ .

ⲉⲣϣⲁⲛ ⲡⲉⲡⲛⲉⲩⲙⲁ ⲅⲁⲣ ⲉⲧⲟⲩⲁⲁⲃ ϭⲛ ⲙⲁ ϩⲙ ⲡⲣⲱⲙⲉ ϥⲛⲁϭⲱⲗⲡ ⲛⲁϥ ⲉⲃⲟⲗ ⲉⲛⲛⲉⲧⲣ ⲛⲟϥⲣⲉ ⲧⲏⲣⲟⲩ . ⲧⲡⲓⲥⲧⲓⲥ ⲁⲩⲱ ⲧⲉⲥⲃⲱ ⲉⲧⲟⲩⲟϫ ⲙⲛ ⲡⲥⲟⲟⲩⲛ ⲉⲧϫⲏⲕ ⲉⲃⲟⲗ ⲙⲛ ϩⲱⲃ ⲛⲓⲙ ⲛⲁⲅⲁⲑⲟⲛ . ϩⲟⲧⲁⲛ ⲇⲉ ⲉⲣϣⲁⲛ ⲡⲥⲁⲧⲁⲛⲁⲥ ⲡⲉⲡⲛⲉⲩⲙⲁ # ⲛⲁⲕⲁⲑⲁⲣⲧⲟⲛ ϭⲛ ⲙⲁ ϩⲙ ⲡⲣⲱⲙⲉ ϥⲛⲁⲙⲁϩϥ ⲛⲥⲟ(ⲟ)ⲩⲛ ⲛⲛⲟⲩϫ . ⲁⲩⲱ ⲥⲃⲱ ⲉϥϭⲟⲟⲙⲉ . ϩⲓ ⲡⲓⲥⲧⲓⲥ ⲉⲛⲥ(ⲥ)ⲟⲩⲧⲱⲛ ⲁⲛ . ⲙⲛ ϩⲱⲃ ⲛⲓⲙ ⲉⲧϩⲟⲟⲩ .

ⲁⲓϫⲟⲟⲥ ⲛϩⲁϩ ⲛⲥⲟⲡ ϩⲛ ϩⲁϩ ⲛⲥⲙⲟⲧ ϫⲉ ⲧⲉⲯⲩⲭⲏ ⲛⲛⲣⲱⲙⲉ ⲉⲧϫⲱ ⲛⲛⲁⲓ ϩⲟⲟⲩ ⲉⲟⲩⲡⲟⲣⲛⲏ . ⲁⲓϫⲟⲟⲥ ⲟⲛ ϫⲉ ⲛⲣⲱⲙⲉ ⲉⲧⲛⲁ ⲉϩⲟⲩⲛ ϣⲁ ⲧⲁⲓ ⲛⲇⲁⲓⲙⲱⲛ ⲛⲉⲧⲛⲁ ⲉϩⲟⲩⲛ ϣⲁ ⲧⲉⲯⲩⲭⲏ ⲛⲛⲉⲧⲙⲙⲁⲩ . ⲁⲩⲱ ⲉⲛⲉ ⲙⲡⲟⲩⲱ ⲉⲃⲟⲗ ⲉⲃⲟⲗ ⲛϩⲏⲧⲟⲩ ⲛⲉⲩⲛⲁϫⲡⲟ ⲁⲛ ⲡⲉ ⲛⲛⲓⲙⲛⲧⲁⲥⲉⲃⲏⲥ ⲙⲛ ⲙⲛ ⲛⲓⲡⲉⲧⲟⲩ#ⲉⲓⲧ .

ⲟⲩⲛ ϩⲁϩ ⲛϣⲏⲣⲉ ⲉϣⲁⲩⲥⲟⲩⲱⲛⲟⲩ ⲉⲃⲟⲗ ⲛⲛⲉⲩⲉⲓⲟⲧⲉ ⲉⲃⲟⲗ ϫⲉ ⲥⲉⲉⲓⲛⲉ ⲙⲙⲟⲟⲩ . ϩⲱⲥⲧⲉ ⲛⲥⲉⲧⲙⲣ ⲃⲟⲗ ⲉⲡϣⲁϫⲉ ⲉⲧⲥⲏϩ ϫⲉ ⲡⲉⲥⲡⲉⲣⲙⲁ ⲛⲛⲟⲉⲓⲕ ϩⲓ ⲡⲟⲣⲛⲏ .

ⲛⲟⲉⲓ ⲙⲡⲉϯϫⲱ ⲙⲙⲟϥ . ⲥⲟⲩⲛ ⲛⲉⲧⲉⲣⲉ ⲡⲉⲭⲣⲓⲥⲧⲟⲥ ϣⲁϫⲉ ⲛϩⲏⲧⲟⲩ ⲁⲩⲱ ⲉⲩϣⲁϫⲉ ϩⲙ ⲡⲉⲭⲣⲓⲥⲧⲟⲥ . ⲙⲛ ⲛⲉⲧϣⲁϫⲉ ⲉⲃⲟⲗ ϩⲙ ⲡⲇⲓⲁⲃⲟⲗⲟⲥ . ⲁⲩⲱ ⲉⲣⲉ ⲡⲇⲓⲁⲃⲟⲗⲟⲥ ϣⲁϫⲉ ⲉⲃⲟⲗ ⲛϩⲏⲧⲟⲩ . ⲛⲓⲙ ⲛⲉⲧⲟⲩⲟ#ⲛϩ ⲉⲃⲟⲗ ⲁⲛ ⲛⲛⲁϩⲣⲛ ⲛⲥⲁⲃⲉⲉⲩ ϫⲉ ⲟⲩⲟⲩⲁⲙⲟⲙⲉ ⲡⲉ ⲡⲉⲩϣⲁϫⲉ ⲛⲑⲉ ⲙⲡⲅⲁⲅⲅⲣⲁⲓⲛⲁ .

ⲛϩⲟⲩⲟ ⲉⲛⲉⲧϫⲱ ⲙⲙⲟⲥ ϫⲉ ⲙⲡⲉ ⲡⲉⲭⲣⲓⲥⲧⲟⲥ ⲧⲟⲩⲛⲉⲥ ⲗⲁⲍⲁⲣⲟⲥ ⲉⲃⲟⲗ ϩⲛ ⲛⲉⲧⲙⲟⲟⲩⲧ . ⲁⲩⲱ ⲙⲡϥⲉⲓ ⲉⲃⲟⲗ ϩⲙ ⲡⲧⲁⲫⲟⲥ . ⲁⲩⲱ ϫⲉ ⲙⲁⲣⲑⲁ ⲙⲛ ⲙⲁⲣⲓⲁ ⲉⲧⲟⲩϫⲱ ⲙⲙⲟⲥ ⲉⲣⲟⲟⲩ ϫⲉ ⲡϫⲟⲉⲓⲥ ⲙⲉ ⲙⲙⲟⲟⲩ ⲙⲛ ⲗⲁⲍⲁⲣⲟⲥ ⲡⲉⲩⲥⲟⲛ ⲉⲩϫⲱ ⲙⲙⲟⲥ ϫⲉ ϩⲉⲛⲁⲣⲉⲧⲏ ⲛⲉ ⲉⲃⲟⲗ ϩⲙ ⲡⲉϥⲧⲟⲟⲩ ⲛⲥⲧⲟⲓⲭⲉⲓⲟⲛ . ⲁⲩⲱ ϫⲉ ⲗⲁⲍⲁⲣⲟⲥ ⲡⲉ ⲡⲛⲟⲩⲥ .

ⲟⲩⲕⲟⲩⲛ ⲉϣϫⲉ ⲙⲡⲉ ⲡϫⲟⲉⲓⲥ ⲧⲟⲩⲛⲉⲥ # ⲗⲁⲍⲁⲣⲟⲥ ⲁⲩⲱ ⲉϣϫⲉ ⲙⲡϥⲧⲱⲟⲩⲛ ⲕⲁⲧⲁ ⲡⲉⲩⲙⲉⲉⲩⲉ . ⲉⲓⲉ ⲙⲡⲉ ⲛⲕⲟⲟⲩⲉ ⲧⲱⲟⲩⲛ ⲁⲩⲱ ⲙⲡϥⲧⲟⲩⲛⲟⲥⲟⲩ . ⲟⲩⲧⲉ ⲙⲡϥⲧⲣⲉ ⲥⲱϩ ⲥⲱⲧⲙ ⲁⲩⲱ ⲙⲡϥⲧⲣⲉ ϭⲁⲗⲉ ⲙⲟⲟϣⲉ . ⲟⲩⲧⲉ ⲙⲡϥⲧⲣⲉ ⲙⲟⲟⲩ ⲣ ⲏⲣⲡ . ⲁⲩⲱ ⲙⲡϥⲥⲙⲟⲩ ⲉⲡϯⲟⲩ ⲛⲟⲉⲓⲕ ⲁⲩⲱ ⲡⲥⲁϣϥ ⲁⲛⲓⲙⲏⲏϣⲉ ⲧⲏⲣⲟⲩ ⲟⲩⲱⲙ ⲁⲩⲥⲉⲓ ⲁⲩϥⲓ ⲛⲛⲓⲕⲉ ⲕⲟⲧ ⲛⲗⲁⲕⲙ . ⲟⲩⲧⲉ ⲙⲡϥⲙⲟⲟϣⲉ ϩⲓϫⲛ ⲑⲁⲗⲁⲥⲥⲁ . ⲙⲡϥⲣ ⲛⲕⲉ ϭⲟⲙ ⲙⲛ ⲛⲕⲉ ⲙⲟⲉⲓϩⲉ ⲁⲩⲱ ⲛⲕⲉ # ⲙⲁⲉⲓⲛ ⲧⲏⲣⲟⲩ .

ⲁⲩⲱ ⲉⲓⲙⲏⲧⲓ ϫⲉ ϥⲥⲟⲟⲩⲛ ϫⲉ ⲉⲓϫⲱ ⲁⲛ ⲙⲙⲟⲥ ϫⲉ ⲙⲡϥⲣ ⲛⲁⲓ . ⲁⲗⲗⲁ ⲁϥⲁⲁⲩ ⲁⲩⲱ ⲁϥⲣ ϩⲟⲩⲟ ⲉⲣⲟⲟⲩ . ⲛⲉ ⲟⲩⲟⲉⲓ ⲛⲁⲓ ϫⲉ ⲁⲩϫⲡⲟⲉⲓ ⲣⲱ ⲁⲩⲱ ⲙⲡⲓⲙⲟⲩ ϩⲛ ⲑⲏ . ϫⲉ ⲙⲡⲓϩⲱ ⲉⲣⲟⲓ ⲉⲛⲁⲛⲟⲃⲉ ⲁⲗⲗⲁ ⲁⲓⲙⲉⲉⲩⲉ ⲉⲛⲓⲕⲉ ϩⲟⲩⲉ ⲙⲛⲧⲁⲥⲉⲃⲏⲥ ⲛⲑⲉ ⲛⲛⲉⲛⲧⲁⲩⲣ ϩⲏⲧ ⲛϩⲁⲓⲣⲉⲧⲓⲕⲟⲥ ϩⲣⲁⲓ ⲛϩⲏⲧⲛ .

ϩⲉⲛⲭⲣⲉⲓⲥⲧⲓⲁⲛⲟⲥ ϩⲛ ⲟⲩ ⲛⲉ ⲛⲉⲧϫⲱ ⲛϯⲛⲟϭ ⲛⲁⲛⲟⲙⲓⲁ . ⲡⲁⲥⲱⲙⲁ ⲛⲉϩ ϣⲗϥ ⲉϣϫⲉ ϯⲛⲁϣ ϥⲓ ⲏ ⲉϣϫⲉ ⲟⲩⲛ ⲣⲱⲙⲉ ⲛⲁϣ # ⲥⲱⲧⲙ ϯⲛⲁⲛⲟⲟⲥ .

ⲡⲉϫⲁⲩ ϫⲉ ⲛϣϣⲉ ⲁⲛ ⲉϣⲗⲏⲗ ⲉⲡⲉⲭⲣⲓⲥⲧⲟⲥ ϫⲉ ⲛⲧⲟϥ ϩⲱⲱϥ ϣⲗⲏⲗ . ⲡⲉϫⲁⲩ ⲟⲛ ⲛϭⲓ ⲛϩⲏⲧ ⲛϩⲉⲗⲗⲏⲛ ⲉⲧⲛϩⲏⲧⲛ . ϫⲉ ⲡⲓⲕⲟⲥⲙⲟⲥ ⲙⲁⲩⲁⲁϥ ⲡⲉⲛⲧⲁ ⲡⲛⲟⲩⲧⲉ ϭⲙ ϭⲟⲙ ⲛⲁⲙⲁϩⲧⲉ ⲉϫⲱϥ ⲏ ⲛⲣ ⲉⲝⲟⲩⲥⲓⲁ ⲉⲣⲟϥ ⲛⲧⲟⲟⲧϥ ⲙⲡⲁⲣⲭⲱⲛ . ϩⲱⲥ ⲉϣϫⲉ ⲉⲣⲉ ⲡⲥⲁⲧⲁⲛⲁⲥ ⲡⲁⲣⲭⲱⲛ ⲉⲧⲙⲙⲁⲩ ϫⲓ ⲧⲟ ⲙⲛ ⲡⲛⲟⲩⲧⲉ .

ⲁⲡϥⲱ ⲛⲧⲁⲁⲡⲉ ⲁϩⲉⲣⲁⲧϥ ⲉⲓϫⲱ ⲛⲛⲁⲓ . ⲉⲃⲟⲗ ϫⲉ ⲙⲙⲛ ⲕⲉ ⲕⲁϩ ⲙⲙⲛ ⲕⲉ ⲧⲟⲡⲟⲥ ϩⲛ ⲙⲡⲏⲩⲉ ⲛⲙⲡⲏⲟⲩⲉ ⲁⲩⲱ ϩⲛ ⲧⲟⲓⲕⲟⲩⲙⲉⲛⲏ # ⲧⲏⲣⲥ ϣⲁϩⲣⲁⲓ ⲉⲛⲕⲉ ⲛⲟⲩⲛ ⲙⲡⲕⲁϩ ⲙⲛ ⲁⲙⲛⲧⲉ ϫⲉ ⲉⲩϣⲟⲟⲡ ⲧⲏⲣⲟⲩ ⲁⲛ ϩⲛ ⲧϭⲓϫ ⲙⲡⲛⲟⲩⲧⲉ ⲙⲡⲛⲟⲩⲧⲉ ⲡϫⲟⲉⲓⲥ ⲡⲡⲁⲛⲧⲟⲭⲣⲁⲧⲱⲣ ⲛⲑⲉ ⲛⲛⲓⲉⲗⲁⲭⲉⲓⲥⲧⲟⲛ ϣⲁϩⲣⲁⲓ ⲉⲡⲕⲉ ⲁⲣⲭⲓⲇⲁⲓⲙⲱⲛ ⲉⲧⲙⲙⲁⲩ ⲉⲧⲉ ⲙⲛⲧⲁϥ ϩⲉⲛⲕⲉ ⲧⲟⲡⲟⲥ ⲉϥⲟ ⲛϫⲟⲉⲓⲥ ⲉⲣⲟⲟⲩ ⲏ ⲉϥⲁⲙⲁϩⲧⲉ ⲉϫⲱⲟⲩ ⲛⲥⲁ ⲛϩⲏⲧ ⲛⲛⲣⲱⲙⲉ ⲉⲧⲛⲁⲕⲁ ⲙⲁ ⲛⲁϥ ⲉⲛ ϫⲓϭⲟⲗ ⲉⲡⲛⲟⲩⲧⲉ ⲛϩⲏⲧⲟⲩ ⲁⲩⲱ ⲉⲣ ⲁⲡⲓⲥⲧⲟⲥ ⲉⲛⲉϥϩⲃⲏⲩⲉ .

ⲡⲉϫⲁⲩ ⲟⲛ ⲛϭⲓ ⲛⲉⲧϫⲱ ⲛϯⲕⲉ ⲅⲛⲱⲙⲏ ⲛⲁⲧϣⲓⲡⲉ ϫⲉ ⲟⲩⲛ ⲙⲛⲧⲥⲛⲟⲟⲩⲥ # ⲛⲉⲩⲁⲅⲅⲉⲗⲓⲟⲛ ϣⲟⲟⲡ . ⲉⲙⲛ ⲟⲩⲛ ⲛⲥⲁ ϥⲧⲟⲟⲩ ⲡⲕⲁⲧⲁ ⲙⲁⲑⲑⲁⲓⲟⲥ . ⲡⲕⲁⲧⲁ ⲙⲁⲣⲕⲟⲥ . ⲡⲕⲁⲧⲁ ⲗⲟⲩⲕⲁⲥ . ⲡⲕⲁⲧⲁ ⲓⲱϩⲁⲛⲛⲏⲥ . ⲉⲛⲁⲓ ⲛⲉⲧⲣ ⲟⲩⲟⲉⲓⲛ ⲉⲡⲕⲟⲥⲙⲟⲥ ⲧⲏⲣϥ . ⲁⲩⲱ ⲕⲁⲛ ⲉϣϫⲉ ⲟⲩⲛ ⲟⲩⲟⲛ ⲟⲛ ⲥⲉⲧⲥⲧⲏⲩ ⲉⲃⲟⲗ .

ⲛⲉⲅⲣⲁⲫⲏ ⲙⲙⲟⲟⲩ ⲛⲱⲛϩ ⲣⲱϣⲉ ⲉⲧⲣⲉ ⲛⲉⲧⲟⲃⲉ ⲥⲱ . ⲡⲉϫⲁⲩ ⲟⲛ ϫⲉ ⲟⲩⲛ ϩⲙⲉ ⲛⲁⲓⲱⲛ ϣⲟⲟⲡ . ⲛⲓⲙ ⲅⲁⲣ ⲡⲉⲧⲛⲁϣ ⲉⲓⲙⲉ (ⲉ)ⲛⲉϩⲃⲏⲟⲩⲉ ⲙⲡⲛⲟⲩⲧⲉ ϫⲉ ⲛⲉⲟⲩⲛ ⲟⲩⲧⲃⲁ ⲛⲁⲓⲱⲛ ϣⲟⲟⲡ . # ϩⲙⲉ ⲁⲛ . ⲉⲩⲥⲟⲟⲩⲛ ⲧⲱⲛ . ⲙⲁⲣⲟⲩⲧⲁⲙⲟⲛ ⲛϭⲓ ⲛⲓⲣⲉϥⲡⲉⲣⲉⲣⲁⲥⲟⲩ ⲛⲛⲟⲩϫ ϩⲙ ⲡⲛⲕⲟⲧⲕ ⲙⲡϩⲏⲧ ⲡⲁ ⲡⲥⲱⲙⲁ ⲁⲛ .

ⲙⲏ ⲟⲩⲛ ⲕⲉ ⲟⲩⲁ ⲉϥⲥⲟⲟⲩⲛ ϫⲉ ⲟⲩⲛ ⲟⲩⲏⲣ ⲛⲁⲓⲱⲛ ϣⲟⲟⲡ ⲛϩⲟⲩⲟ ⲉⲡⲉⲛⲧⲁϥⲧⲁⲙⲓⲟⲟⲩ ⲏ ⲡⲉⲛⲧⲁⲩⲧⲁⲙⲓⲟⲟⲩ ⲉⲃⲟⲗ ϩⲓⲧⲟⲟⲧϥ ⲡⲛⲟⲩⲧⲉ ⲁⲩⲱ ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ . ⲁⲩⲱ ⲙⲡⲛⲥⲱⲧⲙ ⲉⲣⲟϥ ϫⲉ ϩⲙⲉ ⲛⲁⲓⲱⲛ . ⲏ ϣⲉ ⲏ ϯⲟⲩ .

ⲉϥⲡⲓⲑⲉ ⲅⲁⲣ ⲛⲛⲉϥⲙⲁⲑⲏⲧⲏⲥ ⲁⲩⲱ ⲟⲩⲟⲛ ⲛⲓⲙ ⲉⲛⲧⲁⲩⲕⲁ ϩⲛⲁⲩ ⲛⲓⲙ ⲛⲥⲱⲟⲩ ⲉ#ⲧⲃⲏⲏⲧϥ . ⲙⲡϥϫⲟⲟⲥ ϫⲉ ⲧⲉⲧⲛⲁϫⲓⲧⲟⲩ ⲛϩⲁϩ ⲛⲕⲱⲃ ϩⲛ ⲛⲓⲁⲓⲱⲛ . ⲁⲩⲱ ⲛⲁⲓⲱⲛ ⲉⲧⲛⲏⲩ . ⲁⲗⲗⲁ ⲡⲉϫⲁϥ ϫⲉ ϩⲙ ⲡⲓⲁⲓⲱⲛ ⲁⲩⲱ ⲡⲁⲓⲱⲛ ⲉⲧⲛⲏⲩ

ⲉⲩϫⲛⲟⲩ ⲇⲉ ⲟⲛ ⲙⲙⲟϥ ⲛϭⲓ ⲛⲥⲁⲇⲇⲟⲩⲕⲁⲓⲟⲥ ⲉⲧⲃⲉ ⲧⲉⲥϩⲓⲙⲉ ⲙⲡⲉⲓⲥⲟⲛ ⲉⲛⲧⲁ ⲡⲥⲁϣϥ ϫⲓⲧⲥ ϫⲉ ⲉⲥⲛⲁⲣ ϩⲓⲙⲉ ⲛⲛⲓⲙ ⲙⲙⲟⲟⲩ ϩⲛ ⲧⲁⲛⲁⲥⲧⲁⲥⲓⲥ . ⲙⲡϥϫⲟⲟⲥ ϫⲉ ⲛϣⲏⲣⲉ ⲛⲛⲓⲁⲓⲱⲛ ⲥⲉϫⲓ ϩⲓⲙⲉ ⲥⲉϩⲙⲟⲟⲥ ⲙⲛ ϩⲁⲓ . ⲁⲗⲗⲁ ⲛⲧⲁϥϫⲟⲟⲥ ϫⲉ ⲛϣⲏⲣⲉ ⲙⲡⲓⲁⲓⲱⲛ ⲥⲉϫⲓ # ϩⲓⲙⲉ ⲥⲉϩⲙⲟⲟⲥ ⲙⲛ ϩⲁⲓ . ⲁⲩⲱ ϫⲉ ⲛⲉⲛⲧⲁⲩⲕⲁⲧⲁⲝⲓⲟⲩ ⲇⲉ ⲙⲙⲟⲟⲩ ⲉϫⲓ ⲙⲡⲁⲓⲱⲛ ⲉⲧⲙⲙⲁⲩ ⲙⲉⲩϫⲓ ⲥϩⲓⲙⲉ . ⲙⲉⲩϩⲙⲟⲟⲥ ⲙⲛ ϩⲁⲓ . ⲉϣϫⲉ ⲁⲛⲉⲧⲟⲩⲁⲁⲃ ⲇⲉ ϫⲟⲟⲥ ϫⲉ ⲛⲁⲓⲱⲛ . ⲁⲗⲗⲁ ⲙⲡⲟⲩⲧⲁⲩⲉ ⲏⲡⲉ ϩⲛ ⲗⲁⲁⲩ ⲙⲙⲁ .

ⲙⲡⲟⲩϩⲱ ⲇⲉ ⲟⲛ ⲉⲣⲟⲟⲩ ⲉⲛⲓⲃⲗⲁⲥⲫⲏⲙⲓⲁ . ⲁⲗⲗⲁ ⲡⲉϫⲁⲩ ⲉⲩϩⲓ ⲗⲁ ⲉⲡⲡⲉⲧⲟⲩⲁⲁⲃ ⲓⲱϩⲁⲛⲛⲏⲥ ϫⲉ ⲉⲧⲃⲉ ⲡⲁⲓ ⲛⲧⲁϥϫⲟⲟⲥ ϫⲉ ϯⲙⲡϣⲁ ⲁⲛ ⲛⲃⲱⲗ ⲉⲃⲟⲗ ⲙⲡⲙⲟⲩⲥ ⲙⲡⲉϥⲧⲟⲟⲩⲉ . ⲉⲃⲟⲗ ϫⲉ ⲛⲧⲟϥ ϩⲱⲱϥ ⲁⲧⲉϥ#ⲯⲩⲭⲏ ⲣ ⲛⲟⲃⲉ ⲉⲙⲡⲁⲧⲥⲉⲓ ⲉⲡⲉϥⲥⲱⲙⲁ . ⲉⲛⲧⲟⲟⲩ ⲛⲁ ⲙⲉ ⲛⲉ ⲛⲉⲧϫⲏⲕ ⲉⲃⲟⲗ ⲙⲡⲉⲑⲟⲟⲩ ⲛⲓⲙ .

ⲱ ϯⲛⲟϭ ⲙⲡⲁⲣⲁⲛⲟⲙⲓⲁ . ⲛⲓⲙ ⲡⲉⲧⲛⲁϫⲉ ⲟⲩⲡⲉⲑⲟⲟⲩ ⲛⲥⲁ ⲅⲁⲃⲣⲓⲏⲗ ⲏ ⲕⲉ ⲁⲅⲅⲉⲗⲟⲥ ⲛϥⲧⲙϣⲱⲡⲉ ⲉϥⲥϩⲟⲩⲟⲣⲧ . ⲁⲩⲱ ⲛⲁϣ ⲛϩⲉ ⲉⲩⲛⲁⲣ ⲃⲟⲗ ⲉⲡⲥⲁϩⲟⲩ ⲉⲩⲥⲱϣ ⲙⲡⲉⲧⲧⲛⲧⲱⲛ ⲉⲣⲟⲟⲩ . ⲁⲗⲗⲁ ⲛⲧⲁϥⲛⲁⲩ ⲉⲡⲉⲟⲟⲩ ⲙⲡϫⲟⲉⲓⲥ ⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲁϥϣⲁϫⲉ ⲉⲧⲃⲏⲏⲧϥ .

ⲁⲩⲱ ⲉⲧⲃⲉ ⲡⲉⲑⲃⲃⲓⲟ ⲁⲛ ⲙⲁⲩⲁⲁϥ ⲛⲧⲁϥϫⲟⲟⲥ ϫⲉ ⲁⲛⲅ ⲟⲩϩⲓⲕⲁⲛⲟⲥ ⲁⲛ ⲉⲡⲁϩⲧ ⲉⲃⲱⲗ ⲉⲃⲟⲗ ⲙ#ⲡⲙⲟⲩⲥ ⲙⲡⲉϥⲧⲟⲟⲩⲉ . ⲁⲗⲗⲁ ⲉⲧⲃⲉ ⲑⲟⲧⲉ ⲛϩⲟⲩⲟ . ϥⲥⲟⲟⲩⲛ ⲛⲧⲟϥ ϫⲉ ⲡⲛⲟⲩⲧⲉ ⲡⲉⲧϥⲛⲁⲩ ⲉⲣⲟϥ . ⲙⲟⲅⲓⲥ ⲅⲁⲣ ⲛⲧⲉ ⲛⲁⲅⲅⲉⲗⲟⲥ ⲡⲁϩⲧⲟⲩ ⲛⲥⲉⲟⲩⲱϣⲧ ⲛⲁϥ ⲕⲁⲧⲁ ⲡⲙⲡϣⲁ .

ⲟⲩⲣⲱⲙⲉ ⲉϥⲧⲛⲧⲱⲛ ⲉⲟⲩⲁⲅⲅⲉⲗⲟⲥ ⲉⲁⲡϫⲟⲉⲓⲥ ⲧⲛⲛⲟⲟⲩϥ ϩⲓⲑⲏ ⲙⲙⲟϥ . ⲁⲩⲱ ⲉⲣⲉ ⲡϫⲟⲉⲓⲥ ⲣ ⲙⲛⲧⲣⲉ ϩⲁⲣⲟϥ ϫⲉ ⲙⲛ ⲡⲉⲧⲟ ⲛⲛⲟϭ ⲉⲣⲟϥ ϩⲛ ⲛⲉϫⲡⲟ ⲛⲛⲉϩⲓⲟⲙⲉ . ⲁⲩⲱ ⲉⲁϥⲙⲟⲩϩ ⲙⲡⲛⲉⲩⲙⲁ ⲉϥⲟⲩⲁⲁⲃ ϫⲓⲛ ⲉϥϩⲛ ϩⲏⲧⲥ ⲛⲧⲉϥⲙⲁⲁⲩ . ⲁⲩⲱ ⲉⲟⲩϩⲟⲩⲉ ⲡⲣⲟⲫⲏⲧⲏⲥ ⲡⲉ . #

ⲡϩⲏⲃⲥ ⲉⲧϫⲉⲣⲟ . ⲡⲗⲁⲙⲡⲁⲥ ⲉⲧⲉ ⲛⲁϣⲉ ⲡⲉϥϣⲁϩ ⲉⲧⲣ ϩⲟⲩⲉ ⲣ ⲟⲩⲟⲉⲓⲛ ⲉⲛⲉϩⲓⲟⲟⲩⲉ ⲉⲧϥⲱϣ ⲉⲃⲟⲗ ⲉⲧⲃⲏⲏⲧⲟⲩ ϫⲉ ⲧⲃⲃⲟⲟⲩ ⲙⲡϫⲟⲉⲓⲥ . ⲁⲩⲱ ⲉⲁϥⲣ ϣⲣⲡ ⲛⲥⲟⲟⲩⲧⲛ ⲛⲙⲙⲁ ⲙⲙⲟⲟϣⲉ ⲙⲡϫⲟⲉⲓⲥ ⲁⲩⲱ ⲁϥⲕⲁⲑⲁⲣⲓⲍⲉ ⲙⲙⲟⲟⲩ ⲁϥⲥⲁϩⲟⲩ . ⲁⲩⲱ ⲛⲟϫϭⲟⲩ ϩⲙ ⲡⲉϥⲥⲛⲟϥ ⲉⲛⲧⲁⲩⲡⲁϩⲧϥ ⲉⲃⲟⲗ . ϫⲉ ⲉⲣⲉ ϩⲉⲛⲣⲱⲙⲉ ⲉⲛⲁϣⲉ ⲧⲁⲕⲁⲑⲁⲣⲥⲓⲁ ⲛⲧⲉⲩⲯⲩⲭⲏ ⲛⲁϫⲉ ϩⲉⲛⲧⲱⲗⲙ ϩⲟⲗⲱⲥ ⲛⲥⲁ ⲡⲉϥϫⲡⲟ.

ⲡⲉϫⲁⲩ ⲟⲛ ⲛϭⲓ ⲛⲣⲉϥⲥⲕⲣⲕⲣ ⲱⲛⲉ ⲉϩⲣⲁⲓ ⲉⲛⲉ#ϩⲓⲟⲟⲩⲉ ⲉⲧⲣⲉⲩϫⲓ ϫⲣⲟⲡ ⲛϭⲓ ⲛⲃⲗⲗⲉ ⲁⲛ ⲙⲁⲩⲁⲁⲩ . ⲁⲗⲗⲁ ϩⲁϩ ⲟⲛ ϩⲛ ⲛⲉⲧⲛⲁⲩ ⲉⲃⲟⲗ . ϫⲉ ⲛⲉⲟⲩⲡⲁⲧⲥⲉⲕⲱⲧ ⲡⲉ ⲡⲛⲟⲩⲧⲉ ⲉⲧⲣⲉϥⲧⲁⲙⲓⲉ ⲯⲩⲭⲏ ⲛⲕⲁⲓⲣⲟⲥ ⲛⲓⲙ . ⲁⲗⲗⲁ ⲁϥⲧⲁⲙⲓⲟⲟⲩ ⲧⲏⲣⲟⲩ ϫⲓⲛ ⲧⲁⲣⲭⲏ ⲁϥⲥⲟⲟⲩϩⲟⲩ ⲉϩⲟⲩⲛ ⲉϩⲉⲛⲧⲟⲡⲟⲥ ⲛϩⲉⲛⲧⲁⲙⲓⲟⲛ ⲉⲧⲃⲉ ⲡⲓϩⲱⲃ ⲏ ⲡⲓϫⲡⲟ . ⲁⲩⲱ ϫⲉ ⲛⲉⲧⲙⲟⲩ ⲉϣⲁⲣⲉ ⲧⲉⲩⲯⲩⲭⲏ ⲉⲓ ⲉⲃⲟⲗ ⲛϩⲏⲧⲟⲩ ⲉϣⲁⲥⲃⲱⲕ ⲉⲛⲥⲱⲙⲁ ⲛⲛⲉⲧⲟⲩϫⲡⲟ ⲙⲙⲟⲟⲩ . ⲕⲁⲧⲁ ⲡⲉⲛⲧⲁⲛϫⲟⲟϥ ⲧⲉⲛⲟⲩ ⲛⲕⲉ ⲥⲟⲡ

ⲁⲗⲏⲑⲱⲥ ⲟⲩⲡⲛⲉⲩⲙⲁ # ⲛⲗⲓⲃⲉ ϩⲓ ⲡⲱϣⲥ ⲡⲉⲧϩⲛ ⲛⲉⲧϫⲱ ⲛⲛⲁⲓ . ⲉⲛⲥⲉⲥⲟⲟⲩ(ⲛ) ⲁⲛ {ⲛ}ⲧϭⲟⲙ ⲙⲡⲛⲟⲩⲧⲉ ⲉⲩⲙⲉⲉⲩⲉ ϫⲉ ϥϩⲛ ⲟⲩⲛⲟϭ ⲛⲉⲣⲅⲁⲥⲓⲁ . ⲉⲩⲟ ⲛⲁⲧⲛⲁϩⲧⲉ ϫⲉ ϩⲱⲃ ⲛⲓⲙ ⲉⲛⲧⲁϥⲧⲟϣⲟⲩ ⲉⲧⲣⲉⲩϣⲱⲡⲉ ⲥⲉⲛⲁϣⲱⲡⲉ . ⲉⲁϥⲧⲣⲉⲩϣⲱⲡⲉ ⲇⲉ .

ⲉⲧⲃⲉ ⲟⲩ ⲡⲧⲱϣ ⲉⲛⲧⲁϥⲡⲗⲁⲥⲥⲉ ϫⲓⲛ ⲛϣⲟⲣⲡ ⲛⲟⲩⲣⲱⲙⲉ ⲙⲛ ⲟⲩⲥϩⲓⲙⲉ ⲛⲁⲙⲟⲩⲛ ⲉⲃⲟⲗ ⲁⲛ . ⲛⲑⲉ ⲅⲁⲣ ⲉⲛⲧⲁϥⲧⲣⲉ ⲡⲧⲁⲙⲓⲟ ϣⲱⲡⲉ ⲉϥⲙⲏⲛ ⲉⲃⲟⲗ ⲧⲡⲉ ⲙⲛ ⲡⲕⲁϩ ⲙⲛ ⲛⲉⲧⲛϩⲏⲧⲟⲩ . ⲁϥⲧⲣⲉ ⲡⲉϫⲡⲟ ⲟⲛ ϣⲱⲡⲉ ⲉϥⲙⲏⲛ ⲉⲃⲟⲗ ϩⲟⲟⲩⲧ # ⲙⲛ ⲟⲩⲥϩⲓⲙⲉ ϣⲁⲛⲧⲟⲩⲣ ⲑⲉ ⲙⲡϣⲱϩ ⲙⲡⲕⲁϩ ⲧⲏⲣϥ ϩⲓⲧⲛ ⲟⲩⲣⲱⲙⲉ ⲙⲛ ⲟⲩⲥϩⲓⲙⲉ.

ⲁⲩⲱ ⲟⲛ ⲉϥⲛⲁϣⲱⲡⲉ ϣⲁⲃⲟⲗ . ⲛⲑⲉ ⲉⲛⲧⲁϥϫⲟⲟⲥ ⲉϥⲥⲙⲟⲩ ⲉⲣⲟⲟⲩ ϫⲉ ⲁϣⲁⲓ ⲛⲧⲉⲧⲛⲁⲓⲁⲓ . ⲛⲧⲉⲧⲛⲙⲉϩ ⲡⲕⲁϩ . ⲛⲧⲉⲧⲛⲣ ϫⲟⲉⲓⲥ ⲉϫⲱϥ .

ⲁⲗⲗⲁ ⲛⲁⲓ ⲛⲧⲉⲓⲙⲓⲛⲉ ⲧⲉⲩⲯⲩⲭⲏ ⲙⲁⲩⲁⲁⲩ ⲧⲉⲛⲧⲁⲥⲣ ⲁⲥⲉⲃⲏⲥ ⲉⲁⲩⲧⲁⲁⲥ ⲉⲡⲉⲩⲥⲱⲙⲁ ⲁⲥⲣ ϩⲟⲩⲉ ⲣ ⲁⲥⲉⲃⲏⲥ ⲛϩⲏⲧϥ . ⲕⲁⲓⲅⲁⲣ ⲛⲉⲩϣⲁϫⲉ ⲛⲟⲩⲛ ⲁⲛ . ⲁⲛⲟⲛ ⲇⲉ ⲉⲛⲟⲩⲏϩ ⲛⲥⲁ ⲛⲉⲧⲟⲩⲁⲁⲃ ⲉⲧⲟ ⲛϣⲙⲙⲟ ⲉⲧⲉⲅⲛⲱⲙⲏ ⲛⲗⲟⲓⲙⲟⲥ[ #

]ⲛⲙ ......].ⲛⲑⲉ ⲛⲧⲁⲓϫⲱ ⲙⲙ]ⲟⲥ ⲛϩⲁϩ ⲛⲥⲟⲡ .

ϩⲉⲛⲕⲟⲟⲩⲉ ⲇⲉ ⲉⲩϫⲱ ⲙⲙⲟⲥ ϫⲉ ⲉ...... ϫⲟⲟⲥ ϫⲉ ......ⲟⲩ.....ⲡⲛⲟⲩⲧⲉ ⲁⲛ ⲛⲁⲓ ⲉⲩⲧⲛⲧⲱ(ⲛ) ⲉϩⲉⲛⲃⲗⲗⲉ ⲉⲁⲩⲧ.......ⲃⲗⲗⲉ ⲛ.....ⲛϣⲁϫⲉ ⲛⲧⲉ ⲅⲣⲁⲫⲏ .

ϫⲉ ⲉⲩ.....ⲉ.. ϫⲉ ⲁⲩⲥⲱⲧⲙ ⲉⲡⲁⲡⲟⲥⲧⲟⲗⲟⲥ ⲛⲛⲁⲡⲟⲥⲧⲟⲗⲟⲥ ϫⲉ ⲡⲣⲱⲙⲉ ⲡⲉ ⲭ(ⲣⲓⲥⲧⲟ)ⲥ ⲓ(ⲏⲥⲟⲩ)ⲥ . ⲁⲩⲱ ϫⲉ ⲡⲉⲛⲧⲁⲩⲧⲟ....ϣⲏⲣⲉ ⲙⲡⲛⲟⲩⲧⲉ . ⲁⲩⲱ ϫⲉ ⲓ(ⲏⲥⲟⲩ)ⲥ ⲡⲛⲁⲍⲱⲣⲁⲓⲟⲥ ⲟⲩⲣⲱⲙⲉ .......ⲉ.......ⲧⲡ#[.....]ⲩⲛⲉⲣⲁ [....ⲉ]ϣϫⲉ ⲁⲡⲛⲟⲩⲧⲉ ⲁⲁϥ ⲛⲇⲓⲕⲁⲓⲟⲥ ⲁⲩⲱ..... . ⲉⲧⲃⲉ ⲟⲩ[

......ⲛⲧⲁϥϣⲱⲡⲉ ⲉⲃⲟⲗ ⲛϩⲏⲧⲥ ⲛⲁϣ ⲛϩⲉ . ⲛⲧⲁϥⲉⲓ ⲧⲱⲛ ⲉϩⲟⲩⲛ ⲉⲣⲟⲥ . ⲛⲉⲁϥⲉⲓⲙⲉ ⲟⲛ ⲡⲉ ϫⲉ ϥϣⲟⲟⲡ ϩⲁⲑⲏ ⲙⲡⲥⲟⲛⲧ ⲧⲏⲣϥ # ⲁⲩⲱ ϫⲉ[ ⲛⲧⲁϥ]ⲧⲁⲙⲓⲉ[ ⲡⲕⲟⲥⲙⲟⲥ] ⲉⲃⲟⲗ ϩⲓⲧⲟⲟⲧϥ . ⲁⲩⲱ ⲛⲧⲟϥ ⲡⲉ ⲧⲁⲡⲉ ⲙⲡⲥⲟⲛⲧ ⲧ[ⲏⲣϥ ⲁⲩⲱ ϫⲉ] ⲁϫⲛ[ⲧϥ

]ⲛϥϫⲟⲟⲥ ϫⲉ ⲛⲧⲁϥϣⲱⲡⲉ ⲛⲧⲉⲓϩⲉ ⲉⲃⲟⲗ ϩⲛ ⲟⲩⲥϩⲓⲙⲉ .

ⲁⲗⲗⲁ ⲡⲉϫⲁϥ ϫⲉ ⲁϥⲧⲛⲛⲟⲟⲩϥ . ⲧⲛⲛⲟⲟⲩϥ ⲧⲱⲛ . ⲛⲥⲁ ⲧⲣⲉϥⲧⲛ#ⲛⲟⲟⲩϥ ⲉⲃⲟⲗ ϩⲓⲧⲟⲟⲧϥ . ⲁⲩⲱ ϩⲁⲧⲏϥ ϫⲉ ϥϣⲟⲟⲡ ⲛⲙⲙⲁϥ . ⲟⲩⲙⲟⲛⲟⲛ ϫⲉ ⲙⲡⲁⲧϥⲡⲗⲁⲥⲥⲉ ⲙⲙⲁⲣⲓⲁ ϩⲛ ⲑⲏ . ⲧⲉϥⲙⲁⲁⲩ ⲕⲁⲧⲁ ⲟⲩⲟⲓⲕⲟⲛⲟⲙⲓⲁ . ⲁⲩⲱ ⲧⲉϥϩⲙϩⲁⲗ ⲕⲁⲧⲁ ⲧⲉϥⲙⲛⲧⲛⲟⲩⲧⲉ .

ⲁⲗⲗⲁ ⲙⲡⲁⲧϥⲧⲁⲙⲓⲉ ⲟⲩⲁⲅⲅⲉⲗⲟⲥ ⲛⲟⲩⲱⲧ . ⲏ ⲟⲩⲡⲛ(ⲉⲩⲙ)ⲁ . ⲙⲛ ⲟⲩⲥⲉⲣⲁⲫⲓⲛ ⲁⲩⲱ ⲟⲩⲭⲉⲣⲟⲩⲃⲓⲛ [ⲙⲛ ..]ϫⲟⲙ [ⲛ]ⲧⲡⲉ ⲙⲛ ⲡⲕⲁϩ ⲁⲩⲱ ⲡⲣⲏ ⲙⲛ ⲡⲟⲟϩ ⲙⲛ ⲛⲥⲓⲟⲩⲣ .

ⲁⲩⲱ ⲙⲡⲏⲩⲉ ⲙⲛ ⲛⲉⲧⲛ[ϩ]ⲏⲧⲟⲩ ⲧⲏⲣⲟⲩ . [ⲁⲩ]ⲱ ⲑⲁⲗⲁⲥⲥⲁ [ⲙⲛ ⲛ]ⲉⲧⲛϩⲏ[ⲧⲥ ⲧⲏ]ⲣⲟⲩ . [ⲁⲩⲱ ϣⲁ]ϩⲣⲁⲓ ⲉ[..].... ⲉⲧⲉ [ⲙⲛ ⲡ]ⲉⲧϭⲟϫⲃ # ⲉⲣⲟϥ ⲛⲧⲟϥ ⲛⲧⲁⲩϣⲱⲡⲉ ⲧⲏⲣⲟⲩ ⲉⲃⲟⲗ ϩⲓⲧⲟⲟⲧϥ . ⲁⲩⲱ ⲁϫⲛⲧϥ ⲙⲡⲉ ⲗⲁⲁⲩ ϣⲱⲡⲉ .

ⲁⲗⲗⲁ ⲡⲉⲛⲧⲁ ⲡⲕⲟⲥⲙⲟⲕⲣⲁⲧⲱⲣ ⲙⲡⲕⲁⲕⲉ ⲥⲟⲛϩϥ ϩⲛ ⲛⲉϥⲙⲉⲉⲩⲉ ⲛⲉⲥⲧⲟⲣⲓⲟⲥ ϯⲃⲁϣⲟⲣ ⲉⲧⲉ ⲙⲡϥⲁϩⲉⲣⲁⲧϥ ⲗⲁⲁⲩ ϩⲛ ⲟⲩⲧⲁϫⲣⲟ ⲟⲩⲧⲉ ⲧⲥⲩⲛϩⲟⲇⲟⲥ ⲉⲛⲧⲁⲥϣⲱⲡⲉ ϩⲛ ⲉⲫⲉⲥⲟⲥ ϩⲓⲧⲛ ⲙⲙⲁⲕⲁⲣⲓⲟⲥ . ⲁⲩⲱ ⲙⲙⲁⲓⲛⲟⲩⲧⲉ ⲛⲉⲡⲓⲥⲕⲟⲡⲟⲥ . ⲛϥⲡⲓⲑⲉ ⲁⲛ ⲉⲛⲁⲓ ⲉϥϫⲱ ⲙⲙⲟⲥ ⲉⲡⲉⲭⲣⲓⲥⲧⲟⲥ ϫⲉ ⲟⲩⲣⲱⲙⲉ ⲡⲉ ⲉⲣⲉ ⲡⲛⲟⲩⲧⲉ ⲟⲩⲏϩ ⲛϩⲏⲧϥ . ⲁⲩⲱ ϫⲉ ⲙⲛⲛⲥⲁ ⲧⲣⲉⲩϫⲡⲟϥ ⲉⲃⲟⲗ ϩⲙ ⲙⲁⲣⲓⲁ ⲛⲧⲁ ⲡⲗⲟⲅⲟⲥ ⲃⲱⲕ ⲉϩⲟⲩⲛ ⲉⲣⲟ[ϥ .]

ⲁϥϫⲟⲟⲥ [ⲅⲁⲣ ⲛ]#ⲧⲉⲓϩⲉ ϫⲉ ⲉⲕϣⲁⲛⲙⲉϣⲧ ⲧⲉⲅⲣⲁⲫⲏ ⲧⲏⲣⲥ ⲧⲡⲁⲗⲁⲓⲁ ⲙⲛ ⲧⲕⲁⲓⲛⲏ ⲛⲛⲉⲕϩⲉ ⲉⲣⲟⲥ ⲉⲩⲙⲟⲩⲧⲉ ⲉⲡⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ ϫⲉ ⲛⲟⲩⲧⲉ . ⲁⲩⲱ ⲟⲛ ϩⲉ ⲁⲓⲏⲥⲟⲩⲥ ϫⲟⲟⲥ ⲛⲛⲉϥⲙⲁⲑⲏⲧⲏⲥ ϫⲉ ϭⲟⲙϭⲙ ⲉⲣⲟⲓ ⲛⲧⲉⲧⲛⲛⲁⲩ ϫⲉ ⲙⲛⲧⲉ ⲡⲛⲉⲩⲙⲁ ⲕⲁⲥ ϩⲓ ⲥⲁⲣⲝ ⲛⲑⲉ ⲉⲧⲉⲧⲛⲛⲁⲩ ⲉⲣⲟⲓ ⲉⲟⲩⲟⲛ ⲙⲙⲟϥ . ⲉⲛⲉ ⲟⲩⲛⲟⲩⲧⲉ ϭⲉ ⲡⲉ - ⲡⲉϫⲁϥ - ⲛⲉϥⲛⲁϫⲟⲟⲥ ϫⲉ ϭⲟⲙϭⲙ ⲉⲣⲟⲓ ⲛⲧⲉⲧⲛⲛⲁⲩ ϫⲉ ⲁⲛⲟⲕ ⲟⲩⲡⲛⲉⲩⲙⲁ ⲁⲩⲱ ⲁⲛⲟⲕ ⲟⲩⲛⲟⲩⲧⲉ .

ⲉⲧⲃⲉ ⲟⲩ ⲛⲧⲟϥ [....]ⲟⲉⲓ ⲙⲡⲁⲓ [..]ⲛⲧⲁϥϫⲟⲟⲥ [ⲁⲛ ϫ]ⲉ ⲁⲛⲁⲩ ⲉⲛ[ϭⲓϫ ]ⲙⲛ ⲛⲟⲩⲉ[ⲣⲏ]ⲧⲉ ⲛⲟⲩⲣⲱ[ⲙⲉ] ϩ]ⲁⲡⲗⲱⲥ # ⲁⲗⲗⲁ ⲡⲉϫⲁϥ ϫⲉ ⲛⲁⲟⲩⲉⲣⲏⲧⲉ ⲛⲟⲩⲓ ⲙⲛ ⲛⲁϭⲓϫ . ⲉⲛϥⲡⲱⲣϫ ⲁⲛ ⲙⲡⲥⲱⲙⲁ ⲉⲧⲙⲛⲧⲛⲟⲩⲧⲉ .

ⲛⲑⲉ ⲟⲛ ⲛⲧⲁ ⲡⲉⲛⲧⲁϥϭⲟⲙϭⲙ ⲉⲣⲟϥ ϩⲟⲙⲟⲗⲟⲅⲉⲓ ϫⲉ ⲡⲁϫⲟⲉⲓⲥ ⲁⲩⲱ ⲡⲁⲛⲟⲩⲧⲉ . ⲕⲁⲧⲁ ⲡⲉⲛⲧⲁⲩϫⲟⲟϥ ϩⲛ ⲕⲉ ⲙⲁ ϫⲉ ⲡⲉⲧϣⲟⲟⲡ ϫⲓⲛ ⲧⲉϩⲟⲩⲉⲓⲧⲉ . ⲡⲉⲛⲧⲁⲛⲥⲱⲧⲙ ⲉⲣⲟϥ . ⲡⲉⲛⲧⲁ[ⲛⲛⲁⲩ] ⲉⲣⲟϥ .....ⲃⲟⲗ ⲁⲩⲱ ⲁⲛⲉⲓⲟⲣϩϥ . ⲛⲉⲛϭⲓϫ ⲁⲩϭⲙϭⲱⲙϥ.

ⲕⲛⲁⲩ ϫⲉ ⲡⲗⲟⲅⲟⲥ ⲉⲧϣⲟⲟⲡ ϫⲓⲛ ⲧⲉϩⲟⲩⲉⲓⲧ[ⲉ] . ⲛⲧⲟϥ ⲡⲉⲛⲧ[ⲁ]ⲩϭⲟⲙϭⲙ ⲉ[ⲣⲟϥ] ϩⲛ ⲧⲥⲁ[.....]ⲟⲩ...[......] ϩ.........[...]ϩⲉ ⲡⲉⲧ..[...] # ⲟⲛ ⲛⲧⲁⲩϫⲟⲟⲥ ⲉⲧⲃⲏⲏⲧϥ ϫⲉ ⲥⲉⲛⲁⲛⲁⲩ ⲉⲡⲉⲛⲧⲁⲩⲕⲟⲛⲥϥ ⲙⲡⲟⲩⲡⲱⲣϫ ⲛⲧⲙⲛⲧⲛⲟⲩⲧⲉ ⲗⲁⲁⲩ ⲉⲡⲥⲱⲙⲁ .

ⲡⲁⲓ ⲇⲉ ⲟⲛ ϫⲉ ⲉⲗⲱⲉⲓ ⲉⲗⲱⲉⲓ ⲗⲉⲙⲁ ⲥⲁⲃⲁⲭⲧⲁⲛⲉⲓ . ⲡⲉϫⲁϥ ϫⲉ ⲧⲥⲁⲣⲝ ⲧⲉⲧⲱϣ ⲉϩⲣⲁⲓ ⲟⲩⲃⲉ ⲧⲙⲛⲧⲛⲟⲩⲧⲉ ϫⲉ ⲉⲧⲃⲉ ⲟⲩ ⲁⲕⲕⲁ(ⲁ)ⲧ ⲛⲥⲱⲕ . ⲁⲩⲱ ϫⲉ ⲁⲧⲙⲛⲧⲛⲟⲩⲧⲉ ⲃⲱⲕ ⲉⲡϫⲓⲥⲉ ⲙⲡⲁⲧⲉϥⲙⲉϩ ⲛϣⲉ .

ⲁϥϫⲟⲟⲥ ⲅⲁⲣ ϩⲛ ⲛⲉϥⲥϩⲁⲓ ϫⲉ ⲡⲁⲓ ⲉⲧⲱϣ ⲉⲃⲟⲗ ϫⲉ ⲡⲁⲛⲟⲩⲧⲉ ⲡⲁⲛⲟⲩⲧⲉ ⲉⲧⲃⲉ ⲟⲩ ⲁⲕⲕⲁⲁⲧ ⲛⲥⲱⲕ ϯⲟⲩⲱϣⲧ ⲛⲁϥ ϩⲱⲱϥ ⲙⲛ ⲧⲙⲛⲧⲛⲟⲩⲧⲉ ⲉⲃⲟⲗ ϫⲉ ⲁϥϩⲱⲧⲣ # ⲛⲙⲙⲁϥ .

ⲁⲗⲗⲁ ⲛϣⲁϫⲉ ⲙⲡⲁⲡⲟⲥⲧⲟⲗⲟⲥ ⲉⲗⲉⲅⲭⲉ ⲛⲧⲉϥⲙⲛⲧⲁⲑⲏⲧ ϫⲉ ⲡϫⲟⲉⲓⲥ ⲙⲡⲉⲟⲟⲩ ⲡⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ ⲁⲩⲱ ϫⲉ ⲡⲁⲣⲭⲏⲅⲟⲥ ⲙⲡⲱⲛϩ ⲁⲧⲉⲧⲛⲙⲟⲩⲟⲩⲧ ⲙⲙⲟϥ . ⲙⲡⲉϥϫⲟⲟⲥ ϫⲉ ⲟⲩⲣⲱⲙⲉ ⲡⲉ ⲉϥϩⲟⲧⲣ ⲙⲛ ⲟⲩⲛⲟⲩⲧⲉ . ⲁⲩⲱ ⲟⲛ ϫⲉ ⲡⲁⲓ ⲉϥϩⲛ ⲟⲩⲙⲟⲣⲫⲏ ⲛⲧⲉ ⲡⲛⲟⲩⲧⲉ ⲁϥϣⲱⲡⲉ ⲛⲥⲧⲙⲏⲧ ϣⲁϩⲣⲁⲓ ⲉⲡⲙⲟⲩ .

ⲉⲃⲟⲗ ⲁⲛ ϫⲉ ⲁⲧⲉⲫⲩⲥⲓⲥ ⲛⲧⲙⲛⲧⲛⲟⲩⲧⲉ ⲙⲟⲩ . ⲁⲗⲗⲁ ⲛⲧⲁϥⲙⲟⲩ ϩⲛ ⲧⲥⲁⲣⲝ ⲛⲑⲉ ⲉⲧⲥⲏϩ ϫⲉ ⲡⲉⲭ(ⲣⲓⲥⲧⲟ)ⲥ ⲁϥϣⲡ ϩⲓⲥⲉ ϩⲛ ⲧⲥⲁⲣⲝ . ⲕⲁⲓⲅⲁⲣ ⲉⲣⲉ ⲧⲙⲛⲧⲛⲟⲩⲧⲉ ⲡⲟⲣϫ ⲁⲛ ⲉⲡⲥⲱⲙⲁ ⲉϥ#ϩⲙ ⲡϣⲉ ϩⲁⲑⲏ ⲙⲡⲁⲓ ϩⲛ ⲟⲩⲡⲁⲣⲁⲇⲉⲓⲅⲙⲁ ⲉⲃⲟⲗ ⲛϩⲏⲧϥ .

ⲙⲏ ⲉⲩϣⲁⲛⲙⲟⲩⲟⲩⲧ ⲛⲟⲩⲣⲱⲙⲉ ⲉϣⲁⲩϫⲟⲟⲥ ϫⲉ ⲁⲩⲙⲉⲩⲧ ⲟⲩⲥⲱⲙⲁ . ⲙⲏ ⲉϣⲁⲩϫⲟⲟⲥ ⲁⲛ ϫⲉ ⲁⲛⲙⲉⲩⲧ ⲡⲣⲱⲙⲉ ⲧⲏⲣϥ # ⲕⲁⲓⲧⲟⲓ [ⲛⲧⲉⲯⲩ]ⲭⲏ ⲙⲟⲩ ⲁⲛ . [ⲁⲗ]ⲗⲁ ⲡⲥⲱⲙⲁ ⲙⲁⲩⲁⲁϥ ⲡⲉⲧⲙⲟⲩ .

ⲧⲁⲓ ⲧⲉ ⲑⲉ ⲙⲡϫⲟⲉⲓⲥ ⲁϥⲙⲟⲩ ϩⲛ ⲧⲥⲁⲣⲝ ⲉϥⲟ ⲇⲉ ⲛⲁⲧⲙⲟⲩ ϩⲛ ⲧⲉⲯⲩⲭⲏ ⲧ[ⲏⲣⲥ] . ⲛⲧⲉⲓϩⲉ ⲅⲁⲣ ⲛⲧⲁϥϫⲟⲟⲥ ϫⲉ ⲁϥⲕⲟⲓⲛⲱⲛⲉⲓ ⲉⲥⲛⲟϥ ϩⲓⲥⲁⲣⲝ . ⲕⲁⲧⲁ ⲑⲉ ⲉⲛⲧⲁϥϫⲟⲟⲥ ⲛϩⲁϩ ⲛⲥⲟⲡ ϫⲉ [........] ⲧⲥⲁⲣⲝ . ⲛⲧⲁϥⲣ ⲥⲁⲣⲝ ⲉⲧⲱ(ⲛ) ⲉⲓⲙⲏⲧⲉⲓ ϩⲛ ⲧⲡⲁⲣⲑⲉⲛⲟⲥ . ⲙⲏ ⲛⲧⲁϥ[ ......] [...]ϩ ⲛϩⲏⲧⲥ # [.......]ⲉ ⲁⲛ [.......]ⲛⲑⲉ [........ϣⲥ ϩⲛ ⲧ[... ]ⲛⲧⲉϥⲙⲛⲧⲛⲟⲩⲧⲉ ⲙ[ⲙⲉ . ⲛⲧⲁⲩ]ϫⲟⲟⲥ ⲁⲛ ϫⲉ[ ......] [...... ]ⲉⲃⲟⲗ ϩⲛ ⲟⲩⲡⲛ(ⲉⲩⲙ)ⲁ ⲉϥⲟⲩⲁⲁⲃ ⲡⲉⲧⲛⲏⲩ ⲉϩⲣⲁⲓ .

ⲉⲧⲃⲉ ⲟⲩ . ⲉⲃⲟⲗ ϫⲉ ⲡϣⲏⲣⲉ ϣⲟⲃⲉ ⲁⲛ ⲉⲡⲉⲓⲱⲧ . ⲟⲩⲇⲉ ⲙⲡⲉ ⲡⲓⲱⲧ . ⲟⲩⲡⲛ(ⲉⲩⲙ)ⲁ ⲟⲛ ⲡⲉ ⲡϣⲏⲣⲉ . ⲁⲩⲱ ⲡⲛⲟⲩⲧⲉ ⲡⲉ ⲉⲃⲟⲗ ϩⲙ ⲡⲛⲟⲩⲧⲉ . ⲁⲩⲱ ⲡϣⲏⲣⲉ ⲡⲉ ⲉⲃⲟⲗ ϩⲙ ⲡⲓⲱⲧ ⲛⲧⲁϥϫⲡⲟϥ .

ⲛⲧⲉⲣⲟⲩϫⲡⲟϥ ϭⲉ ⲉⲃⲟⲗ ϩⲛ ⲧⲡⲁⲣⲑⲉⲛⲟⲥ ⲕⲁⲧⲁ ⲥⲁⲣⲝ ⲁϥϣⲱⲡⲉ ⲉϥϫⲟⲛⲧ ϩⲛ ϩⲱⲃ ⲛⲓⲙ ⲛⲧⲉⲛϩⲉ ϣⲁⲧⲛ # ⲛⲟⲃⲉ . ⲁϥϩⲕⲟ . ⲁϥⲉⲓⲃⲉ . ⲁϥⲣⲓⲙⲉ . ⲁϥⲙⲕⲁϩ ⲛϩⲏⲧ ⲉϫⲙ ⲡⲧⲱⲙ ⲛϩⲏⲧ ⲛⲛⲉⲧⲟ ⲛⲁⲧⲛⲁϩⲧⲉ .

ⲁⲩⲱ ⲟⲩⲙⲟⲓϩⲉ ⲧⲉ ⲧⲛⲟϭ ⲛⲁⲅⲁⲡⲏ ⲙⲡⲉⲛϫⲟⲉⲓⲥ ⲉϩⲟⲩⲛ ⲉⲣⲟⲛ . ϫⲉ ⲁϥⲧⲟⲩϫⲉ ⲛⲉϥϩⲙϩⲁⲗ ⲛⲧⲙⲏⲧⲉ ⲙⲡⲕⲱϩⲧ . ⲁⲛⲁⲛⲓⲁⲥ . ⲙⲓⲍⲁⲏⲗ . ⲁⲍⲁⲣⲓⲁⲥ . ⲙⲛ ϩⲉⲛⲕⲟⲟⲩⲉ ⲟⲛ ⲛⲧⲉⲓϩⲉ . ⲁϥⲧⲁⲁϥ ⲇⲉ ⲙⲙⲓⲛ ⲙⲙⲟϥ ⲉⲧⲃⲏⲏⲧⲛ ⲉϩⲣⲁⲓ ⲉⲛϭⲓϫ ⲛⲛⲉⲛⲧⲁⲩⲉϥⲧ ⲧⲟⲟⲧϥ ⲙⲛ ⲣⲁⲧϥ .

ⲡⲣⲱⲙⲉ ⲙⲉⲛ ⲉⲧⲙⲟⲩ ⲉϣⲁϥⲕⲁ ⲡⲉϥⲥⲱⲙⲁ ϩⲓϫⲙ ⲡⲙⲁ ⲛⲛⲕⲟⲧⲕ ⲛⲛⲉⲧⲛⲁⲕⲟⲟⲥϥ . ⲛⲧⲉ # ⲧⲉϥⲯⲩⲭⲏ ⲃⲱⲕ ⲉⲣⲁⲧϥ ⲙⲡⲛⲟⲩⲧⲉ . ⲁϥϫⲓ ϯⲡⲉ ⲇⲉ ⲛⲧⲟϥ ⲙⲡⲙⲟⲩ ϩ[ⲁ]ⲣⲟⲛ ⲛϭⲓ ⲡϫⲟⲉ[ⲓ]ⲥ ⲓⲏⲥⲟⲩⲥ . ⲁϥⲕⲁ ⲡⲉϥⲥⲱⲙⲁ ϩⲓ ⲡϣⲉ ⲁϥⲃⲱⲕ ϣⲁ ⲛⲉⲧϩⲛ ⲁⲙⲛⲧⲉ ϫⲉ ⲉⲣⲉ ⲁ[....]ⲣⲓⲥ ⲛⲉⲧ[........]ⲛⲉϩⲃⲏⲩⲉ ⲛⲛⲉϥϭⲓϫ ϩⲙ ⲡⲙⲁ ⲉⲧⲙⲙⲁⲩ .

ϩⲟⲙⲟⲓⲱⲥ ⲇⲉ ⲁϥⲕⲧⲟϥ ⲁϥⲧⲟⲩⲛⲉⲥ ⲡⲥⲱⲙⲁ ϩⲙ ⲡⲙⲉϩϣⲟⲙⲛⲧ ⲛϩⲟⲟⲩ ⲁϥϥⲓⲧϥ ⲉϩⲣⲁⲓ ⲉⲙⲡⲏⲩⲉ ⲛⲙⲙⲁϥ ⲏ ⲁϥⲃⲱⲕ ⲉϩⲣⲁⲓ ϩⲁⲣⲟϥ ⲉϥⲛⲏⲩ ⲟⲛ ⲛϩⲏⲧϥ ⲉⲕⲣⲓⲛⲉ ⲛⲛⲉⲧⲟⲛϩ ⲙⲛ ⲛⲉⲧⲙⲟⲟⲩⲧ ⲕⲁⲧⲁ ⲡⲉⲛⲧⲁϥϫⲟⲟϥ ϫⲉ ϩⲟⲧⲁⲛ ⲉϥϣⲁⲛⲉⲓ ⲛϭⲓ ⲡϣⲏⲣⲉ ⲙⲡⲣⲱⲙⲉ ϩⲣⲁⲓ ϩⲙ ⲡⲉϥ#ⲉⲟⲟⲩ ⲙⲛ ⲛⲉⲧⲛⲏⲩ ⲙⲛⲛⲥⲁ ⲛⲁⲓ .

ⲁϥϫⲟⲟⲥ ⲇⲉ ⲟⲛ ϫⲉ ⲉⲧⲃⲉ ⲡⲁⲓ ⲛϣϣⲉ ⲁⲛ ⲉϫⲟⲟⲥ ϫⲉ ⲁⲧⲡⲁⲣⲑⲉⲛⲟⲥ ϫⲡⲉ ⲟⲩⲛⲟⲩⲧⲉ . ⲁⲩⲱ ϫⲉ ⲛϯⲛⲁϫⲟⲟⲥ ⲁⲛ ϫⲉ ⲟⲩⲛⲟⲩⲧⲉ ⲡⲉ ⲡⲉⲛⲧⲁϥⲣ ϣⲟⲙⲧ ⲛⲉⲃⲟⲧ ϩⲛ ⲑⲏ . ⲁⲩⲱ ⲁϥϫⲓ ⲉⲕⲓⲃⲉ ⲁϥⲡⲣⲟⲕⲟⲡⲧⲉ ⲕⲟⲩⲓ ⲕⲟⲩⲓ . ⲁⲩⲱ ⲡⲉϫⲁϥ ϫⲉ ϥⲥⲏϩ ϫⲉ ϫⲓ ⲙⲡϣⲏⲣⲉ ϣⲏⲙ ⲛⲅⲡⲱⲧ ⲉϩⲣⲁⲓ ⲉⲕⲏⲙⲉ . ⲙⲡϥϫⲟⲟⲥ ϫⲉ ϫⲓ ⲙⲡⲛⲟⲩⲧⲉ .

ⲟⲩ ϭⲉ ⲡⲉ ⲡⲁⲓ ⲉⲧⲥⲏϩ ϫⲉ ⲡⲛⲟⲩⲧⲉ ⲡϫⲟⲉⲓⲥ ⲁϥⲟⲩⲱⲛϩ ⲉⲣⲟⲛ . ⲁϣ ⲡⲉ ⲡⲕⲁⲓⲣⲟⲥ ⲛⲧⲁϥⲟⲩⲱⲛϩ ⲉⲛⲣⲱⲙⲉ ⲉⲓⲙⲏⲧⲓ ϫⲉ ⲁⲩϫⲡⲟϥ ⲉⲃⲟⲗ ϩⲛ ⲧⲡⲁⲣ#ⲑⲉⲛⲟⲥ . ⲛⲑⲉ ⲉⲧⲥⲏϩ ϫⲉ ⲉⲓⲥ ⲧⲡⲁⲣⲑⲉⲛⲟⲥ ⲛⲁⲱ ⲛⲥϫⲡⲟ ⲛⲟⲩϣⲏⲣⲉ ⲛⲥⲉⲙⲟⲩⲧⲉ ⲉⲡⲉϥⲣⲁⲛ ϫⲉ ⲉⲙⲙⲁⲛⲟⲩⲏⲗ ⲉⲧⲉ ⲡⲁⲓ ⲡⲉϣⲁⲩⲟⲩⲁϩⲙⲉϥ ϫⲉ ⲡⲛⲟⲩⲧⲉ ⲛⲙⲙⲁⲛ .

ⲟⲩⲛⲟⲩⲧⲉ ⲟⲩⲛ ⲡⲉⲛⲧⲁ ⲧⲡⲁⲣⲑⲉⲛⲟⲥ ϫⲡⲟϥ . ⲁⲩⲱ ⲉⲧⲃⲉ ⲡⲁⲓ ⲟⲩⲁⲛⲁⲅⲕⲁⲓⲟⲛ ⲡⲉ ⲉϩⲟⲙⲟⲗⲟⲅⲉⲓ ϫⲉ ⲙⲁⲣⲓⲁ ⲧⲉⲛⲧⲁⲥϫⲡⲉ ⲡⲛⲟⲩⲧⲉ ⲛⲑⲉ ⲛⲧⲁ ⲛⲉⲛⲉⲓⲟⲧⲉ ϫⲟⲟⲥ .

ϩⲁϩ ⲙⲉⲛ ϭⲉ ⲛⲉ ⲛⲟⲩⲁ ⲙⲡⲉⲧⲙⲙⲁⲩ . ⲉⲃⲟⲗ ϫⲉ ⲁⲓϩⲟϫϩϫ ⲁⲩⲱ ⲁⲓⲙⲉⲥⲧⲉ ϫⲱ ⲛⲛϣⲁϫⲉ ⲙⲡⲓⲁⲕⲁⲑⲁⲣⲧⲟⲥ ⲉⲧⲉ ⲙⲡϥⲥⲉⲓ ⲛⲧⲁⲩⲉ ⲡⲟⲛⲏⲣⲟⲛ ⲉⲃⲟⲗ ϩⲙ ⲡⲉϥ#

]ϩⲛ ⲛⲓⲙ ⲙⲙⲟⲟⲩ ⲛⲛⲁⲓ ⲧⲏⲣⲟⲩ ⲉⲧⲃⲏⲕ ⲛⲁⲥ ⲉϩⲟⲩⲛ .

ⲧⲁⲓ ⲧⲉ ⲑⲉ ⲙⲡϣⲙϣⲉ ⲛⲛⲉⲧⲉⲓⲣⲉ ⲙⲙⲟϥ ⲛⲥⲉⲥⲟⲟⲩⲛ ⲁⲛ ϫⲉ ⲡⲥⲁⲧⲁⲛⲁⲥ ⲡⲉⲧⲉⲛⲉⲣⲅⲉⲓ ⲙⲙⲟⲟⲩ ⲛϩⲏⲧϥ ⲁⲩⲱ ⲉϥⲉⲛⲉⲣⲅⲉⲓ ⲙⲙⲟϥ ⲛϩⲏⲧⲟⲩ . ⲁⲩⲱ ⲟⲩⲙⲉ ⲁⲛ ⲡⲉ ⲉⲃⲟⲗ ϩⲓⲧⲙ ⲡⲛⲟⲩⲧⲉ ⲙⲙⲉ .

ϩⲁϩ ⲅⲁⲣ ⲛⲥⲟⲡ ϣⲁⲣⲉ ⲡϭⲉⲣⲏϭ ⲱⲣⲃ ⲉϩⲟⲩⲛ ⲛⲛⲉⲧϥⲙⲉⲉⲩⲉ ⲉⲣⲟⲟⲩ ⲉϭⲟⲡⲟⲩ ⲁⲩⲱ ⲛϥⲡⲱⲧ ⲉϩⲣⲁⲓ ⲉϫⲱⲟⲩ ϩⲛ ⲧⲉϥϭⲟⲙ ⲛϥⲧⲁϩⲟⲟⲩ . ⲥⲟⲡ ⲇⲉ ⲟⲛ ⲉϣⲁϥⲕⲁ ⲧⲉϩⲣⲉ ϩⲓϫⲛ ⲛⲁⲗⲟⲟⲩⲉ ⲏ ⲙⲡⲁϣϥ ϣⲁⲛⲧⲟⲩ#ϫⲱⲗϫ ⲛϭⲓ ⲛⲉⲧϥϭⲱⲣϭ ⲉⲣⲟⲟⲩ .

ⲧⲁⲓ ⲧⲉ ⲑⲉ ⲙⲡⲥⲁⲧⲁⲛⲁⲥ . ⲛϩⲉⲑⲛⲟⲥ ⲙⲉⲛ ⲧⲏⲣⲟⲩ ⲛⲣⲉϥⲡⲉϩⲧ ⲥⲛⲟϥ ⲉⲃⲟⲗ ⲁⲩⲱ ⲛⲣⲉϥⲣⲛⲟⲃⲉ ⲫⲁⲛⲉⲣⲟⲛ ⲉⲩⲥⲟⲟⲩⲛ ⲁⲛ ⲙⲡⲛⲟⲩⲧⲉ ⲉⲁϥⲣ ϫⲟⲉⲓⲥ ⲉⲣⲟⲟⲩ ϩⲱⲥ ⲧⲩⲣⲁⲛⲛⲟⲥ .

ⲛⲓⲕⲟⲟⲩⲉ ⲇⲉ ⲉⲧⲣⲉϥϭⲱⲣϭ ⲉⲣⲟⲟⲩ ϩⲙ ⲡⲓⲥⲟⲟⲩⲛ ⲛⲛⲟⲩϫ ⲉϥⲛⲁⲩ ϫⲉ ⲥⲉⲣⲟⲕⲉ ⲉⲡⲡⲉⲧⲛⲁⲛⲟⲩϥ . ⲥⲉⲙⲟⲧⲛ ⲇⲉ ⲟⲛ ⲛⲁⲡⲁⲧⲁ ⲙⲙⲟⲟⲩ ⲉⲁⲁⲩ ⲛϩⲁⲓⲣⲉⲧⲓⲕⲟⲥ . ⲁⲩⲱ ⲛⲁⲛⲧⲓⲭⲣⲉⲓⲥⲧⲟⲥ . ⲁⲩⲱ ⲙⲡⲣⲟⲫⲏⲧⲏⲥ ⲙⲡϭⲟⲗ . ⲁⲩⲱ ⲛⲁⲡⲟⲥⲧⲟ#ⲗⲟⲥ ⲛⲛⲟⲩϫ . ϣⲁⲛⲧϥⲥⲟⲛϩⲟⲩ . ⲁⲩⲱ ⲛϥⲁⲁⲩ ⲛϩⲩⲡⲏⲣⲉⲧⲏⲥ ⲙⲡⲙⲩⲥⲧⲏⲣⲓⲟⲛ ⲛⲧⲁⲛⲟⲙⲓⲁ . ϩⲛ ϩⲉⲛⲙⲁⲉⲓⲛ ⲛⲛⲉⲧⲡⲓⲥⲧⲉⲩⲉ ⲉⲣⲟⲟⲩ . ⲉⲩⲃⲏⲧ ⲇⲉ ⲛⲛⲁϩⲣⲛ ⲛⲉⲧⲉⲣⲉ ⲡϫⲟⲉⲓⲥ ϯ ⲙⲙⲟⲥ ⲛⲁⲩ ⲉⲧⲣⲉⲩⲣⲟⲉⲓⲥ ⲟⲩⲃⲉ ⲛⲓⲉⲣⲅⲁⲧⲏⲥ ⲉⲑⲟⲟⲩ ⲉⲧⲉⲣⲉ ⲧⲉⲩⲙⲛⲧⲁⲥⲉⲃⲏⲥ ϩⲏⲡ ϩⲙ ⲡⲓϣⲙϣⲉ ⲛⲑⲉ ⲛⲟⲩⲥⲏϥⲉ ⲉⲧⲁⲕⲟ ⲛⲛⲉⲧⲟⲩⲁⲡⲁⲧⲁ ⲙⲙⲟⲟⲩ .

ⲛⲉⲧϫⲱ ⲛⲛⲁⲓ ⲁⲩⲱ ⲛⲉⲧⲉⲓⲣⲉ ⲛⲛⲁⲓ ⲛⲧⲁⲩⲣ ⲡ[ⲕⲉ] ⲡⲱⲧ ϩⲛ ⲧⲉⲡⲣⲱ ⲉⲧⲃⲉ ⲧⲉⲩⲙⲛⲧⲁⲧⲥⲱⲧⲙ ⲛⲥⲁ ⲡⲉⲩⲁⲅⲅⲉⲗⲓⲟⲛ . ⲧⲉⲡⲣⲱ ⲧⲉ ϫⲉ ⲛⲥⲉⲛⲟⲉⲓ # ⲁⲛ ⲛⲛⲉⲅⲣⲁⲫⲏ . ⲟⲩⲧⲉ ⲛⲥⲉⲥⲟⲟⲩⲛ ⲁⲛ ⲙⲡⲛⲟⲩⲧⲉ ϩⲛ ⲟⲩⲙⲉ ⲁⲩⲱ ⲡⲉⲭⲣⲓⲥⲧⲟⲥ . ⲡⲉⲩⲡⲱⲧ ⲡⲉ ϫⲉ ⲡⲓϣⲙϣⲉ ⲉⲧⲟⲩⲉⲓⲣⲉ ⲙⲙⲟϥ ⲛⲟⲩⲉⲃⲟⲗ ⲁⲛ ⲡⲉ ϩⲙ ⲡⲟⲩⲱϣ ⲙⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ . ⲁⲩⲱ ⲡⲉⲓⲡⲓⲑⲉ ⲛⲟⲩⲉⲃⲟⲗ ⲁⲛ ⲡⲉ ϩⲙ ⲡⲧⲱϩⲙ ⲙⲡⲉⲭⲣⲓⲥⲧⲟⲥ . ⲁⲗⲗⲁ ⲡⲁ ⲡⲉⲧⲡⲗⲁⲛⲁ ⲙⲙⲟⲟⲩ ⲡⲉ .

ⲟⲩⲃⲟⲧⲉ ⲅⲁⲣ ⲙⲡϫⲟⲉⲓⲥ ⲧⲉ ⲧⲉⲑⲩⲥⲓⲁ ⲛⲛⲁⲥⲉⲃⲏⲥ ⲕⲁⲧⲁ ⲑⲉ ⲉⲧⲥⲏϩ . ⲕⲁⲓⲅⲁⲣ ⲉⲩⲧⲁⲗⲟ ⲙⲙⲟⲟⲩ ⲉϩⲣⲁⲓ ϩⲛ ⲟⲩⲙⲛⲧⲁⲧϩⲁⲡ . ⲟⲩϩⲟⲩⲉ ⲃⲟⲧⲉ ⲙⲡⲛⲟⲩⲧⲉ ⲡⲡⲁⲛⲧⲟⲕⲣⲁ[ⲧⲱⲣ

]ⲣⲟⲥ . ⲙⲛ ⲛⲇⲓⲕⲁⲓⲟⲥ ⲧⲏⲣⲟⲩ . ⲛⲉⲧⲉⲣⲉ ⲓⲏⲥⲟⲩⲥ ⲛⲁϯ ϭⲟⲙ ⲛⲁⲩ ⲉⲧⲙⲥⲕⲁⲛⲇⲁⲗⲓⲍⲉ ⲏ ⲉⲧⲙⲧⲣⲉⲩⲥⲕⲁⲛⲇⲁⲗⲓⲍⲉ ⲙⲙⲟⲟⲩ ϩⲙ ⲡϣⲙϣⲉ ⲙⲙⲛⲧⲁⲥⲉⲃⲏⲥ ⲉⲧϫⲓ ⲉϩⲟⲩⲛ ⲉⲡⲁ ⲛⲉⲓⲇⲱⲗⲟⲛ . ⲏ ⲉⲣⲉ ⲡⲁ ⲛⲉⲓⲇⲱⲗⲟⲛ ⲟⲩⲏϩ ⲛⲥⲱϥ . ⲁⲩⲱ ⲉⲩⲟ ⲙⲡⲓⲟⲩⲁ ⲛⲟⲩⲱⲧ ⲙⲛ ⲛⲉⲩⲉⲣⲏⲩ . ϥⲛⲁϯ ϭⲟⲙ ⲛⲁⲩ ⲟⲛ ⲉϭⲣⲟ ⲉⲛⲥⲏϥⲉ ⲙⲛ ⲃⲁⲥⲁⲛⲟⲥ ⲛⲓⲙ .

ⲛⲁⲓⲁⲧⲟⲩ ⲛⲛⲉⲧⲛⲁϩⲩⲡⲟⲙⲉⲓⲛⲉ ⲛⲑⲉ ⲛⲛⲉⲛⲧⲁⲩϩⲩⲡⲟⲙⲉⲓⲛⲉ ϫⲓⲛ ⲛϣⲟⲣⲡ . ⲟⲩⲟⲉⲓ ⲇⲉ ⲛⲛⲉⲧⲛⲁⲁⲣⲛⲁ ⲛⲑⲉ ⲛⲛⲉⲛⲧⲁⲩⲁⲣⲛⲁ ϫⲓⲛ # ⲛϣⲟⲣⲡ . ⲁⲓⲡⲱϣⲥ ⲅⲁⲣ ⲉϩⲣⲁⲓ ⲉϫⲛ ⲛⲉⲧⲉⲣⲉ ⲡⲇⲁⲓⲙⲱⲛ ⲧⲥⲁⲃⲟ ⲛⲛⲣⲱⲙⲉ ⲉⲣⲟⲟⲩ ϩⲛ ⲛⲧⲟⲡⲟⲥ ⲙⲡⲉⲭⲣⲓⲥⲧⲟⲥ .

ⲁⲡⲓⲛⲧⲏϭ ⲙⲙⲓⲛⲉ ⲙⲓⲛⲉ ⲉⲓ ⲧⲱⲛ ⲉϩⲟⲩⲛ ⲉⲛⲕⲁϩ ⲉⲧⲟⲩϫⲱ ⲙⲙⲟⲥ ⲉⲣⲟⲟⲩ ϫⲉ ⲥⲉⲟⲩⲁⲁⲃ . ⲁϯⲯⲱⲣⲁ ⲧⲏⲣⲥ ⲉⲓ ⲧⲱⲛ ⲉϩⲟⲩⲛ ⲉⲛⲟϩⲉ ⲛⲉⲥⲟⲟⲩ . ⲉⲧⲟⲩⲙⲉⲉⲩⲉ ⲉⲣⲟⲟⲩ ϫⲉ ⲥⲉⲟⲩⲟϫ .

ⲉⲓϣⲁϫⲉ ⲉⲛⲉⲛⲙⲓⲛⲉ ⲛⲣⲱⲙⲉ ϩⲛ ⲛⲏⲓ ⲙⲡⲛⲟⲩⲧⲉ ⲁⲩⲱ ⲛⲥⲩⲛⲁⲅⲱⲅⲏ ⲙⲡⲉⲭⲣⲓⲥⲧⲟⲥ . ⲁⲛⲧⲓ ⲧⲣⲉⲛϫⲓ ⲥⲃⲱ ⲅⲁⲣ ⲉϩⲉⲛⲡⲉⲧⲛⲁⲛⲟⲩⲟⲩ ⲛⲃⲣⲣⲉ . ⲁⲛϫⲓ ⲥⲃⲱ ⲉϩⲉⲛⲕⲉ ⲙⲓⲛⲉ ⲛⲛⲟⲃⲉ # ⲛⲃⲣⲣⲉ .

ⲁⲛⲓⲙⲟⲩⲛⲥⲱⲣⲙ ⲉⲧⲟϣ ⲁⲩⲱ ⲉⲧⲣ ϩⲟⲩⲉ ϩⲁⲧⲉ ⲉⲓ ⲧⲱⲛ ⲉϩⲟⲩⲛ ⲉⲡϩⲏⲧ ⲛⲧⲙⲛⲧⲥⲟⲛ ⲉⲧⲟⲩⲙⲉⲉⲩⲉ ⲉⲣⲟⲟⲩ ϫⲉ ϩⲉⲛⲡⲓⲥⲧⲟⲥ ⲛⲉ ⲉϩⲉⲛⲁⲡⲓⲥⲧⲟⲥ ⲛⲉ . ⲉϥⲥϩⲟⲩⲟⲣⲧ ϭⲉ ⲛϭⲓ ⲡⲗⲁⲥ ⲉⲧϫⲱ ⲛⲛⲓⲙⲛⲧⲣⲉϥϫⲓⲟⲩⲁ . ⲁⲩⲱ ⲉϥⲥϩⲟⲩⲟⲣⲧ ⲛϭⲓ ⲡϩⲏⲧ ⲉⲧⲙⲉⲉⲩⲉ ⲉⲣⲟⲟⲩ . ⲉϥⲥϩⲟⲩⲟⲣⲧ ⲛϭⲓ ⲡⲙⲁⲁϫⲉ ⲉⲧϣⲱⲡ ⲙⲙⲟⲟⲩ ⲉⲣⲟϥ .

ⲡⲉⲧⲟⲩⲱϣ ⲅⲁⲣ ⲁⲛ ⲉϣⲗⲏⲗ ⲉⲡϣⲏⲣⲉ . ⲙⲁⲣⲉϥⲧⲙ ⲣⲱϥ ⲉⲧⲙⲟⲛⲟⲙⲁⲍⲉ ⲙⲡⲓⲱⲧ . ⲛⲧⲁⲩⲙⲉⲩⲉ ⲇⲉ ⲧⲱⲛ ⲉϯⲕⲉ ⲁⲥⲉⲃⲉⲓⲁ . ⲁⲣⲁ # ⲛⲧⲁⲩⲥⲱⲧⲙ ⲉⲡⲁⲓ ϫⲉ ⲛⲉϥⲟ ⲛⲟⲩϣⲏ ⲛⲣⲟⲉⲓⲥ ⲡⲉ ϩⲙ ⲡⲉϣⲗ(ⲏ)ⲗ ⲙⲡⲛⲟⲩⲧⲉ . ⲁⲗⲗⲁ ϩⲙ ⲡⲁⲓ ⲟⲛ ⲉⲩⲧⲏⲙ ⲛϭⲓ ⲛⲉⲩⲃⲁⲗ . ⲉⲃⲟⲗ ϫⲉ ϥϫⲟⲛⲧ ϩⲛ ϩⲱⲃ ⲛⲓⲙ ⲛⲧⲉⲛϩⲉ ϣⲁⲧⲛ ⲛⲟⲃⲉ .

ⲉϣϫⲉ ⲡⲁⲓ ⲟⲛ ⲡⲉⲧⲟⲩⲙⲉⲉⲩⲉ ⲉⲣⲟϥ ϫⲉ ⲥⲉⲥⲱⲧⲙ ⲉⲛⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ ϫⲉ ⲟⲩⲛⲧⲁⲛ ⲙⲙⲁⲩ ⲙⲡⲉⲧⲥⲟⲡⲥ ⲉϫⲱⲛ ⲛⲛⲁϩⲣⲛ ⲡⲓⲱⲧ . ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲇⲓⲕⲁⲓⲟⲥ . ⲁⲩⲱ ⲟⲛ ϫⲉ ⲡⲁⲓ ⲉⲧϩⲓ ⲟⲩⲛⲁⲙ ⲙⲡⲛⲟⲩⲧⲉ ⲁⲩⲱ ⲉⲧⲥⲙⲙⲉ ⲉϩⲣⲁⲓ ϩⲁⲣⲟⲛ . ⲙⲏ ⲉⲣϣⲁⲛ ⲡⲣⲣⲟ ⲡⲉⲭⲣⲓⲥⲧⲟⲥ ⲡⲛⲟⲩⲧⲉ ⲁⲩⲱ ⲡϣⲏⲣⲉ ⲙⲡⲛⲟⲩ[ⲧⲉ

]ⲡⲉⲟⲟⲩ ⲛⲁⲕ ⲙⲛ ⲡⲉⲕϣⲏⲣⲉ ⲉⲧⲥⲙⲁⲙⲁⲁⲧ ⲉⲃⲟⲗ ϩⲓⲧⲛ ⲙⲡⲏⲩⲉ ⲛⲙⲡⲏⲩⲉ ⲙⲛ ⲛⲉⲧϩⲛ ⲙⲡⲏⲩⲉ ⲧⲏⲣⲟⲩ .

ⲕⲥⲙⲁⲙⲁⲁⲧ ⲡⲛⲟⲩⲧⲉ . ⲡⲉⲟⲟⲩ ⲛⲁⲕ ⲙⲛ ⲡⲉⲕϣⲏⲣⲉ ⲉⲧⲥⲙⲁⲙⲁⲁⲧ ⲉⲃⲟⲗ ϩⲓⲧⲛ ⲧⲉⲕⲟⲓⲕⲟⲩⲙⲉⲛⲏ ⲙⲛ ⲛⲉⲧⲛϩⲏⲧⲥ ⲧⲏⲣⲟⲩ . ⲕⲥⲙⲁⲙⲁⲁⲧ ⲡⲛⲟⲩⲧⲉ . ⲡⲉⲟⲟⲩ ⲛⲁⲕ ⲉⲃⲟⲗ ϩⲓⲧⲛ ⲛⲉⲕϩⲃⲏⲟⲩⲉ ⲧⲏⲣⲟⲩ ⲛⲧⲟⲕ ⲁⲩⲱ ⲡⲉⲕϣⲏⲣⲉ ⲉⲧⲥⲙⲁⲙⲁⲁⲧ . ⲉⲛⲉⲕϩⲃⲏⲩⲉ ⲛⲉ ⲛⲟⲩϥ ⲁⲩⲱ ⲉⲛⲟⲩϥ ⲛⲉ ⲛⲟⲩⲕ .

ⲕⲥⲙⲁⲙⲁⲁⲧ ⲡⲛⲟⲩ#ⲧⲉ . ⲛⲧⲟⲕ ⲁⲩⲱ ⲡⲉⲕϣⲏⲣⲉ ⲉⲧⲥⲙⲁⲙⲁⲁⲧ ⲉⲧⲉⲣⲉ ⲡⲉⲕⲣⲁⲛ ⲁⲩⲱ ⲡⲉϥⲣⲁⲛ ϣⲟⲟⲡ ⲉⲟⲩⲁ ϩⲛ ⲧⲧⲁⲡⲣⲟ ⲙⲡⲉⲧϯ ⲟⲩⲃⲉ ⲛⲉⲧϫⲱ ⲛϯⲙⲛⲧⲁⲥⲉⲃⲏⲥ ⲛⲃⲣⲣⲉ . ⲉⲧⲉϥⲙⲛⲧⲣⲙⲙⲁⲟ ⲧⲉ ⲧⲁⲓ ⲁⲩⲱ ⲧⲉϥϩⲉⲗⲡⲓⲥ . ϩⲛ ⲧⲉϥϭⲓⲛⲃⲱⲕ ⲉϩⲟⲩⲛ ϫⲉ ⲡⲛⲟⲩⲧⲉ . ⲁⲩⲱ ϩⲛ ⲧⲉϥϭⲓⲛⲉⲓ ⲉⲃⲟⲗ ϫⲉ ⲓⲏⲥⲟⲩⲥ . ⲉϥⲛⲁⲛⲕⲟⲧⲕ ϫⲉ ⲡⲛⲟⲩⲧⲉ ⲉϥⲛⲁⲧⲱⲟⲩⲛ ϫⲉ ⲓⲏⲥⲟⲩⲥ . ⲉϥⲥⲙⲟⲩ ϫⲉ ⲡⲛⲟⲩⲧⲉ . ⲉϥϣⲗⲏⲗ ϫⲉ ⲓⲏⲥⲟⲩⲥ .

ⲁⲩⲱ ϫⲉⲕⲁⲥ ⲛⲛⲁⲱⲥⲕ ϩⲛ ⲛⲁⲓ . ϥⲟⲩⲟⲛϩ ⲉⲃⲟⲗ ϫⲉ ϩⲙ ⲡⲧⲣⲉⲛϫⲟⲟⲥ ϫⲉ ⲓⲏⲥⲟⲩⲥ . ⲧⲛⲟⲛⲟⲙⲁⲍⲉ # ⲛⲧⲧⲣⲓⲁⲥ ⲛϩⲟⲙⲟⲟⲩⲥⲓⲟⲥ . ⲁⲗⲗⲁ ⲡⲉϫⲁⲩ ⲛϭⲓ ⲛϩⲁⲓⲣⲉⲧⲓⲕⲟⲥ ϫⲉ ⲙⲁⲧⲥⲁⲃⲟⲛ ϫⲉ ⲉⲡⲓϣⲁϫⲉ ϫⲉ ϩⲟⲙⲟⲟⲩⲥⲓⲟⲥ ⲥⲏϩ ⲧⲱⲛ ϩⲛ ⲛⲉⲅⲣⲁⲫⲏ .

ⲙⲁⲧⲁⲙⲟⲓ ⲛⲧⲟⲕ ϫⲉ ⲛⲧⲁⲕⲉⲓⲙⲉ ⲉⲃⲟⲗ ϩⲛ ⲁϣ ⲛⲅⲣⲁⲫⲏ ϫⲉ ⲡϣⲏⲣⲉ ϣⲟⲃⲉ ⲉⲡⲓⲱⲧ ϩⲛ ⲧⲉϥⲟⲩⲥⲓⲁ . ⲛⲑⲉ ⲉⲧⲕϫⲱ ⲙⲙⲟⲥ ⲉⲣⲟϥ ϫⲉ ϩⲉⲧⲉⲣⲟⲩⲥⲓⲟⲥ ⲉⲧⲉ ⲡⲉⲧϣⲟⲃⲉ ⲡⲉ ϩⲛ ⲧⲉϥⲟⲩⲥⲓⲁ .

ⲁⲗⲗⲁ ⲙⲙⲛⲧⲕ ϣⲁϫⲉ ⲙⲙⲁⲩ ⲉϫⲱ . ⲉⲧⲃⲉ ⲡⲁⲓ ⲕⲱ ⲛⲥⲱⲕ ⲛⲛⲉⲕϣⲁϫⲉ ⲛⲃⲟⲧⲉ ⲁⲩⲱ ⲛϭⲟⲗ ⲛⲅⲁⲛⲉⲭⲉ ⲛⲧⲙⲉ . ⲙⲏ ⲅⲁⲣ ⲡⲕⲉⲫⲁ#ⲗⲁⲓⲟⲛ ⲛⲛⲉⲅⲣⲁⲫⲏ ⲁⲛ ⲡⲉ ⲡⲉⲩⲁⲅⲅⲉⲗⲓⲟⲛ . ⲥⲱⲧⲙ ⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲁⲛⲟⲕ ⲙⲛ ⲡⲉⲓⲱⲧ ⲁⲛⲟⲛ ⲟⲩⲁ .

ϩⲙ ⲡⲧⲣⲉϥϫⲟⲟⲥ ⲅⲁⲣ ϫⲉ ⲁⲛⲟⲕ ⲙⲛ ⲡⲁⲉⲓⲱⲧ . ϥⲟⲩⲱⲛϩ ⲉⲃⲟⲗ ⲛⲛϩⲩⲡⲟⲥⲧⲁⲥⲓⲥ . ϩⲙ ⲡⲧⲣⲉϥϫⲟⲟⲥ ⲇⲉ ϫⲉ ⲁⲛⲟⲛ ⲟⲩⲁ ⲉϥⲥⲏⲙⲁⲛⲉ ⲛⲧⲙⲛⲧⲟⲩⲁ ⲛⲧⲉϥⲫⲏⲥⲓⲥ ϫⲉ ⲟⲩⲟⲩⲥⲓⲁ ⲛⲟⲩⲱⲧ ⲧⲉ ⲉⲧⲉ ⲡϩⲟⲙⲟⲟⲩⲥⲓⲟⲛ ⲡⲉ .

ϩⲱⲥⲧⲉ ⲕⲁⲛ ⲉϥϣⲁⲛϫⲟⲟⲥ ϫⲉ ⲡⲁⲉⲓⲱⲧ ⲛⲁⲁϥ ⲉⲣⲟⲓ . ⲙⲡⲣⲧⲣⲉⲩⲙⲉⲉⲩⲉ ⲉϩⲉⲛⲙⲛⲧⲁⲥⲉⲃⲏⲥ . ϣⲁⲩⲧⲁⲩⲉ ⲡⲁⲓ ⲅⲁⲣ ⲉⲩϯ ⲧⲱⲛ # ϫⲉ ⲡⲁⲛⲧⲱⲥ ⲉⲛⲁⲁϥ ϩⲙ ⲡⲧⲁⲉⲓⲟ ⲙⲡⲉⲟⲟⲩ . ⲁⲩⲱ ⲉϥϣⲟⲃⲉ ⲉⲣⲟϥ ϩⲛ ⲧⲉϥⲫⲏⲥⲓⲥ .

ⲙⲁⲣⲟⲩⲉⲓⲙⲉ ϫⲉ ⲡⲓⲉⲟⲟⲩ ⲛⲟⲩⲱⲧ ⲡⲉ ⲡⲧⲁⲉⲓⲟ ⲛⲟⲩⲱⲧ ⲡⲉ . ϯⲫⲏⲥⲓⲥ ⲛⲟⲩⲱⲧ ⲧⲉ ⲙⲡⲓⲱⲧ ⲙⲛ ⲡϣⲏⲣⲉ . ⲕⲁⲧⲁ ⲑⲉ ⲉⲛⲧⲁⲛⲟⲩ(ⲉ)ⲛϩ ⲡⲁⲓ ⲉⲃⲟⲗ ϩⲛ ⲛⲉⲅⲣⲁⲫⲏ .

ⲁⲗⲗⲁ ⲡⲉϫⲁⲩ ϫⲉ ⲛⲧⲁ ⲡⲓⲱⲧ ϫⲡⲉ ⲡϣⲏⲣⲉ ⲛⲁϣ ⲛϩⲉ . ⲙⲁⲣⲟⲩⲥⲱⲧⲙ ⲛϭⲓ ⲛⲓⲣⲉϥⲧⲱϩ ϫⲉ ⲡⲉϥϫⲡⲟ ⲕⲁⲧⲁ ⲥⲁⲣⲝ ⲉⲧⲉ ⲉⲝⲉⲥⲧⲓ ⲉⲧⲣⲉ ⲛⲥⲁⲃⲉⲉⲩ ⲁⲩⲱ ⲧⲉⲕⲕⲗⲏⲥⲓⲁ ⲧⲏⲣⲥ ⲙⲡⲉⲭⲣⲓⲥⲧⲟⲥ ⲉⲓⲙⲉ ⲉⲣⲟϥ . ⲁⲩⲣ ϣⲣⲡ ⲧⲁϣⲉⲟⲉⲓϣ ⲙ#ⲙⲟϥ ϩⲓⲧⲛ ⲛⲁⲅⲅⲉⲗⲟⲥ ⲁⲩⲱ ⲁⲩⲉⲩⲁⲅⲅⲉⲗⲓⲍⲉ ⲙⲙⲟϥ ϩⲓⲧⲛ ⲛⲉⲩⲁⲅⲅⲉⲗⲓⲟⲛ ⲁⲩⲱ ⲛⲁⲡⲟⲥⲧⲟⲗⲟⲥ . ⲁⲩⲥⲏⲙⲁⲛⲉ ⲇⲉ ⲟⲛ ⲙⲙⲟϥ ϩⲓⲧⲛ ⲛⲛⲟϭ ⲙⲡⲁⲧⲣⲓⲁⲣⲭⲏⲥ.

ⲡⲉϥϫⲡⲟ ⲇⲉ ⲉⲃⲟⲗ ϩⲙ ⲡⲓⲱⲧ ⲉⲧⲉ ⲙⲛ ⲁⲅⲅⲉⲗⲟⲥ ⲥⲟⲟⲩⲛ ⲙⲙⲟϥ ϫⲉ ⲉⲩⲛⲁⲧⲁϣⲉⲟⲉⲓϣ ⲙⲙⲟϥ ⲟⲩⲧⲉ ⲡⲣⲟⲫⲏⲧⲏⲥ ⲟⲩⲇⲉ ⲁⲡⲟⲥⲧⲟⲗⲟⲥ ⲟⲩⲧⲉ ⲗⲁⲁⲩ ϩⲟⲗⲱⲥ ϩⲙ ⲡⲧⲁⲙⲓⲟ ⲧⲏⲣϥ ⲉⲓⲙⲏⲧⲓ ⲉⲣⲟϥ ⲙⲁⲩⲁⲁϥ ⲁⲩⲱ ⲡⲉϥⲉⲓⲱⲧ . ⲟⲩⲙⲛⲧⲁⲥⲉⲃⲏⲥ ⲧⲉ ⲉⲧⲣⲉ ⲣⲱⲙⲉ ϣⲓⲛⲉ ⲉⲧⲃⲏⲏⲧϥ ⲙⲁⲗⲓⲥⲧⲁ ⲛϩⲁⲓⲣⲉⲧⲓⲕⲟⲥ .

ϩⲱ ⲅⲁⲣ # ⲉⲧⲣⲉ ⲛⲥⲟⲫⲟⲥ ⲁⲩⲱ ⲙⲡⲓⲥⲧⲟⲥ ϩⲛ ⲟⲩⲙⲉ ⲉⲓⲙⲉ ϫⲉ ⲡϣⲏⲣⲉ ϣⲟⲟⲡ ⲙⲛ ⲡⲓⲱⲧ . ⲁⲩⲱ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϩⲁⲑⲏ ⲙⲡⲧⲁⲙⲓⲟ ⲧⲏⲣϥ ϫⲓⲛ ⲛⲁⲣⲭⲁⲅⲅⲉⲗⲟⲥ ⲁⲩⲱ ⲛⲁⲅⲅⲉⲗⲟⲥ ⲧⲏⲣⲟⲩ ⲙⲛ ⲛϭⲟⲙ ⲙⲛ ⲛⲁⲣⲭⲏ ⲙⲛ ⲛⲉⲝⲟⲩⲥⲓⲁ ⲁⲩⲱ ⲛⲥⲁⲣⲁⲫⲉⲓⲛ ⲙⲛ ⲛⲭⲉⲣⲟⲩⲃⲉⲓⲛ ⲙⲛ ⲡⲛⲉⲩⲙⲁ ⲛⲓⲙ . ⲁⲩⲱ ⲛⲕⲟⲟⲩⲉ ⲧⲏⲣⲟⲩ ⲧⲡⲉ ⲙⲛ ⲡⲕⲁϩ ⲙⲛ ⲛⲉⲧⲛϩⲏⲧⲟⲩ .

ⲏ ⲛⲁϣ ⲛϩⲉ ⲉⲟⲩⲛ ⲗⲁⲁⲩ ϣⲟⲟⲡ ϩⲁ ⲧⲉϥϩⲏ ⲉⲛⲧⲟϥ ⲡⲉ ⲧⲁⲡⲉ ⲙⲡⲥⲱⲛⲧ ⲧⲏⲣϥ ⲁⲩⲱ ⲛⲧⲁⲩⲧⲁⲙⲓⲟⲟⲩ ⲧⲏⲣⲟⲩ ⲉⲃⲟⲗ ϩⲓⲧⲟⲟⲧϥ # ⲁⲩⲱ ⲁϫⲛⲧϥ ⲙⲡⲉ ⲗⲁⲁⲩ ϣⲱⲡⲉ . ⲡⲉⲧϣⲓⲛⲉ ϭⲉ ⲧⲉⲛⲟⲩ ⲏ ⲡⲉⲧⲙⲉⲉⲩⲉ ϩⲛ ⲧⲉϥⲙⲛⲧϫⲁⲥⲓϩⲏⲧ ϫⲉ ⲉⲓⲛⲁϩⲉⲧϩⲧ ⲡⲉϫⲡⲟ ⲙⲡϣⲏⲣⲉ ⲉⲃⲟⲗ ϩⲙ ⲡⲓⲱⲧ ⲡⲓⲕⲉⲣⲁⲩⲛⲟⲥ ⲛⲟⲩⲱⲧ ⲡⲉⲧⲛⲁⲉⲓ ⲉϫⲱϥ ⲙⲛ ⲡⲉⲛⲧⲁϥⲧⲟⲗⲙⲁ ⲉϫⲟⲟⲥ ϫⲉ ϯⲛⲁϣⲱⲡⲉ ⲉⲓⲉⲓⲙⲉ ⲙⲡⲉⲧϫⲟⲥⲉ .

ⲁⲓϫⲟⲟⲥ ⲛⲕⲉ ⲥⲟⲡ ϫⲉ ⲡⲉⲧⲉ ⲙⲡⲉ ⲁⲅⲅⲉⲗⲟⲥ ⲧⲁϣⲉⲟⲉⲓϣ ⲙⲙⲟϥ ⲟⲩⲧⲉ ⲡⲣⲟⲫⲏⲧⲏⲥ ⲟⲩⲧⲉ ⲁⲡⲟⲥⲧⲟⲗⲟⲥ . ⲉⲕⲟ ⲛⲟⲩ ⲛⲙⲙⲁϥ . ⲏ ⲟⲩ ⲉⲣⲟⲕ ⲛⲧⲟⲕ ⲡⲉ ϣⲓⲛⲉ ⲛⲥⲁ ⲡⲉⲧϣⲟⲟⲡ # ⲛⲁⲕ ⲉⲕⲉ ⲁⲛⲟⲙⲓⲁ ⲉϩⲣⲁⲓ ⲉϫⲱⲕ .

ⲏ ⲉϣϫⲉ ⲟⲩⲛ ϭⲟⲙ ⲙⲙⲟⲕ ⲉⲉⲓⲙⲉ ϫⲉ ⲛⲧⲁ ⲡⲓⲱⲧ ϫⲡⲉ ⲡϣⲏⲣⲉ ⲛⲁϣ ⲛϩⲉ . ⲉⲓⲉ ⲟⲩⲛ ϭⲟⲙ ⲟⲛ ⲙⲙⲟⲕ ⲉⲉⲓⲙⲉ ϫⲉ ϩⲁⲑⲏ ⲙⲡⲁⲧⲟⲩⲥⲛⲧ ⲧⲡⲉ ⲙⲛ ⲡⲕⲁϩ ⲛⲉⲟⲩⲡⲉⲧϣⲟⲟⲡ . ⲏ ϫⲉ ⲛⲉϥⲧⲱⲛ ⲡⲉ ⲛϭⲓ ⲡⲛⲟⲩⲧⲉ . ⲛⲉϥϩⲙⲟⲟⲥ ⲇⲉ ⲡⲉ ⲛⲁϣ ⲛϩⲉ . ⲁⲩⲱ ϫⲉ ⲟⲩⲁϣ ⲙⲙⲓⲛⲉ ⲡⲉ ⲡⲛⲟⲩⲧϣ .

ⲛⲓϣⲁϫⲉ ⲅⲁⲣ ⲛⲧⲉⲓⲙⲓⲛⲉ ⲁⲡⲣⲱⲙⲉ ⲟⲛ ⲙⲡⲛⲟⲩⲧⲉ ϩⲛ ⲟⲩⲙⲉ ⲁⲡⲁ ⲁⲑⲁⲛⲁⲥⲓⲟⲥ ⲡⲁⲣⲭⲓⲉⲡⲓⲥⲕⲟⲡⲟⲥ ⲛⲣⲁⲕⲟⲧⲉ ϫⲡⲓⲉ ⲛⲣⲉϥⲧⲱϩ # ⲉⲧⲃⲏⲏⲧⲟⲩ ϫⲉ ⲉⲧⲃⲉ ⲟⲩ ⲕⲧⲟⲗⲙⲁ ⲉⲉⲓⲱⲣϩ ⲛⲛⲉⲧⲉ ⲛⲕⲉ ⲁⲅⲅⲉⲗⲟⲥ ⲥⲟⲟⲩⲛ ⲙⲙⲟⲟⲩ ⲁⲛ . ⲛⲧⲁⲙⲓⲟ ⲅⲁⲣ ⲛⲥⲉⲛⲁϣ ⲧⲁⲩⲟ ⲡⲉϫⲡⲟ ⲁⲛ ⲙⲡⲣⲉϥⲧⲁⲙⲓⲟ . ⲁⲩⲱ ϫⲉ ϩⲱ ⲉⲣⲟⲕ ⲉⲧⲣⲉⲕⲉⲓⲙⲉ ϫⲉ ⲁⲡⲓⲱⲧ ϫⲡⲉ ⲡϣⲏⲣⲉ ϩⲁⲑⲏ ⲛⲛⲁⲓⲱⲛ . ⲉϫⲟⲟⲥ ⲇⲉ ϫⲉ ⲛⲁϣ ⲛϩⲉ ⲙⲛ ⲗⲁⲁⲩ ⲥⲟⲟⲩⲛ .

ϥⲥⲏϩ ⲅⲁⲣ ϫⲉ ⲧⲉϥⲅⲉⲛⲉⲁ ⲛⲓⲙ ⲡⲉⲧⲛⲁϣ ⲧⲁⲩⲟⲥ . ⲙⲛ ⲗⲁⲁⲩ ⲥⲟⲟⲩⲛ ⲙⲡⲓⲱⲧ ⲛⲥⲁ ⲡϣⲏⲣⲉ . ⲁⲩⲱ ⲙⲛ ⲗⲁⲁⲩ ⲥⲟⲟⲩⲛ ⲙⲡϣⲏⲣⲉ ⲉⲓⲙⲏⲧⲓ ⲡⲓⲱⲧ ⲉⲛⲧⲁϥϫⲡⲟϥ .

ⲉϥⲣ ⲙⲛⲧⲣⲉ ⲇⲉ ⲟⲛ ⲙⲡⲉⲧⲣ ϣⲣⲡ # ϣⲱⲡⲉ . ϣⲁϥϫⲟⲟⲥ ϫⲉ ⲉⲕϣⲁⲛⲧⲁⲁⲕ ⲉⲛⲓϣⲁϫⲉ ⲙⲛ ⲛⲓϣⲛⲉ ⲛⲥⲁⲧⲁⲛⲁⲥ . ⲕⲛⲁⲡⲱϣⲥ ⲉⲃⲟⲗ ⲙⲡⲛⲟⲩⲧⲉ . ⲛⲑⲉ ⲧⲉⲛⲟⲩ ⲛϩⲁⲓⲣⲉⲥⲓⲥ ⲛⲓⲙ . ⲙⲛ ⲟⲩⲟⲛ ⲛⲓⲙ ⲉⲧⲉⲣⲉ ⲧⲉⲕⲕⲗⲏⲥⲓⲁ ⲁⲛⲁⲑⲉⲙⲁⲧⲓⲍⲉ ⲙⲙⲟⲟⲩ .

ⲕⲁⲧⲁ ⲑⲉ ⲇⲉ ⲉⲛⲧⲁⲓϣⲣⲡ ϫⲟⲟⲥ . ⲉⲛⲟⲛⲟⲙⲁⲍⲉ ⲙⲡⲣⲁⲛ ⲙⲡϣⲏⲣⲉ . ⲉⲛⲉⲡⲓⲕⲁⲗⲉⲓ ⲛⲧⲧⲣⲓⲁⲥ ⲉⲧⲟⲩⲁⲁⲃ . ⲥⲱⲧⲙ ⲉⲡϫⲟⲉⲓⲥ ⲉϥⲕⲉⲗⲉⲩⲉ ⲛⲛⲉϥⲙⲁⲑⲏⲧⲏⲥ ϫⲉ ⲃⲱⲕ ⲛⲧⲉⲧⲛϯ ⲥⲃⲱ ⲛⲛϩⲉⲑⲛⲟⲥ ⲧⲏⲣⲟⲩ ⲉⲧⲉⲧⲛⲃⲁⲡⲧⲓⲍⲉ # ⲙⲙⲟⲟⲩ ⲉⲡⲣⲁⲛ ⲙⲡⲓⲱⲧ ⲙⲛ ⲡϣⲏⲣⲉ ⲙⲛ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ .

ⲡⲁⲡⲟⲥⲧⲟⲗⲟⲥ ⲇⲉ ϩⲱⲱϥ ϫⲉ ⲛⲧⲁⲧⲉⲧⲛⲃⲁⲡⲧⲓⲍⲉ ⲉⲡⲉⲭⲣⲓⲥⲧⲟⲥ . ⲁⲩⲱ ⲟⲛ ⲛⲕⲉ ⲙⲁ ϫⲉ ⲁⲩϫⲓ ⲃⲁⲡⲧⲓⲥⲙⲁ ⲉⲡⲣⲁⲛ ⲙⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ . ϥⲟⲩⲟⲛϩ ϭⲉ ⲉⲃⲟⲗ ϫⲉ ⲉⲛϣⲁⲛⲟⲛⲟⲙⲁⲍⲉ ⲛⲓⲏⲥⲟⲩⲥ ⲉⲛⲟⲛⲟⲙⲁⲍⲉ ⲛⲧⲧⲣⲓⲁⲥ ⲉⲧⲟⲩⲁⲁⲃ . ⲙⲟⲛⲟⲛ ⲡⲓⲱⲧ ⲛⲉⲓⲱⲧ . ⲁⲩⲱ ⲡϣⲏⲣⲉ ⲛϣⲏⲣⲉ . ⲁⲩⲱ ⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲙⲡⲛⲉⲩⲙⲁ ⲉϥⲟⲩⲁⲁⲃ .

ⲙⲡⲣⲧⲣⲉⲛϣⲓⲛⲉ ϭⲉ ⲧⲉⲛⲟⲩ ⲛⲥⲁ ϩⲟⲩⲟ ⲉⲡⲁⲓ . ⲛⲓⲙ ⲅⲁⲣ # ⲡⲉⲧⲛⲁϣⲛ ⲣⲁⲧⲟⲩ ⲛⲛⲉϥϩⲓⲟⲟⲩⲉ ⲛⲑⲉ ⲉⲧⲥⲏϩ . ⲙⲡⲣⲡⲣⲟⲥⲉⲭⲉ ϭⲉ ⲧⲉⲛⲟⲩ ⲉⲛϣⲁϫⲉ ⲛⲛⲓⲥⲁϩ ⲛⲛⲟⲩϫ . ⲛⲁⲓ ⲅⲁⲣ ⲛⲉ ⲛⲧⲁⲩⲥϩⲁⲓ ⲉⲧⲃⲏⲏⲧⲟⲩ ϫⲉ ϩⲁϩ ⲅⲁⲣ ⲛⲉ ⲛⲉⲧⲉ ⲛⲥⲉϩⲩⲡⲟⲧⲁⲥⲥⲉ ⲁⲛ ⲛⲣⲉϥϫⲉ ϣⲁϫⲉ ⲛⲉⲡⲣⲁ ⲁⲩⲱ ⲛⲣⲉϥⲧⲁⲕⲉ ϩⲏⲧ .

ϣⲓⲛⲉ ⲛⲥⲁ ⲡϫⲱⲕ ⲛⲛⲓϣⲁϫⲉ ⲁⲩⲱ ⲧⲉⲧⲛⲛⲁϭⲛⲧⲟⲩ ϩⲛ ⲧⲉⲧⲛⲧⲁⲡⲣⲟ ⲙⲛ ⲧⲧⲁⲡⲣⲟ ⲛⲛⲉⲧⲛϣⲏⲣⲉ . ⲉⲧⲉⲧⲛⲣ ϣⲁ ⲙⲉⲛ ⲁⲩⲱ ⲉⲧⲉⲧⲛⲣⲁϣⲉ ϫⲉ ⲓⲏⲥⲟⲩⲥ . ⲉⲧⲉⲧⲛⲙⲟⲕϩ ⲛϩⲏⲧ ⲁⲩⲱ ⲉⲧⲉⲧⲛⲗⲩⲡⲉⲓ ϫⲉ ⲓⲏⲥⲟⲩⲥ . ⲛϣⲏ#ⲣⲉ ϣⲏⲙ ⲁⲩⲱ ⲛϣⲉⲉⲣⲉ ϣⲏⲙ ⲉⲩⲥⲱⲃⲉ ϫⲉ ⲓⲏⲥⲟⲩⲥ . ⲡⲉⲧϫⲓⲟⲣ ⲛⲟⲩⲙⲟⲟⲩ ϫⲉ ⲓⲏⲥⲟⲩⲥ . ⲡⲉⲧⲡⲏⲧ ϩⲁ ⲡϩⲟ ⲛⲛⲃⲁⲣⲃⲁⲣⲟⲥ ϫⲉ ⲓⲏⲥⲟⲩⲥ . ⲛⲉⲧⲛⲁⲩ ⲉϩⲉⲛⲑⲏⲣⲓⲟⲛ ⲁⲩⲱ ⲟⲩϩⲱⲃ ⲛϩⲟⲧⲉ ϫⲉ ⲓⲏⲥⲟⲩⲥ . ⲛⲉⲧϩⲛ ϩⲉⲛⲧⲕⲁⲥ ⲁⲩⲱ ϩⲉⲛϣⲱⲛⲉ ϫⲉ ⲓⲏⲥⲟⲩⲥ . ⲛⲉⲧⲟⲩϥⲓ ⲙⲙⲟⲟⲩ ⲛⲁⲓⲭⲙⲁⲗⲱⲧⲟⲥ ϫⲉ ⲓⲏⲥⲟⲩⲥ . ⲛⲉⲧⲟⲩϭⲱⲱⲙⲉ ⲙⲡⲉⲩϩⲁⲡ ⲁⲩⲱ ⲉⲩϫⲓ ⲙⲙⲟⲟⲩ ⲛϭⲟⲛⲥ ϫⲉ ⲓⲏⲥⲟⲩⲥ . ϩⲱ... ⲉⲡⲣⲁⲛ ⲛⲧⲉ ⲡⲉⲧϩⲛ ⲣⲱⲟⲩ ⲁⲩⲱ ⲡⲉⲩⲟⲩϫⲁⲓ ⲡⲉ . ⲁⲩⲱ ⲡⲉⲩⲱⲛϩ ⲛⲧⲟϥ ⲙⲛ ⲡⲉϥⲉⲓⲱⲧ .

ⲙⲏ ⲉⲓⲛⲁϣ ϭⲙϭⲟⲙ ϭⲉ ⲛϫⲱ ⲛⲛⲉⲧⲉ # ϣⲁⲣⲉ ⲛⲉⲧⲙⲉ ⲙⲡⲛⲟⲩⲧⲉ ⲙⲛ ⲡⲉϥⲭⲣⲓⲥⲧⲟⲥ ϫⲟⲟⲩ ⲧⲏⲣⲟⲩ ϩⲛ ⲑⲉⲗⲡⲓⲥ ⲛⲛⲉⲩϩⲃⲏⲩⲉ ⲧⲏⲣⲟⲩ . ⲛϩⲟⲩⲟ ⲇⲉ ⲡⲉⲩϣⲗⲏⲗ .

ⲏ ⲉϣϫⲉ ⲟⲩⲛⲟⲩⲧⲉ ⲛⲟⲩⲱⲧ ⲡⲉⲧϣⲟⲟⲡ ⲛⲁⲛ ⲙⲛ ⲟⲩϫⲟⲉⲓⲥ ⲛⲟⲩⲱⲧ ⲓⲏⲥⲟⲩⲥ . ⲉⲧⲃⲉ ⲟⲩ ⲛⲧⲉⲧⲛⲁϣⲗⲏⲗ ⲉⲣⲟϥ ⲁⲛ ⲱ ⲛϩⲏⲧ ⲛⲓⲟⲩⲇⲁⲓ ⲛⲁⲡⲓⲥⲧⲟⲥ ⲙⲛ ϩⲉⲛⲕⲉ ϩⲁⲓⲣⲉⲧⲓⲕⲟⲥ ⲛⲧⲉⲓϩⲉ ⲉⲩⲉⲓⲛⲉ ⲙⲙⲱⲧⲛ ⲁⲩⲱ ⲉⲧⲉⲧⲛⲉⲓⲛⲉ ⲙⲙⲟⲟⲩ ϩⲙ ⲡⲓⲡⲛⲉⲩⲙⲁ ⲛⲟⲩⲱⲧ ⲙⲡⲗⲁⲛⲟⲥ .

ⲥⲱⲧⲙ ⲉⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ ⲓⲱϩⲁⲛⲛⲏⲥ ϫⲉ ⲡⲁⲓ ⲡⲉ ⲡⲛⲟⲩ#ⲧⲉ ⲙⲙⲉ ⲁⲩⲱ ⲡⲱⲛϩ ⲛϣⲁ ⲉⲛⲉϩ . ⲡⲁⲡⲟⲥⲧⲟⲗⲟⲥ ⲟⲛ ⲉⲧⲟⲩⲁⲁⲃ ⲑⲱⲙⲁⲥ ⲡⲉϫⲁϥ ϫⲉ ⲡⲁϫⲟⲉⲓⲥ ⲁⲩⲱ ⲡⲁⲛⲟⲩⲧⲉ .

ⲉϣϫⲉ ⲡⲉⲕϫⲟⲉⲓⲥ ϩⲱⲱⲕ ⲡⲉ ⲁⲩⲱ ⲡⲉⲕⲛⲟⲩⲧⲉ . ⲉⲧⲃⲉ ⲟⲩ ⲛⲅⲛⲁϣⲗⲏⲗ ⲉⲣⲟϥ ⲁⲛ . ⲛⲓⲙ ⲡⲉⲧⲛⲁϩⲉⲧϩⲧ ⲡϩⲏⲧ ⲛⲛⲓⲕⲉ ⲙⲓⲛⲉ ⲛⲣⲱⲙⲉ . ⲛⲥⲁ ⲡⲗⲟⲅⲟⲥ ⲙⲡⲛⲟⲩⲧⲉ . ⲛⲧⲁ ⲙⲡⲁⲣⲁⲛⲟⲙⲟⲥ ⲛⲓⲟⲩⲇⲁⲓ ϫⲟⲟⲥ ⲉⲣⲟϥ ϫⲉ ⲛⲧⲕ ⲟⲩⲣⲱⲙⲉ ⲉⲕⲉⲓⲣⲉ ⲙⲙⲟⲕ ⲛⲛⲟⲩⲧⲉ .

ⲕⲁⲛ ⲉⲙⲡⲉⲧⲛϫⲟⲟⲥ ϩⲱⲧⲧⲏⲩⲧⲛ ϩⲙ ⲡⲉⲧⲛⲗⲁⲥ . ⲛⲉⲧⲛ[ #